ပညာရေး ဝန်ကြီးဌာန ကျောင်းပြင်ပ မူလတန်းပညာရေး မြို့နယ် ၂၀ ထပ်တိုးမည်
ရန်ကုန်၊ မေ ၂၂
အခြေခံပညာ မူလတန်းကျောင်းများတွင် အကြောင်းရင်း အမျိုးမျိုးကြောင့် ပညာသင်ကြားခွင့် မရသူများအတွက် ပညာရေး ဝန်ကြီးဌာနက တိုင်းဒေသကြီးနှင့် ပြည်နယ် ခုနစ်ခုတွင် ကျောင်းပြင်ပ မူလတန်းပညာရေး မြို့နယ် ၂၀ ထပ်တိုး ဖွင့်လှစ်မည် ဖြစ်ကြောင်း ကျောင်းပြင်ပ မူလတန်း ပညာရေး စီမံချက် မန်နေဂျာ ဦးထွန်းကြည်က The Voice သို့ ပြောကြားသည်။
ထပ်တိုးစီမံချက် မြို့နယ် ၂၀ မှာ ဧရာဝတီတိုင်းဒေသကြီး၊ ရန်ကုန်တိုင်းဒေသကြီး၊ မကွေးတိုင်းဒေသကြီး၊ ကရင်ပြည်နယ်၊ ရခိုင်ပြည်နယ်၊ ရှမ်းပြည်နယ်နှင့် ကချင်ပြည်နယ်တို့မှ ဖြစ်ကြောင်း ၎င်းက ပြောကြားသည်။
၂၀၁၃ ပညာသင်နှစ်က မြို့နယ် ၈၀ တွင် ကျောင်းပြင်ပ မူလတန်းပညာရေး အစီအစဉ်ကို ဆောင်ရွက်ခဲ့ရာ ယခုနှစ်တွင် မြို့နယ် ၁၂ ခု၌ စီမံချက် ပြီးဆုံးသွားခြင်းကြောင့် ယခု မြို့နယ် ၂၀ ထပ်တိုး၍ ၂၀၁၄ ပညာသင်နှစ်တွင် စီမံချက်မြို့နယ် ၈၈ ခု၌ ဆောင်ရွက်မည် ဖြစ်ကြောင်း ၎င်းက ထပ်လောင်း ပြောကြားသည်။
ကျောင်းပြင်ပ မူလတန်းစီမံချက် မြို့နယ်တိုး၍ ဆရာ၊ ဆရာမ ၂၁၅ ဦး တိုးခေါ်ယူသွားမည် ဖြစ်ကြောင်း ပညာရေး ဝန်ကြီးဌာနထံမှ စုံစမ်းသိရှိရသည်။
ကျောင်းပြင်ပ မူလတန်း ပညာရေးတွင် ပညာသင်နှစ် ကာလ ၂ နှစ်သာ ကြာမြင့်ပြီး အခြေခံအကျဆုံး ပထမနှစ် သင်တန်းတွင် သင်ကြားမည့် ဆရာ၊ ဆရာမများက သင်ရိုးညွှန်းတမ်းအပေါ် နားလည်တတ်ကျွမ်းရန် အလွန်အရေးကြီးကြောင်း မြန်မာနိုင်ငံ စာတတ်မြောက်ရေး အထောက်အကူပြု ပင်မဌာန ဥက္ကဋ္ဌ ဦးသန်းဦးက ပြောဆိုသည်။
၂၀၁၃ ပညာသင်နှစ်က ကျောင်းပြင်ပ ပညာရေး စီမံချက်မြို့နယ် ၈၀ ခုတွင် ဆရာ၊ ဆရာမ ၈၈၅ ဦးနှင့် ကျောင်းသား၊ ကျောင်းသူ ၈၇၃၅ ဦး ရှိကြောင်း ကျောင်းပြင်ပ ပညာရေးဌာနထံမှ သိရသည်။
(နေဇာကျော်)
from The Voice Weekly's Facebook Wall http://ift.tt/1jJ173g
Comments
Post a Comment