နိုင်ငံခြားရင်းနှီးမြှုပ်နှံမှု အမှန်ဝင်ရောက်မြှုပ်နှံမှု ပမာဏ ကန်ဒေါ်လာ ၃၆ ဘီလီယံကျော်သာရှိ
စည်သူအောင်| ကြာသာပတေးနေ့၊ မေလ ၁၅ ရက် ၂၀၁၄ ခုနှစ်
၂၀၁၄ခုနှစ် ဧပြီလစာရင်းများအရ နိုင်ငံခြားရင်းနှီးမြှုပ်နှံမှုပမာဏ အမေရိကန် ဒေါ်လာ၄၆ ဒသမ ၄ ဘီလီယံအထိ ရင်းနှီးမြှုပ်နှံခွင့်ပြုထားသော်လည်း အမှန်တကယ်ဝင်ရောက်မြှုပ်နှံမှုပမာဏမှာ အမေရိကန်ဒေါ်လာ ၃၆ ဒသမ ၄ ဘီလီယံသာရှိကြောင်း ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာနမှ သတင်းထုတ်ပြန်သည်။
ခွင့်ပြုပမာဏနှင့် အမှန်တကယ် ရင်းနှီးမြှုပ်နှံမှုအကြား ကွာဟချက် အမေရိကန်ဒေါ်လာ ၁၀ ဘီလီယံခန့် ဖြစ်ပေါ်နေခြင်းဖြစ်ပြီး အမေရိကန်ဒေါ်လာ ၄၆ ဒသမ ၄ ဘီလီယံဝင်ရောက်မြှုပ်နှံမည့် လုပ်ငန်း ၇၀၇ ခုအနက် လုပ်ငန်း ၄၄၆ ခုကသာ အမေရိကန်ဒေါ်လာ ၃၆ ဒသမ ၄ ဘီလီယံခန့်ကို မြှုပ်နှံထာခြင်းဖြစ်သည်။
“နိုင်ငံခြားလုပ်ငန်းတွေအဆိုပြုထားတဲ့ အတိုင်း မြှုပ်နှံချင်စိတ် ဖြစ်လာအောင် အစိုးရကလည်း အခွင့်အရေးနဲ့ မက်လုံး ပေးဖို့လိုပါတယ်”ဟု စီးပွားရေးလုပ်ငန်းရှင် ဦးကြည်လွင်က ပြောသည်။
၁၉၈၈ ခုနှစ်မှ ၂၀၁၀ပြည့်နှစ် မတ်လကုန်အထိ နိုင်ငံခြားရင်းနှီးမြှုပ်နှံမှုခွင့်ပြု ပမာဏ အမေရိကန် ဒေါ်လာ ၁၆ ဒသမ ၀၅ ဘီလီယံရှိခဲ့ပြီး ၂၀၁၂ ခုနှစ် ဖေဖော်ဝါရီလ ကုန်အထိ အမေရိကန်ဒေါ် လာ ၄၀ ဒသမ ၄ ဘီလီယံကျော်ရှိခဲ့ကာ ယခုအမေရိကန် ဒေါ်လာ ၄၆ ဒသမ ၄ ဘီလီယံအထိ ၀င်ရောက်မြှုပ်နှံခွင့်ပြုခဲ့ခြင်းဖြစ်သည်။
“ဒါက နိုင်ငံရဲ့နိုင်ငံရေး၊ လုံခြုံရေးနဲ့ စီးပွားရေးအခင်းအကျင်းပေါ် မူတည်ပါတယ်။ ရင်နှီးမြှုပ်နှံသူတွေအတွက် လုံလောက်တဲ့ ကျေနပ်မှုမရင် အပြည့်အ၀မြှုပ်နှံမှာမဟုတ်ဘူး။ အရင်က အမိန့်အာဏာနဲ့ အုပ်ချုပ်တယ်၊ နီးစပ်တဲ့သူတွေကို စီးပွားရေးလုပ်ကိုင်ခွင့်ပေးတယ်။ ဒီမိုကရေစီစနစ်မှာ အမိန့်အာဏာနဲ့အုပ်ချုပ်လို့ မရတော့ ဒီကဖိရင်ဟိုက ထောင်တယ်။ ရင်းနှီးမြှုပ်နှံသူတွေ ယုံကြည်မှုပိုများအောင် လုပ်မှပဲရမယ်”ဟု စီးပွားရေး ပါမောက္ခ(ငြိမ်း) ဒေါ်ရီရီမြင့်က သုံးသပ်သည်။
၂၀၁၄ ဧပြီလ ထုတ်ပြန်ချက်များအရ နိုင်ငံခြားရင်းနှီးမြှုပ်နှံမှုပမာဏအများဆုံး စာရင်းတွင် တရုတ်၊ ထိုင်း၊ ဟောင်ကောင်၊ စင်ကာပူ၊ ဗြိတိန်နိုင်ငံတို့ ဦးဆောင်နေသော်လည်း အမှန်တကယ် ၀င်ရောက်မြှုပ်နှံမှုစာရင်းတွင် အပြောင်းအလဲအချို့ရှိပြီး တရုတ်၊ ဟောင်ကောင်၊ စင်ကာပူ၊ တောင်ကိုရီးယား၊ ထိုင်းနိုင်ငံတို့က အများဆုံးမြှုပ်နှံထားခြင်းဖြစ်သည်။
အမှန်တကယ် ၀င်ရောက်မြှုပ်နှံမှု စာရင်းအရ ထိပ်ဆုံးစာရင်းဝင် ငါးနိုင်ငံသည် အမေရိကန်ဒေါ်လာ ၃၁ ဘီလျံခန့် မြှုပ်နှံထားပြီး စုစုပေါင်းမြှုပ်နှံမှုပမာဏ၏ ၈၅ရာခိုင်နှုန်းကို မြှုပ်နှံထားခြင်းဖြစ်သည်။
နိုင်ငံခြားလုပ်ငန်းများ အမှန်တကယ် ၀င်ရောက်မြှုပ်နှံမှုအများဆုံး လုပ်ငန်းကဏ္ဍများမှာ ရေနံနှင့် သဘာဝဓာတ်ငွေ့၊ ရေအားလျှပ်စစ်၊ ကုန်ထုတ်လုပ်ရေး၊ သတ္တု၊ ဟိုတယ်နှင့် ခရီးသွား၊ ပိုဆောင်ဆက်သွယ်ရေးလုပ်ငန်းများဖြစ်ပြီး အဆိုပါကဏ္ဍများတွင် ၃၅ ဒသမ ၁ ဘီလီယံ ရင်းနှီးမြှုပ်နှံထားသည်။
from Mizzima - News in Burmese's Facebook Wall http://ift.tt/RT0c4z
Comments
Post a Comment