ကိုယ်ပိုင်အုပ်ချုပ်ခွင့်ရ ဒေသများ ဖွံ့ဖြိုးရေး ကျပ် ၁၈ ဘီလီယံကျော် သုံးမည်
ရန်ကုန်၊ မေ ၃၁
ကျေးလက်ဒေသ ဖွံ့ဖြိုးတိုးတက်ရေး ၂၀၁၄-၂၀၁၅ ဘဏ္ဍာနှစ် လုပ်ငန်းများတွင် ကိုယ်ပိုင်အုပ်ချုပ်ခွင့်ရဒေသ ခြောက်ခုအတွက် ကျပ် ၁၈ ဘီလီယံကျော် သုံးစွဲမည် ဖြစ်ကြောင်း မွေးမြူရေး၊ ရေလုပ်ငန်းနှင့် ကျေးလက်ဒေသ ဖွံ့ဖြိုးတိုးတက်ရေး ဝန်ကြီးဌာန၊ ကျေးလက်ဒေသ ဖွံ့ဖြိုးတိုးတက်ရေး ဦးစီးဌာနက မေလ ၃၀ ရက်နေ့တွင် ထုတ်ပြန်သည်။
တိုင်းနှင့်ပြည်နယ် ၁၄ ခု၊ နေပြည်တော်ကောင်စီ နယ်မြေနှင့် ကိုယ်ပိုင်အုပ်ချုပ်ခွင့်ရ ဒေသများအတွက် ကျေးလက်ဖွံ့ဖြိုးရေး ကျပ် ၂၈၆ ဘီလီယံကျော် သုံးစွဲရန် လျာထားပြီး အဆိုပါ အသုံးစရိတ်များထဲမှ ကိုယ်ပိုင်အုပ်ချုပ်ခွင့်ရဒေသ ခြောက်ခုအတွက် ကျပ် ၁၈ ဘီလီယံကျော် သုံးစွဲမည် ဖြစ်ကြောင်း အဆိုပါ ထုတ်ပြန်ချက်များအရ သိရသည်။
“အဲဒီ ဘတ်ဂျက်တွေကို ကျေးလက် လမ်း၊ ရေ၊ မီးနဲ့ တခြား အသက်မွေးဝမ်းကျောင်း လုပ်ငန်းတွေ လုပ်ကိုင်နိုင်ဖို့ သုံးစွဲမှာ ဖြစ်ပါတယ်” ဟု ကျေးလက်ဒေသ ဖွံ့ဖြိုးရေးဦးစီးဌာန ညွှန်ကြားရေးမှူး တစ်ဦးက ဆိုသည်။
ပလောင် ကိုယ်ပိုင်အုပ်ချုပ်ခွင့်ရ ဒေသအတွက် ကျပ် ၃၀၅၃ သန်း၊ ဓနု ကိုယ်ပိုင်အုပ်ချုပ်ခွင့်ရ ဒေသအတွက် ကျပ် ၃၂၈၁ သန်း၊ ကိုးကန့် ကိုယ်ပိုင်အုပ်ချုပ်ခွင့်ရ ဒေသအတွက် ကျပ် ၂၄၈၃ သန်း၊ “ဝ” ကိုယ်ပိုင်အုပ်ချုပ်ခွင့်ရ ဒေသအတွက် ကျပ် ၂၅၆၀ သန်း၊ နာဂ ကိုယ်ပိုင်အုပ်ချုပ်ခွင့်ရ ဒေသအတွက် ကျပ် ၂၇၀၉ သန်းနှင့် ပအို့ဝ် ကိုယ်ပိုင်အုပ်ချုပ်ခွင့်ရ ဒေသအတွက် ကျပ် ၄၄၅၇ သန်း သုံးစွဲမည် ဖြစ်သည်။
ယခုဘဏ္ဍာနှစ် ကိုယ်ပိုင်အုပ်ချုပ်ခွင့်ရ ဒေသ ခြောက်ခုအတွက် ကျေးလက်ဒေသ ဖွံ့ဖြိုးရေး ဘတ်ဂျက်သည် ပြီးခဲ့သည့် ၂၀၁၃-၂၀၁၄ ဘဏ္ဍာနှစ်ထက် ကျပ်ရှစ်ဘီလီယံကျော် ပိုကြောင်း ကျေးလက်ဒေသ ဖွံ့ဖြိုးတိုးတက်ရေး ဦးစီးဌာနထံမှ သိရသည်။
from The Voice Weekly's Facebook Wall http://ift.tt/1mEEvhM
Comments
Post a Comment