ပြည်ထောင်စုအစိုးရ ရခိုင်ပြည်နယ်အတွက် တိကျသော အစီအစဉ် ချမပြနိုင်ဟု ဝေဖန်
ကေဇူး| အင်္ဂါနေ့၊ မေလ ၂၀ ရက် ၂၀၁၄ ခုနှစ်
ရခိုင်ပြည်နယ် တည်ငြိမ်အေးချမ်းရေးအတွက် ရခိုင်ပြည်နယ် တည်ငြိမ်အေးချမ်းရေးကော်မတီ ဥက္ကဋ္ဌ၊ ဒု-သမ္မတ ဒေါက်တာစိုင်းမောက်ခမ်း ရခိုင်ပြည်နယ်သို့ ရောက်ရှိခဲ့သော်လည်း ပဋိပက္ခကို ဖြေရှင်းနိုင်သည့် တိကျသောအစီအစဉ်များ ချပြခြင်းမရှိခဲ့ဟု ၎င်းနှင့် တွေ့ဆုံဆွေးနွေးခဲ့သူများက မေလ ၁၉ ရက်တွင် မဇ္ဈိမကို ပြောသည်။
ဒု-သမ္မတသည် ရခိုင်ပြည်နယ် တာဝန်ရှိသူများနှင့် ဒေသတည်ငြိမ်အေးချမ်းရေးအတွက် မေ လ ၁၈ ရက်က စစ်တွေမြို့၊ အစိုးရရုံးတွင် ဆွေးနွေးခဲ့သည်။
“ဒေသတည်ငြိမ်ရေးအတွက် လာတယ်လို့ ပြောပေမယ့် အစိုးရကိုယ်တိုင် တိကျတဲ့ အစီအစဉ်တစ်ခုခု ထုတ်မပြနိုင်ဘူး”ဟု ဒု-သမ္မတနှင့်တွေ့ဆုံခဲ့သူ ရခိုင်ပြည်နယ် အရေးပေါ်ညှိနှိုင်းဖျန်ဖြေရေးအဖွဲ့ဝင် ဦးဦး သာပွင့်က မဇ္ဈိမကို ပြောသည်။
ဒု-သမ္မတသည် ရခိုင်ပြည်နယ် အစိုးရ အဖွဲ့ဝင်ဝန်ကြီးများ၊ မြို့မိမြို့ဖများ၊ အရေးပေါ် ညှိနှိုင်းဖျန်ဖြေရေးအဖွဲ့များ၊NGO အဖွဲ့များနှင့် တွေ့ဆုံခဲ့ခြင်းဖြစ်သည်။
“တရားဥပဒေစိုးမိုးဖို့ အဓိကလိုတယ် ပြည်သူတွေက ပူးပေါင်းပါဝင်ဖို့ တိုက်တွန်း သွားပါတယ်။ အစိုးရ အနေနဲ့ ဖြေရှင်းမယ့် အစီအစဉ်အချို့ကို ချပြနိုင်ပေမယ့်အချို့ကို ချမပြနိုင်တာလည်း ရှိတယ်” ဟု ရခိုင် ပြည်နယ် အစိုးရအဖွဲ့ဝင်ဝန်ကြီး ဦးအောင်ကျော်မင်းက မဇ္ဈိမကိုပြောသည်။
ဒု-သမ္မတနှင့်တွေ့ဆုံသော ဒေသခံများ အနေဖြင့် ၁၉၈၂ နိုင်ငံသားဖြစ်ခွင့် ဥပဒေအရ စိစစ်ပေးရန် ထပ်မံ တောင်းဆိုလိုက်ပြီး ဒု-သမ္မတက ပြည်ထောင်စုအစိုးရကိုပြန်လည်တင်ပြပေးမည်ဟု ပြောကြားခဲ့သည်ဟု တွေ့ဆုံခဲ့သူများက ဆိုသည်။
from Mizzima - News in Burmese's Facebook Wall http://ift.tt/1o9q0o5
Comments
Post a Comment