" မြင်သမျှ…. ကြားသမျှ " စိတ်မကောင်းစရာတွေပါပဲ မြန်မာနိုင်ငံရဲ့ လူသတ်အများဆုံး...

" မြင်သမျှ…. ကြားသမျှ "



စိတ်မကောင်းစရာတွေပါပဲ



မြန်မာနိုင်ငံရဲ့ လူသတ်အများဆုံး လမ်းလို့ပြောရမယ့် အဝေးပြေးလမ်းမ ကြီးပါပဲ။ တစ်လတစ်ကြိမ်လောက်နီးပါး ယာဉ်မတော်တဆမှု ဖြစ်နေတဲ့လမ်းပါပဲ။ သက်တမ်း တိုလေးအတွင်းမှာ ယာဉ်မတော်တဆ ဖြစ်မှုအများဆုံး စံချိန်တင်ရမယ့်လမ်းပါပဲ။ကျွန်တော်တို့ ကိုယ်တိုင်လည်း အမြဲတစေ ဒီလမ်းကိုပဲအသုံးပြုပြီး ခရီး မကြာခဏ ထွက်နေရတာပါ။



စာပေဟောပြောပွဲသွားမယ်ဆိုရင် ဒီလမ်းကို တော့ ရှောင်လွှဲလို့ မရပါဘူး။ ကျွန်တော်တို့တင် မဟုတ်ပါဘူး။ နေ့စဉ်နဲ့အမျှ မဖြစ်မနေခရီးသွားနေကြရတဲ့ သူတွေလည်း မနည်းပါဘူး။ အဲဒီလူတွေဟာ ဒီလမ်းမပေါ်မှာ တင်သွားရင်းလာရင်း အသက်ဆုံးရှုံးနေ ရတယ်ဆိုတော့ စဉ်းစားသာကြည့်။ ကျွန်တော်သိသလောက်။ ကား တစ်စီးတိမ်းမှောက်ရင်တော့ ကားသမားရဲ့ အပြစ်ပါ။ နှစ်စီးဆိုရင်လည်း ကားသမား အပြစ်လို့ ပြောလို့ ရပါသေးတယ်။ သုံးစီးဆိုရင်တော့ လမ်းကို စစ်ဆေးသင့် ပါပြီ။ လေး စီးဆိုရင်လမ်း ရဲ့အပြစ် သေချာပါပြီ။ ငါးစီးဆိုရင်တော့ ဒီလို ဖြစ်တတ်မှန်း သိသိကြီးနဲ့ လမ်းကို ပြင်မပေးသူရဲ့အပြစ် ဖြစ်လာပါပြီ။



ဒီလောက် အက်ဆီးဒင့်တွေ ဖြစ် နေပါလျက် ပြင်ပေးသင့်ပြီဆိုတာ သိသိကြီးနဲ့ လျစ်လျူရှုနေသူတွေမှာရော အပြစ်မရှိဘူးလား။ ဒီကြားထဲယာဉ်လိုင်းကို အပြစ်ဖို့ ပြီး ယာဉ် လိုင်းပိတ်သတဲ့။ ဘာမှတော့ မပြောလိုပါဘူး။ ဒါပေမဲ့ အပြစ်တော့ ခွဲဝေယူသင့်တယ်လို့ ထင်ပါတယ်။ ဒီကြားထဲ အင်ဂျင်နီယာမှူးကြီးက ဒီလမ်းက မပြီးသေးဘူး ဆို တာကြောင့် ရင်ထဲမှာလည်း တစ်မျိုးကြီးပါ။ မပြီး သေးတဲ့ လမ်း မိုင် ၃၆ဝ ကျော်မှာ သေဆုံးပြီးသူ ၃၆ဝ ကျော်ပါပြီ။ အမှန်တော့ မပြီးသေးတဲ့ လမ်းကို ပေးသွားနေတာ ဘယ် သူ့မှာ တာဝန်ရှိလဲ။ မပြီးသေးတဲ့လမ်း ကို ပေးသွားတာ အပြစ်မဲ့သူတွေကို သေတွင်းထဲပို့ရာ မရောက်ဘူးလား။



အဆဲအသန်ဆုံးသူတွေ



တကယ်ပါဗျ။ ပြောရတာ စိတ်မကောင်းဘူး။ အင်တာနက်ပေါ်တက်ကြည့်။ ဆဲဆိုသံတွေနဲ့ ပြည့်လျှံနေတာပါပဲ။ ဘောလုံးအသင်းစွဲလူတွေ ဆဲတယ်။ နိုင်ငံရေး အငြင်းအ ခုံတွေနဲ့ ဆဲကြတယ်။ လူမျိုးရေးကြောင့် ဆဲကြတယ်။ အဆိုး ဆုံးကတော့ဗျာ။ ဘာသာရေးနဲ့ ပတ်သက်တာ အဆိုးဆုံးဖြစ်နေတာ စိတ် မကောင်းစွာပဲ တွေ့ရတယ်။ ဒီ လိုပြော လို့ ကျွန်တော့်ကိုလည်း ဆဲကြမှာပဲ။ မတတ်နိုင်ဘူး။ ပြောသင့်တဲ့ကိစ္စက ပြောရမှာပဲ။ ဘယ့်နှယ်ဗျာ။ ကျွန်တော်တို့ ဗုဒ္ဓ ဘာသာလူမျိုးတွေဟာ ယဉ်ကျေးကြပါ တယ် ဆို။ တချို့ဆို ဘာမှန်းညာမှန်းကို မသိဘဲဘာသာရေးနဲ့ပတ်သက်ပြီး ဝင်ကို ဆဲနေတော့တာ။



ဆဲတဲ့သူတွေကတော့ ဂုဏ်ယူ သလားတော့ မသိပါဘူး။ ဒါပေမဲ့ စဉ်းစားကြည့်ဗျာ။ ကိုယ့်ဘာသာအတွက် ရှက်စရာကြီး။ ကိုယ့်ဘာသာဝင်တွေက ကိုယ့်ဘာသာအတွက် မိုက်ရိုင်းနေကြ တယ်ဆိုတာကဗျာ ကြားလို့ကိုမကောင်း ဘူး။ ကျွန်တော်တို့ ဗုဒ္ဓဘာသာများဟာ ယဉ်ကျေးခြင်း၊ သည်းခံခွင့်လွှတ်ခြင်းကို လက်ကိုင်ထားကြရပါတယ်။ ဒါကြောင့် သည်းမခံနိုင်ရင်တော့ ယဉ်ကျေးသင့်ပါ တယ်ဗျာ။ အခုလို အချင်းချင်းတွေ ဘာသာရေးနဲ့ ဆဲဆိုနေတာ၊ တခြား ဘာသာဝင်တွေမြင်ရင် ဘာဖြစ်မလဲ။ အထင်သေး ခံရမယ်ဗျာ။ ပြီးရင် ဒီလို သွေး ကွဲနေကြတာကို ဝမ်းသာကြမယ်ဗျာ။ ဒီတော့ဗျာ။ အရည်မရ အဖတ်မရ ကိုယ့်ရဲ့ဆဲဆိုမှုတစ်ခုနဲ့ ကိုယ့်ရဲ့လူမျိုးဘာသာကို အများအ ထင်သေး ခံရတာမျိုးမဖြစ်အောင် စောင့်ထိန်းကြရအောင်လားဗျာ။ ဒါဟာလည်း အမျိုးဘာသာကို စောင့်ထိန်းခြင်းတစ်မျိုးပါပဲ။



ပရိသတ်ထင်တာ အမြဲမှားတယ်



ဒါကလည်း အံ့သြစရာကြီးဗျာ။ ကိုယ်ထင်သလို မဖြစ်ဘဲသူပြချင်တာ ဖြစ်နေတာ မျက်လှည့်ဝိုင်းပဲရှိတယ်။ ကိုယ်ကဂေါ်လီလုံးထင်ပေမယ့် မျက်လှည့် ဆရာပြလိုက်မှ ဘဲ ဥကြီးဖြစ်နေတာမျိုး။ ရယ်လည်းရယ်ရ ပျော်လည်းပျော်ရ တာ ပေါ့ဗျာ။ အခုက အဲဒါမျိုးနဲ့ ခပ်ဆင်ဆင်ပါပဲ။ ရယ်တော့ ရယ်ရတယ်။ မပျော်ရဘူးပေါ့ဗျာ။ ဘာလို့လဲဆိုတော့ ကိုယ်ထင်သလို မဖြစ်ဘဲ၊ သူပြချင် သလို ပြသွားတော့တာကိုး။ ပြကွက်တွေကတော့ အင်မတန်ရှင်းတယ်။ ပရိသတ်ခမျာ ”ဟာ” ခနဲမင်သက်ပြီးတော့ကို ကျန်ရစ် ခဲ့ရတာ။ ရုပ်ရှင်ကားပဲ ဆိုပါတော့ဗျာ။ ဒီလို ဇာတ်ညွှန်းတွေ ကျွန်တော်မရေးတတ်ဘူး။ တကယ်ပြော တာ။ ဥပမာ လူတွေအမြင်မှာ လူဆိုးလူညစ်တစ်ယောက်ပေါ့ဗျာ။



သိပ်ဆိုးသိပ်ညစ်လွန်းတော့လူတွေက ကြည့်မရဘူးပေါ့ ဗျာ။ ဘယ်လောက်ထိလဲဆို သူ့နာမည် ကြားတာနဲ့ ”သေပါစေတော်” ဆိုပြီး လူ တိုင်း နှာခေါင်းရှုံ့ဆုတောင်းတယ်။ ပိတ် ကားကိုထိုင်ကြည့်နေတဲ့ ပရိသတ်ကလည်း ဒီအတိုင်းပဲ မြင်ကြတာ။ ကြည့်နေရင်း ကြည့်နေရင်းနဲ့ အဲဒီ လူဆိုးလူညစ်ဟာ အင်မတန်စိတ်ရင်းကောင်းတယ်ဆိုပြီး အကယ်ဒမီဆု ပြုံးပြုံးကြီး ရသွားပါလေရော။ ပရိသတ်ခမျာ ဟာခနဲတောင် မအော်လိုက်နိုင်ဘူး။ ကဲ မြန်မာ့ရုပ်ရှင်လောကမှာတောင် လူဆိုးကို အကယ်ဒမီပေးရိုး ထုံးစံမရှိ ဘူး။ အခုတော့ ”လူဆိုးတွေ အကယ်ဒမီ ရပြီဗျို့” လို့ပဲ ထအော်ရတော့မလို။



ခေါင်းလောင်းကြီးက ဘယ်မှာလဲ



အကြိမ်ကြိမ် ဆယ်ယူခဲ့တဲ့ ဓမ္မစေ တီခေါင်းလောင်းကြီး ကို ပြောပါ တယ်။ ပြည်တွင်းကသာမက ပြည်ပနိုင်ငံများကပါ အကြိမ်ကြိမ်ရယူပြီး ဆယ်ယူနေတဲ့ ခေါင်းလောင်း တစ် ခုပါပဲ။ ဘယ်နားဘယ်လို ကျနေမှန်း မသိရဘဲ ဆယ်ယူနေတာ အကြိမ်ပေါင်း မနည်းလှသလို နှစ်ပေါင်းလည်း မနည်းတော့ပါဘူး။ အခုပဲတွေ့တော့ မလို၊ တော်ကြာ ပဲ တွေ့တော့ မလိုနဲ့ ဖြစ်နေတဲ့ ခေါင်းလောင်းကြီး တလောက မကြာသေးခင် လအနည်းငယ် က ခေါင်းလောင်းကြီး ပြန်လည် ဆယ်ယူရေးလုပ်တော့မယ်လို့ သတင်းတွေမှာ ကြားလိုက်ရပါသေးတယ်။



အခုအချိန်အထိတော့…..တချို့ကလည်း ပြောကြပါတယ်။ ဒီခေါင်းလောင်းကြီး

က တကယ်မရှိပါဘူးတဲ့။ ကဲ…မရှိရင် ဘာလို့များ အကြိမ်ကြိမ် ဆယ်

ယူနေကြသေး တာလဲ။ ဘာပဲဖြစ်ဖြစ်စိတ်ဝင်စားနေမိတာ တော့ အမှန်ပါပဲ။



အမြင်ကပ်စရာ မုန်တိုင်း



အနောက်တောင် မုတ်သုံဝင်ပြီး မကြာခင် ဆိုင်ကလုန်း မုန်တိုင်း အသေးစားက မြန်မာပြည်ထဲ လိုက်ဝင်လာနိုင်တယ်လို့ မိုးဇလက

ခန့်မှန်းပါပြီ။ တကယ်ဖြစ်ခဲ့တဲ့ နာဂစ် တုန်းကလည်း မိုးဇလက ကြိုတင်ကြေညာတယ်လို့ ပြောပါတယ်။ လူတွေ သတိမထားမိ လိုက်ကြပါဘူး။ ဒါကြောင့်လည်း အသေအပျောက်များခဲ့ပါတယ်။ ဟော၊ တစ်နှစ် ကကျတော့ မုန်တိုင်းဝင်မယ် ဆိုပြီး အကြီးအကျယ် ကြေညာပေးခဲ့ တယ်။ ကြိုတင်ပြင်ဆင်မှုတွေလည်း အတော်လုပ်ခဲ့ပါတယ်။ ခက်တာက အဲဒီလို ပြင်ဆင်ကြော်ငြာပေးမှ မုန်တိုင်းက အကြီးအကျယ်ဝင်မလာဘူး။ (နည်းနည်းလေးတော့ ဝင်တာပေါ့။)



အဲဒီတော့ဗျာ။ တကယ်ပြင်ဆင် ပေးရတဲ့သူတွေ မျက်နှာပျက်တာပေါ့။ သူတို့ခမျာ ကူညီကယ်ဆယ်ဖို့ အသင့်လုပ်ကာမှ မုန်တိုင်းက ဝင်မလာတာ ကိုး။မပြင် ဆင်ထား တုန်း ကတော့ ဝင် လာပြီး မွှေသွားတယ်ဗျ။ ပြင်ဆင်ကာ ကျမှ မလာဘူးဆိုတော့ ပြင်ဆင်ထားတဲ့ သူတွေ သိက္ခာလည်း ကျတာပေါ့။ဒါကြောင့် မုန်တိုင်းကိုပဲ သတိပေးချင် တယ်။ ဝင်မယ်ဆိုဝင်ဗျာ။ မဝင်ဘူးဆိုလည်း မဝင်နဲ့ ရှင်းရှင်းပြောဗျာ။ နို့မဟုတ်ရင် ကျုပ်တိုိ့လူတွေ မျက်နှာပျက်တယ်။ စတာနော်။



စာဖတ်သူအားလုံး သဘာဝဘေးရန် ကင်းဝေးကြပါစေ..



အကြည်တော်

http://ift.tt/1jO3lPi







from Popular Myanmar News Journal's Facebook Wall http://ift.tt/1oqEeRt