သံတွဲခရိုင်အတွင်း သစ်တောဧက တစ်သိန်းခွဲကျော် အစားထိုးစိုက်ခင်းအတွက် မူရင်းသစ်တောများ ခုတ်လှဲနေခြင်းအပေါ် ဒေသခံများကန့်ကွက်
သံတွဲခရိုင်အတွင်း သစ်တောဧက တစ်သိန်းခွဲကျော် အစားထိုးစိုက်ခင်းအတွက် မူရင်းသစ်တောများ ခုတ်လှဲနေခြင်းအပေါ် ဒေသခံများ ကန့်ကွက်မှုများ ရှိလာကြောင်းနှင့် ညီလာခံကာလအတွင်း ရခိုင်လူမှုကွန်ရက်မှလည်း ယင်းကိစ္စနှင့်ပတ်သက်ပြီး သဘောထားထုတ်ပြန်ချက်များ ရှိခဲ့ကြောင်း သိရသည်။
ရခိုင်ရိုးမတောင်တန်းနှင့် ဆက်နွှယ်လျက်ရှိသော တောင်တန်းများတွင် ပါဝင်သည့် သဘာဝတောတောင်များအား အစားထိုးသစ်ပင်များ စိုက်ပျိုးရန်အတွက် အစိုးရမှ ပုဂ္ဂလိကကုမ္ပဏီတစ်ခုသို့ ခွင့်ပြုချက် ပေးထားခဲ့ခြင်းကြောင့် လက်ရှိအနေအထားအရ တစ်နေ့လျှင် သစ်တောဧက ၅၀၀ ခန့်အား ခုတ်ထွင်ရှင်းလင်းခြင်း ပြုလုပ်နေသဖြင့် ချက်ချင်းရပ်တန့်ပေးရန် အတွက်လည်း ရခိုင်လူမှုကွန်ရက်(ရခိုင်ပြည်)မှ တောင်းဆိုချက်တစ်ခု ထုတ်ပြန်ခဲ့သည်။
ယင်းနှင့်ပတ်သက်ပြီး “အခုလို သဘာဝသစ်တောတွေကို ခုတ်လှဲနေတာ ဒေသခံ တိုင်းရင်းသားတွေအတွက် အများကြီး ထိခိုက်ပါတယ်။ အဲဒါကြောင့် ဒေသခံတွေ အနေနဲ့လည်း လုပ်သင့်တာ လုပ်ရပါလိမ့်မယ်။ တည်ဆဲဥပဒေထဲကပဲ စနစ်တကျ တောင်းဆိုသွားဖို့ ရှိတယ်။ လွှတ်တော်ထဲကလည်း တောင်းဆိုမယ်။ ပြည်နယ်အစိုးရဖွဲ့ကိုလည်း တင်ပြတောင်းဆိုသွားဖို့ ရှိပါတယ်။ အဲဒါကို အစိုးရက စနစ်တကျ ကိုင်တွယ်ဖြေရှင်း မပေးဘူးဆိုရင် ရခိုင်တစ်မျိုးသားလုံး ပါဝင်တဲ့ လူထုလှုပ်ရှားမှုတွေ လုပ်သွားရမှာ ဖြစ်တယ်” ဟု ရခိုင်ဌာနေတိုင်းရင်းသားများ အခွင့်အရေး စောင့်ရှောက်မှုကော်မတီမှ ကိုမင်းခန့်က ပြောကြားသည်။
အဆိုပါ ရခိုင်ရိုးမသစ်တောအား ဂိုးလ်ဒင်းဂိတ်ကုမ္ပဏီမှ မြေလွတ်မြေရိုင်းလျှောက်ထားပြီး သစ်တောဝန်ကြီးဌာနသို့ အစားထိုးသစ်ပင် စိုက်ပျိုးရန် လျှောက်ထားခုတ်လှဲနေခြင်းဖြစ်ကြောင်း သိရသည်။ ရခိုင်ကမ်းရိုးတန်း သဘာဝပတ်ဝန်းကျင် ထိန်းသိမ်းရေးအဖွဲ့မှ အဖွဲ့ဝင်တစ်ဦးဖြစ်သူ ကိုဇော်မင်းဌေးက “အခု သစ်တောတွေကို ခုတ်နေတာက ဂိုးလ်ဒင်းဂိတ် ကုမ္ပဏီကလို့ သိရတယ်။ သူတို့က ၂၀၁၃ နှစ်ကုန်ပိုင်းကစပြီး လူအင်အား ၇၀ လောက်၊ စက်ကိုးလုံးကိုသုံးပြီး ခုတ်နေတာဖြစ်တယ်။ အခု သူတို့ခုတ်ထားတဲ့ အနေအထားအရဆိုရင် ဧက ၂၀၀၀ ၀န်းကျင်လောက်ကို ခုတ်ထားပြီးဖြစ်တယ်။ အဲဒါကို ပြည်သူတွေ စိုးရိမ်နေကြတယ်” ဟု ပြောကြားခဲ့သည်။
ထို့ပြင် လက်ရှိမြေလွတ်မြေရိုင်း ဥပဒေတွင်လည်း ထိုသို့ဧကမြောက်များစွာ လုပ်ကိုင်ရန် မပါရှိကြောင်းနှင့် ကျေးရွာများနှင့် နှစ်မိုင်ခန့် အကွာအဝေး၏ ပြင်ပ၌သာ လုပ်ကိုင်ရမည်ဖြစ်ကြောင်း ကိုမင်းခန့်က ပြောကြားခဲ့သည်။
ရခိုင်ပြည်နယ်အတွင်း ရခိုင်ရိုးမကဲ့သို့သော တန်ဖိုးကြီးလှသည့် သစ်တောများအား ခုတ်လှဲနေခြင်းအားဖြင့် အနီးဝန်းကျင် ကျေးရွာများနှင့် မြစ်ချောင်းများ တိမ်ကောမှုများကိုလည်း ရင်ဆိုင်လာရနိုင်ကြောင်း၊ သစ်တောအား မှီခိုစားသောက်နေကြရသော ကျိန္တလီမြို့နယ်ခွဲနှင့် သံတွဲမြို့နယ်ခွဲများမှ ရွာပေါင်း ၁၅ ရွာခန့်မှာလည်း စားဝတ်နေရေး အခက်အခဲများ ရင်ဆိုင်လာရနိုင်ဖွယ်ရှိကြောင်း ဒေသခံများထံမှ သိရသည်။
(ရခိုင်ရိုးမနှင့် ဆက်စပ်တောင်တန်းများအတွင်း သစ်များခုတ်လှဲထားသည်ကို တွေ့ရစဉ် (ဓာတ်ပုံ-စိန်ချစ်))
from Eleven Media Group's Facebook Wall http://ift.tt/1sNyzFd
Comments
Post a Comment