အင်တာနက်မြန်နှုန်း ကျဆင်းခြင်းကြောင့် လုပ်ငန်းအချို့ ထိခိုက် ရန်ကုန်၊ မေ ၂၇ မြန...

အင်တာနက်မြန်နှုန်း ကျဆင်းခြင်းကြောင့် လုပ်ငန်းအချို့ ထိခိုက်



ရန်ကုန်၊ မေ ၂၇



မြန်မာ့ဆက်သွယ်ရေး လုပ်ငန်းနှင့် ပုဂ္ဂလိက ကုမ္ပဏီများက ဝန်ဆောင်မှု ပေးနေသည့် အင်တာနက်လိုင်းများ၏ အမြန်နှုန်းများ ယခုလအတွင်း တောက်လျှောက် ကျဆင်းနေခြင်းကြောင့် အင်တာနက်လိုင်းကို မှီတည်၍ လုပ်ငန်း လုပ်ကိုင်သူအချို့ ထိခိုက်မှု ကြုံတွေ့ရကြောင်း ယင်းလုပ်ငန်းရှင်များထံမှ သိရသည်။



၎င်းတို့ ကုမ္ပဏီမှာ အိုင်တီကုမ္ပဏီ ဖြစ်သည့်အတွက် အင်တာနက်လိုင်း ပြတ်တောက်ပါက လုပ်ငန်းနှောင့်နှေးကာ ဖောက်သည်များ၏ အပြစ်တင်မှုများ ရင်ဆိုင်ရကြောင်း Software ကုမ္ပဏီ တစ်ခုဖြစ်သည့် Bagan Innovation Technology မှ အမှုဆောင် ဈေးကွက် ရှာဖွေရေးအရာရှိ ဦးဝင်းထွဋ်ဟန်က ပြောကြားသည်။



မြန်မာ့ဆက်သွယ်ရေးလုပ်ငန်း (MPT) အပါအဝင် အင်တာနက် ဝန်ဆောင်မှု ပေးနေသည့် ပုဂ္ဂလိက ကုမ္ပဏီ များကိုလည်း အင်တာနက် မြန်နှုန်း ကျဆင်းမှုကြောင့် လူမှုကွန်ရက်ပေါ်တွင် ဝေဖန်အပြစ်တင်မှုများ ဖြစ်ပေါ်လျက် ရှိသည်။



“လိုင်းက ဒီရက်ပိုင်း တော်တော်လေးကျတယ်။ တက်လိုက်ကျလိုက်နဲ့။ အဓိက ဖြစ်တာကတော့ MPT လိုင်းကပေါ့” ဟု Rain အင်တာနက်ဆိုင် လုပ်ငန်းရှင် အမျိုးသားက ဆိုသည်။



ယင်းကိစ္စနှင့် ပတ်သက်၍ Red Link ကုမ္ပဏီမှ လက်ထောက် အထွေထွေမန်နေဂျာ ဦးမျိုးမြင့်ညွန့်က အင်တာနက်လိုင်း နှေးကွေးမှု ပြဿနာကို ဖြေရှင်းရန် Red Link ကုမ္ပဏီအနေနှင့် Main Bandwidth များ တိုးချဲ့ရန် စီစဉ်ထားကြောင်း ပြောကြားသည်။



“Red Link အသုံးပြုသူတွေ များလာတော့ လိုင်းတွေ ထပ်ချဲ့ရမယ်။ ဒါပေမဲ့ International ထွက်တဲ့လိုင်းမှာ Bandwidth လိုအပ်ချက်တွေ ရှိနေတယ်” ဟု ၎င်းကပြောဆိုသည်။



အင်တာနက်လိုင်း အတက်အကျ မမှန်မှုများကြောင့် လုပ်ငန်း လုပ်ကိုင်ရာတွင် အနှောင့်အယှက် ဖြစ်ကြောင်း လသာမြို့နယ် အတွင်းရှိ RH မိုဘိုင်းလ် ဖုန်းအရောင်းဆိုင်မှ ဆော့ဖ်ဝဲလ် ကျွမ်းကျင်သူ ဦးနိုနိုက ပြောကြားသည်။



“ကျွန်တော် 2 Mbps ယူပြီးတော့ သုံးတယ်ဗျာ။ တကယ် Bandwidth ကကျတော့ ညပိုင်းလောက်မှ 1Mbps လောက်တက်တယ်။ နေ့ခင်းပိုင်း လိုဟာ မျိုးဆိုရင် 0.22 တို့ 0.44 တို့ ဖြစ်နေတယ်။ အင်တာနက်ကို အတက်အကျ ဆိုတာက အမြဲတမ်းကြီး တက်နေရမယ် မဆိုလိုဘူး။ ဒါပေမဲ့ ဒါမျိုးကိုတော့ လက်မခံနိုင်ဘူး။ အဲဒီ Service ရမယ်ဆိုပြီး ရောင်းထားပြီတော့ မပေးနိုင်တဲ့သူတွေကို တရားစွဲပြီးတော့ မှတ်လောက် သားလောက်အောင်ကို လုပ်သင့်တယ်” ဟု Myanmar Cable Network မှ အုပ်ချုပ်မှု ဒါရိုက်တာ ဦးအံ့ဖုန်းမြတ်က ပြောဆိုသည်။



ထို့အတူ မြန်မာ့ဆက်သွယ်ရေး လုပ်ငန်း၏ မိုဘိုင်းလ်ဖုန်း အင်တာနက် ဝန်ဆောင်မှု အမြန်နှုန်းမှာလည်း ၂၀၁၃ ခုနှစ် နိုဝင်ဘာလ ဝန်းကျင်မှစတင်၍ နှေးကွေးနေခြင်း ဖြစ်ပြီး ယခုအခါ သိသိသာသာ ကျဆင်းကြောင်း မိုဘိုင်းလ်ဖုန်းဖြင့် အင်တာနက် အသုံးပြုပြုသူများက ဆိုသည်။



(LC ၊ အောင်ကိုမြင့်)







from The Voice Weekly's Facebook Wall http://ift.tt/1phOZs7