ယခုနှစ် အသုံးလုံး လှုပ်ရှားမှု စာတတ်မြောက်သူ လေးသောင်းကျော်ရှိ
ရန်ကုန်၊ မေ ၂၄
ပညာရေး ဝန်ကြီးဌာန ထောက်ပံ့မှုနှင့် နိုင်ငံတစ်ဝန်း မြို့နယ်ပေါင်း ၂၉ ခုတွင် အသုံးလုံး (အခြေခံစာတတ်မြောက်ရေး လှုပ်ရှားမှု) ကို ၂၀၁၄ ခုနှစ် ဧပြီလနှင့် မေလတွင် ပြုလုပ်ခဲ့ရာ စာတတ်မြောက်သူ ၄၆,၄၇၉ ဦးထိ ရှိခဲ့ကြောင်း မြန်မာနိုင်ငံ ပညာရေးသုတေသနအဖွဲ့ ဦးစီးဌာန ကျောင်းပြင်ပ ပညာရေးဌာန လက်ထောက်ညွှန်ကြားရေးမှူး ဦးခင်မောင်ထွေးက The Voice သို့ ပြောကြားသည်။
အဆင့်မြင့် ပညာတက္ကသိုလ် ၃၀ ခုမှ ကျောင်းသား၊ ကျောင်းသူ ၄,၂၆၁ ဦးက ဒေသခံ လုပ်အားပေး ဆရာများနှင့် ပူးပေါင်း၍ အခြေခံစာတတ်မြောက်ရေး လုပ်ငန်းများတွင် ပါဝင်ကူညီခဲ့ကြောင်း၊ ယင်းအခြေခံ စာရေးစာဖတ် သင်တန်းတွင် အသက် ၁၅ နှစ်မှ ၄၅ နှစ်ကြား ရှိသူများ ပိုများလာပြီး အသက် ၆၀ ကျော်သူများလည်း ပါဝင်ကြောင်း ၎င်းက ထပ်လောင်း ပြောကြားသည်။
“အသက် ၁၅ နှစ်အထက်ကို ဦးတည် သင်ပေးပေမယ့် ၁၅ နှစ်အောက် ကလေးတွေ ကျောင်းမှာ မသင်ခဲ့ရလို့ သင်ချင်တယ်ဆို သင်ပေးတယ်” ဟု ဦးခင်မောင်ထွေးက ပြောဆိုသည်။
အသုံးလုံး လှုပ်ရှားမှု ပြုလုပ်ခဲ့သော စီမံချက်မြို့နယ်များတွင် စဉ်ဆက်မပြတ် ပညာရေးဌာနများ တိုးချဲ့သွားရန် စီစဉ်ထားပြီး စာကြည့်တိုက်များ ရှိသော်လည်း အသက်မဝင်သေးသော မြို့နယ်များအတွက် ပြင်ဆင်မှုများ ပြုလုပ်မည် ဖြစ်ကြောင်း ကျောင်းပြင်ပညာရေးဌာနမှ စုံစမ်းသိရှိရသည်။
အခြေခံစာတတ်မြောက်ရေး လှုပ်ရှားမှုကို ၁၉၈၈ ခုနှစ် နောက်ပိုင်းတွင် ရပ်နားသွားခဲ့ရာမှ ၂၀၁၃ ခုနှစ်တွင် မြို့နယ်ပေါင်း ကိုးခု၌ ပညာရေး ဝန်ကြီးဌာန၏ ပံ့ပိုးမှုဖြင့် ပြန်လည်စတင်ခဲ့ရာ လူဦးရေ ၂၂,၄၁၇ ဦး စာတတ်မြောက်ခဲ့ကြောင်း ပညာရေး ဝန်ကြီးဌာနက သိရသည်။
(ယမင်း)
from The Voice Weekly's Facebook Wall http://ift.tt/S5hWJz
Comments
Post a Comment