ဗီယက်နမ်တွင် တရုတ်ဆန့်ကျင်ရေး ဆန္ဒပြမှု များကြောင့် လူ ၂၀ ကျော်သေဆုံး
ဟနွိုင်း၊ မေ ၁၅
တရုတ်ဆန့်ကျင်ရေး ဆန္ဒပြသူများက ဗီယက်နမ်နိုင်ငံ တောင်ပိုင်းရှိ စက်မှုဇုန်တွင် တရုတ်စက်ရုံများကို မီးရှို့တိုက်ခိုက်မှု ဖြစ်ပွားပြီးနောက် ယခုအခါ ဗီယက်နမ် အလယ်ပိုင်းရှိ သံမဏိစက်ရုံကို တိုက်ခိုက်ခဲ့ခြင်းကြောင့် လူ ၂၀ ကျော် သေဆုံးသွားကြောင်း Reuters သတင်းတွင် ဖော်ပြထားသည်။
ဗီယက်နမ်အလယ်ပိုင်း ဟာတင်း ပြည်နယ်တွင် တရုတ်ဆန့်ကျင်ရေး ဆန္ဒပြသူများက တရုတ်လူမျိုး ပိုင်သည့် စက်ရုံဟုယူဆသည့် သံမဏိစက်ရုံကို တိုက်ခိုက်ခဲ့ခြင်း ဖြစ်ပြီး ဟာတင်း ပြည်နယ်ဆေးရုံသို့ လူနာ ၁၀၀ ခန့် တင်ပို့ကုသခံရပြီး အများစုမှာ တရုတ်လူမျိုးများ ဖြစ်ကြောင်း၊ ယနေ့ နံနက်ပိုင်းတွင်လည်း လူနာများ ထပ်မံရောက်ရှိလာကြောင်း ဆေးရုံတာဝန်ကျ ဆရာဝန်တစ်ဦးက ရိုက်တာ သတင်းဌာနကို တယ်လီဖုန်းဖြင့် ပြောကြားသည်။
ဗီယက်နမ်တို့၏ ဆန္ဒပြတိုက်ခိုက်မှု များကြောင့် ဗီယက်နမ်ရှိ တရုတ်လူမျိုးများမှာ ဗီယက်နမ်မှ လေယာဉ်ဖြင့် အိမ်နီးချင်း ကမ္ဘောဒီးယားနိုင်ငံသို့ ထွက်ပြေးလျက် ရှိသည်။
ဗီယက်နမ် ဆန္ဒပြသူများ ဖျက်ဆီးခဲ့သည့် ဟာတင်းပြည်နယ်ရှိ သံမဏိစက်ရုံသည် အမှန်တကယ်တွင် လက်ရှိ ဗီယက်နမ်နှင့် ရေပိုင်နက် အငြင်းပွားမှု ဖြစ်ပွားနေသော တရုတ်ပြည်မကြီးမှ ပိုင်ဆိုင်ခြင်း မဟုတ်ဘဲ ထိုင်ဝမ်ရှိ ဖော်မိုဆာ ပလတ်စတတ် လုပ်ငန်းစု ကုမ္ပဏီမှ ပိုင်ဆိုင်သော စက်ရုံဖြစ်သည်။
အဆိုပါ သံမဏိစက်ရုံမှာ ၂၀၂၀ ပြည့်နှစ်တွင် ဆောက်လုပ် ပြီးစီးမည် ဖြစ်ပြီး ဆောက်လုပ် ပြီးစီးပါက အရှေ့တောင် အာရှတွင် အကြီးဆုံး သံမဏိစက်ရုံ ဖြစ်လာမည်ဖြစ်ကာ စက်ရုံမှာ ဆိပ်ကမ်းတစ်ခုနှင့် လျှပ်စစ်ဓာတ်အား မီဂါဝပ် ၂၁၅၀ ထွက်မည့် ဓာတ်အားပေး စက်ရုံလည်း ပါရှိမည် ဖြစ်သည်။
အဆိုပါ သံမဏိစက်ရုံမှာ အမေရိကန် ဒေါ်လာ ၂၀ ဘီလီယံခန့် ကုန်ကျနိုင်ကြောင်း ဗီယက်နမ် မီဒီယာများတွင် ဖော်ပြကြသည်။
တောင်တရုတ် ပင်လယ်တွင်းရှိ ပိုင်နက် အငြင်းပွားနေသော ပါဆယ်ကျွန်းအနီးတွင် တရုတ်က ရေနံတူးဖော်ရန် ကြိုးပမ်းခဲ့ပြီးနောက် ဗီယက်နမ်နှင့် တရုတ်အကြား တင်းမာမှုမှာ အလွန်ပြင်းထန် လာခဲ့ပြီး ဗီယက်နမ်နိုင်ငံတွင် တရုတ်ဆန့်ကျင်ရေး ဆန္ဒပြပွဲများ ပေါ်ပေါက်လာခဲ့သည်။
ထို့ပြင် အင်္ဂါနေ့က ဗီယက်နမ် တောင်ပိုင်း ဘင်ဒေါင်းနှင့် ဒေါင်နိုင် ပြည်နယ်များရှိ စက်မှုဇုန် များတွင်လည်း တရုတ်လူမျိုးပိုင် စက်ရုံများကို ဗီယက်နမ် ဆန္ဒပြသူများက မီးရှို့ခြင်း၊ ဖျက်ဆီးခြင်းများ ပြုလုပ်ခဲ့ကြသည်။
ယင်းသို့ မီးရှို့ဖျက်ဆီးသည့် ဆန္ဒပြမှုကြောင့် ဘင်ဒေါင်းပြည်နယ် တစ်ခုတည်းတွင်ပင် ကုမ္ပဏီ ၄၆၀ က ၎င်းတို့၏ စက်ရုံ ထိခိုက်ပျက်စီး ခဲ့ရကြောင်း တိုင်ကြားခဲ့သည်ဟု ဗီယက်နမ် ရဲတပ်ဖွဲ့က ပြောကြားကြောင်း ဗီယက်နမ် သတင်းစာများတွင် ဖော်ပြထားသည်။
ထို့ပြင် အကြမ်းဖက် ဆန္ဒပြသူများ၏ ကျောက်ခဲ၊ အုတ်ခဲများဖြင့် ပစ်ခတ် တိုက်ခိုက်မှုကြောင့် ရဲတပ်ဖွဲ့ဝင် ၄၀ ခန့် ဒဏ်ရာရရှိသွားကြောင်း ဗီယက်နမ် အစိုးရပိုင် သတင်းစာ Thanh Nien တွင် ဖော်ပြထားသည်။
ဆန္ဒပြသူများကို သွေးထိုးမြှောက်ပင့်မှုနှင့် ဆူပူဆန္ဒပြနေစဉ် ခိုးဆိုး လုယက်မှုကြောင့် လူ ၆၀၀ ခန့်ကိုလည်း ဖမ်းဆီးထားကြောင်း ဘင်ဒေါင်းပြည်နယ် ရဲချုပ် ဗိုသန်ဒက်၏ ပြောကြားချက်ကို ကိုးကား၍ အဆိုပါ သတင်းစာက ဖော်ပြသည်။
from The Voice Weekly's Facebook Wall http://ift.tt/1qHnFoH
Comments
Post a Comment