ရေဆိုးများ စနစ်တကျ စွန့်ပစ်ခြင်း မရှိသည့် မုန့်တီ လုပ်ငန်းရှင်များကို စည်ပင်ဥပဒေဖြင့် အရေးယူမည်
မော်လမြိုင်၊ မေ ၃၀
မွန်ပြည်နယ် သထုံမြို့ ဘင်လိုင်ရပ်ကွက် မုန့်တီလုပ်ငန်း စက်ရုံများမှ စွန့်ပစ်သော ရေဆိုး၊ ရေညစ်များကြောင့် အနံ့ဆိုးများ ထွက်ပေါ်ပြီး ပတ်ဝန်းကျင် ရပ်ကွက်အတွင်းရှိ ဒေသခံများ၏ ကျန်းမာရေးကို ထိခိုက်မှုများ ရှိနိုင်၍ ဒေသခံ ပြည်သူများနှင့် စက်ရုံ လုပ်ငန်းရှင်များအကြား ညှိနှိုင်းပေးသော်လည်း လိုက်နာမှု မရှိသည့် လုပ်ငန်းရှင်များကို စည်ပင်သာယာရေး ဥပဒေဖြင့် အရေးယူမည် ဖြစ်ကြောင်း သထုံမြို့နယ် စည်ပင်သာယာရေး အထောက်အကူပြု ကော်မတီ ဥက္ကဋ္ဌ ဒေါက်တာသန်းမျိုးက ပြောကြားသည်။
မုန့်တီလုပ်ငန်း တည်ရှိရာ ဘင်လိုင် ရပ်ကွက်တွင် နေထိုင်သူများက မုန့်တီလုပ်ငန်းမှ ထွက်ရှိသည့် အနံ့ဆိုးများနှင့် ရေဆိုး၊ ရေညစ်များဒဏ်ကို ဆိုးရွားစွာ ခံစားနေရကြောင်းနှင့် ယင်းရေဆိုး၊ ရေညစ်များ သိုလှောင်ထားရာ ရေပုပ်ကန်များသည် စနစ်ကျမှု မရှိခြင်းကြောင့် ကျေးရွာရေတွင်းများ အတွင်းသို့ စိမ့်ဝင်ပြီး၊ ရေတွင်းများ ပျက်စီးရကြောင်း ဒေသခံများက သထုံမြို့နယ် စည်ပင်သာယာရေး အထောက်အကူပြု ကော်မတီထံ တိုင်ကြားခဲ့သည်ဟု ၎င်းက ပြောဆိုသည်။
အနံ့ထွက်နည်းသည့် မုန့်တုံးများဖြင့် မုန့်တီဖတ်များ ပြုလုပ်ပါက စားသုံးသူများ လက်မခံခြင်း၊ အရသာကွာခြင်း၊ ကြာရှည် အထားမခံခြင်းကြောင့် မုန့်နှစ်စိမ်သည့် စနစ်ဖြင့် ပြုလုပ်နေရခြင်း ဖြစ်ကြောင်းနှင့် မြို့ပြင်ထွက်၍ လုပ်ငန်း လည်ပတ်ရန်မှာလည်း ငွေကြေး အခက်အခဲ ရှိကြောင်း မုန်တီလုပ်ငန်းရှင် ကိုဇော်က ပြောကြားသည်။
သထုံမြို့ပေါ်ရှိ မုန့်တီလုပ်ငန်းများကို သထုံမြို့ပြင်သို့ လုပ်ငန်း ရွှေ့ပြောင်းပေးရန် ၂၀၁၂ ခုနှစ် ဇန်နဝါရီလကပင် ဒေသခံများက တောင်းဆိုခဲ့ကြောင်း၊ ဒေသခံအချင်းချင်း အမုန်းပွားမှုများ မဖြစ်ပွားစေရန် ရပ်ကွက်တွင်း လုပ်ငန်း လည်ပတ်ပါက အနံ့ဆိုးများ မထွက်စေရန်နှင့် ရေဆိုးများကို စနစ်တကျ စွန့်ပစ်ပေးရန် အကြိမ်ကြိမ် ညှိနှိုင်းပေးခဲ့သော်လည်း မုန့်တီ လုပ်ငန်းရှင်များက ယနေ့အချိန်ထိ လိုက်နာမှုများ မရှိခြင်းကြောင့် တရားစွဲဆိုသည့် အဆင့်သို့ ရောက်ရှိလာခြင်း ဖြစ်ကြောင်း သထုံမြို့နယ် စည်ပင်သာယာရေးအဖွဲ့ အမူဆောင်အရာရှိ ဦးမောင်စိုးက ဖြည့်စွက် ပြောဆိုသည်။
“လုပ်ငန်းအားလုံးမှာ သိုလှောင်ထားတဲ့ ရေဆိုးတွေကို ရေပုပ်စုပ်ကား တစ်စီးနဲ့တော့ မရသေးဘူး။ သန့်ရှင်းသပ်ရပ်မှု၊ ရေပုပ်စုပ်ကန်တွေ သေချာ စနစ်တကျ ဆောက်ဖို့ပေါ့။ စစ်ဆေးထားတာ ရှိတယ်။ အခုချိန်ထိတော့ လိုက်နာမှု မရှိသေးဘူး။ တိုးတက်မှု တစ်ခုကတော့ အချဉ်ရေတွေကို ကားနဲ့စုပ်ပြီး အပြင်ကို ပို့တာပဲရှိတယ်။ စည်းကမ်းချက် ခြောက်ချက်မှာ ဒီတစ်ချက်ပဲ လိုက်နာတာ ဆိုရင်တော့ တရားစွဲမယ့်အဆင့် ရောက်ပါပြီ” ဟု ၎င်းက ဆက်လက်ပြောဆိုသည်။
အဆိုပါ မုန့်တီလုပ်ငန်းများသည် လွန်ခဲ့သည့်နှစ် ၆၀ ဝန်းကျင်ကတည်းက ရပ်ကွက်တွင်း ပြုလုပ်နေခြင်း ဖြစ်ကြောင်းနှင့် ယခင်ကပြုလုပ်သည့် မုန့်တီလုပ်ငန်း များသည် တစ်နိုင်တစ်ပိုင် ပြုလုပ်ကြသော်လည်း ယခုအခါ လုပ်ငန်းကြီးထွား လာခြင်းကြောင့် အနံ့ဆိုး ထွက်မှုသည်လည်း ယခင်ထက် ဆိုးရွားလာကြောင်း ဘင်လိုင်ဒေသခံများက ပြောဆိုကြသည်။
သထုံခရိုင် ကျန်းမာရေး ဦးစီးဌာန၏ စစ်ဆေးချက်များတွင်လည်း ယင်းလုပ်ငန်းမှ ရေဆိုးများသည် ကျန်းမာရေး ထိခိုက်နိုင်ကြောင်း ဖော်ပြထားခြင်းကြောင့် ညွှန်ကြားထားသော သတ်မှတ် စည်းကမ်းချက်များကို လိုက်နာခြင်း မရှိသည့် မုန့်တီလုပ်ငန်းများကို ၂၀၁၄ ခုနှစ် မေလ ၂၂ ရက်နေ့ နောက်ဆုံးထား ပိတ်သိမ်းပေးရန် အသိပေး ကြေညာထားပြီး ဖြစ်ကြောင်းနှင့် ယင်းစည်းကမ်းချက်များကို လိုက်နာခြင်း မရှိပါက စည်ပင်သာယာ ဥပဒေ အန္တရာယ် ရှိသည့်လုပ်ငန်း လုပ်ကိုင်ခြင်း ပုဒ်မ ၈၁ ဖြင့် အရေးယူမည် ဖြစ်ကြောင်း သထုံမြို့နယ် စည်ပင်သာယာရေး အထောက်အကူပြု ကော်မတီက ကြေညာချက် ထုတ်ပြန်ထားသည်။
from The Voice Weekly's Facebook Wall http://ift.tt/1tweseY
Comments
Post a Comment