ပတ်ဝန်းကျင် ထိန်းသိမ်းရေး နည်းဥပဒေ ဇွန်လတွင် ထွက်ရှိမည်
ရန်ကုန်၊ မေ ၂၅
ပထမဆုံးအကြိမ် ပြည်တွင်းလူမှုအဖွဲ့အစည်းများ ကိုယ်တိုင် ပါဝင် ရေးဆွဲထားသည့် ပတ်ဝန်းကျင် ထိန်းသိမ်းရေး နည်းဥပဒေမှာ ယခုနှစ် ဇွန်လအတွင်း ထွက်ရှိမည် ဖြစ်ကြောင်း ပတ်ဝန်းကျင် ထိန်းသိမ်းရေးနှင့် သစ်တောရေးရာ ဝန်ကြီးဌာန ပတ်ဝန်းကျင် ထိန်းသိမ်းရေး ဦးစီးဌာန ညွှန်ကြားရေးမှူးချုပ် ဦးနေအေးက ပြောကြားသည်။
နိုင်ငံတစ်ဝန်း စီမံကိန်းကြီးများ အကောင်အထည်ဖော်ရာတွင် ဖြစ်ပေါ်လာသည့် သဘာဝပတ်ဝန်းကျင် ထိခိုက်မှုကို လျှော့ချနိုင်မည့် ပတ်ဝန်းကျင် ထိန်းသိမ်းရေး ဥပဒေမှာ ၂၀၁၂ ခုနှစ်က ထွက်ရှိထားပြီး ဖြစ်ရာ ယင်းဥပဒေကို အထောက်အပံ့ ပေးနိုင်မည့် နည်းဥပဒေမှာ လွှတ်တော်သို့ တင်ပို့ထားပြီး ဖြစ်၍ ဇွန်လအတွင်း အတည်ပြု ပြဋ္ဌာန်းနိုင်မည် ဖြစ်ကြောင်း ၎င်းက ပြောဆိုသည်။
“လာမယ့် လွှတ်တော်မှာ ပြန်လည် ပြင်ဆင်စရာလည်း မရှိဘူးဆိုရင် ဥပဒေ အတည်ပြုပြီး ဇွန်လအတွင်း ထွက်ရှိနိုင်မယ်” ဟု ဦးနေအေးက ဆိုသည်။
အဆိုပါ နည်းဥပဒေ ထွက်ရှိလာပါက လက်ရှိ ဖြစ်ပေါ်နေသော ပတ်ဝန်းကျင် ထိခိုက်နစ်နာမှုများကို ဥပဒေ၊ နည်းဥပဒေနဲ့ အညီ လုပ်ထုံးလုပ်နည်းများအရ ထိထိရောက်ရောက် အရေးယူ ကာကွယ်နိုင်မည် ဖြစ်ကြောင်း ဂေဟစနစ် ထိန်းသိမ်းရေးနှင့် လူမှုဖွံ့ဖြိုးရေး ဆောင်ရွက်သည့် အဖွဲ့ (ECCDI) ဥက္ကဋ္ဌ ဦးကျော်တင့်က သုံးသပ် ပြောကြားသည်။
from The Voice Weekly's Facebook Wall http://ift.tt/1ij4sQZ
Comments
Post a Comment