သစ်အလုံးလိုက် တင်ပို့မှု ရပ်ဆိုင်း၍ နယ်စပ်ကုန်သွယ်ရေးစခန်း ပို့ကုန် လျော့ကျ
ရန်ကုန်၊ မေ ၁၆
မြန်မာ့သစ်လုံးများ ပြည်ပသို့ တင်ပို့မှုကို ဧပြီလ ၁ ရက်နေ့မှ စတင်၍ ရပ်ဆိုင်းလိုက်ရာ တာချီလိတ် နယ်စပ်ကုန်သွယ်ရေးစခန်းမှ တရုတ်နိုင်ငံဘက်သို့ တရားဝင် သစ်တင်ပို့ခြင်း မရှိခြင်းကြောင့် အဆိုပါ နယ်စပ်စခန်း၏ ပို့ကုန်ပမာဏမှာ လျော့ကျခဲ့ကြောင်း တာချီလိတ် နယ်စပ်ကုန်သွယ်ရေးစခန်း တာဝန်ခံ ဒုတိယ ညွှန်ကြားရေးမှူး ဦးသိန်းထွန်းဦးက ပြောကြားသည်။
ယခု၂၀၁၄-၂၀၁၅ ဘဏ္ဍာနှစ်စမှ မေလ ၉ ရက်နေ့အထိ တာချီလိတ်စခန်းမှ တရုတ်နိုင်ငံသို့ ပို့ကုန် တင်ပို့မှုသည် အမေရိကန်ဒေါ်လာ ၀ ဒသမ ၁ သန်းကျော်ရှိပြီး ပြီးခဲ့သည့် ၂၀၁၃-၂၀၁၄ အလားတူ ကာလနှင့် နှိုင်းယှဉ်ပါက အမေရိကန်ဒေါ်လာ နှစ်သန်းခန့် လျော့နည်းလျက် ရှိကြောင်း စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန (နေပြည်တော်) မှ သိရသည်။
တာချီလိတ် နယ်စပ်ကုန်သွယ်ရေးစခန်း၏ အဓိကပို့ကုန်သည် တရုတ်နိုင်ငံသို့ သစ်တင်ပို့မှု ဖြစ်၍ ပြည်ပသို့ သစ်အလုံးလိုက် တင်ပို့မှုကို ပိတ်လိုက်ခြင်းကြောင့် ယင်းသို့ ပို့ကုန်တန်ဖိုး လျော့ကျခဲ့ခြင်း ဖြစ်ကြောင်း အဆိုပါ နယ်စပ်ကုန်သွယ်ရေးစခန်း တာဝန်ခံက ရှင်းပြသည်။
ပြည်ပသို့ သစ်အလုံးလိုက် တင်ပို့ခွင့်ပြုစဉ်က အဆိုပါ တာချီလိတ် နယ်စပ်ကုန်သွယ်ရေးစခန်း မြောက်ဘက် မိုင် ၃၀ ကျော်အကွာရှိ ဝမ်ပုံမြို့နယ် မဲခေါင်မြစ်မှတစ်ဆင့် သင်္ဘောများဖြင့် တရုတ်နိုင်ငံသို့ သစ်များကို အလုံးလိုက် တင်ပို့ခဲ့ကြောင်း စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနမှ ညွှန်ကြားရေးမှူး ဦးတေဇာအောင်ဝင်းက ဆိုသည်။
“မေ၊ ဇွန်၊ ဇူလိုင်နဲ့ သြဂုတ်လတွေမှာ ဆိုရင် သစ်ကို အကြီးအကျယ် ပို့ကြတာ” ဟု ၎င်းက ရှင်းပြသည်။
လက်ရှိအချိန်တွင် တာချီလိတ် နယ်စပ်မှ ဆောက်လုပ်ရေး လုပ်ငန်းသုံး ဘိလပ်မြေ၊ သံချောင်းမျိုးစုံ၊ ကြွေပြား၊ လက်တွန်းထွန်စက်နှင့် မျက်နှာကြက်ပြားများကို အဓိက တင်သွင်းပြီး သတ္တု၊ ဆန်နှင့် ရာသီပေါ် သစ်သီးမျိုးစုံ အဓိက တင်ပို့လျက် ရှိသည်ဟု အဆိုပါ နယ်စပ်ကုန်သွယ်ရေးစခန်းထံမှ သိရသည်။
ယခု ဘဏ္ဍာနှစ်စမှ မေလ ၉ ရက်နေ့အထိ တာချီလိတ် နယ်စပ်ကုန်သွယ်ရေး စခန်းမှ ပို့ကုန် ၀ ဒသမ ၁ သန်းကျော် ရှိပြီး သွင်းကုန် အမေရိကန်ဒေါ်လာ ခြောက်သန်းနီးပါး ရှိခြင်းကြောင့် ပို့ကုန်သည် သွင်းကုန်အောက် အဆ ၆၀ နီးပါး လျော့ကျလျက် ရှိကြောင်း စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၏ စာရင်းများအရ သိရသည်။
from The Voice Weekly's Facebook Wall http://ift.tt/1sCZy6g
Comments
Post a Comment