မြန်မာ-အင်ဒိုနီးရှား ဗီဇာ ကင်းလွတ်ခွင့် ယခုလအတွင်း စတင်မည်
နေပြည်တော်၊ မေ ၁၀
အာဆီယံဒေသတွင်း နိုင်ငံများ ပေါင်းစည်းဗီဇာ (Single Visa) အစီအစဉ် မစတင်မီ မြန်မာနှင့် အင်ဒိုနီးရှား နှစ်နိုင်ငံ ပြည်ဝင်ခွင့် ဗီဇာ ကင်းလွတ်ခွင့်ကို ယခုလ (မေလ) အတွင်း စတင်နိုင်မည် ဖြစ်ကြောင်း နိုင်ငံတော်သမ္မတ ပြောရေးဆိုခွင့်ရှိသူ ဦးရဲထွဋ်က The Voice သို့ ပြောကြားသည်။
ပြည်ဝင်ခွင့်ဗီဇာ ကင်းလွတ်ခွင့်ကို အင်ဒိုနီးရှားနိုင်ငံဘက်က ယခု သီတင်းပတ် အတွင်း စတင်ရန် လျာထားသော်လည်း မြန်မာနိုင်ငံဘက်ကမူ မေလအတွင်း စတင်ရန် စီစဉ်နေကြောင်း ၎င်းက ဆက်လက် ပြောကြားသည်။
“ကျွန်တော်တို့ နိုင်ငံရဲ့ထုံးစံအရ ဒါက ပြီးသွားရင် ဝန်ကြီးဌာနတွေ ချပြီးတော့ ဆုံးဖြတ်ရတယ်” ဟု ဦးရဲထွဋ်က ဆိုသည်။
အင်ဒိုနီးရှားနှင့် မြန်မာနိုင်ငံတို့ကြား ဗီဇာကင်းလွတ်ခွင့် သဘောတူညီမှု စာချုပ်ကို မေလ ၁၀ ရက်နေ့ အာဆီယံ ထိပ်သီး အစည်းအဝေးနှင့် ဆက်စပ် အစည်းအဝေးများ ကျင်းပရာ နေပြည်တော်ရှိ MICC ခန်းမတွင် လက်မှတ်ရေးထိုးခဲ့ကြသည်။
အင်ဒိုနီးရှား ခရီးသွားလာရေးနှင့် စီးပွားရေးအကြံပေး ဝန်ကြီးက ယခုနှစ်ဆန်းပိုင်းကတည်းက မြန်မာနှင့် ဗီဇာကင်းလွတ် အစီအစဉ်ကို အပြီးသတ် ရေးဆွဲထားကြောင်း ထုတ်ဖော် ပြောကြားထားသည်။
ယင်းအပြင် အာဆီယံ ပေါင်းစည်းရေး ဗီဇာအတွက်မူ မြန်မာအာဆီယံ ဥက္ကဋ္ဌ သက်တမ်း ၂၀၁၄ ခုနှစ်အတွင်း အကောင်အထည်ဖော်ရန် အခက်အခဲများ ရှိနေသေးကြောင်း ၎င်းက ဆက်လက် ပြောကြားသည်။
သာမန် နိုင်ငံကူးလက်မှတ် ကိုင်ဆောင်ထားသော မြန်မာနိုင်ငံသားများ အတွက် အင်ဒိုနီးရှားနိုင်ငံ ဘာလီလေဆိပ် ဆိုက်ရောက်ဗီဇာ ကင်းလွတ်ခွင့်ကို ၂၀၁၃ ခုနှစ် ဝန်းကျင်ကတည်းက ခွင့်ပြုထားပြီး ဖြစ်သည်။
မြန်မာနိုင်ငံသည် ဘရူနိုင်း၊ လာအို၊ ကမ္ဘောဒီးယား၊ ဖိလစ်ပိုင်၊ ဗီယက်နမ် နိုင်ငံတို့နှင့် ဗီဇာ ကင်းလွတ်ခွင့် သဘောတူ စာချုပ်များ ရေးထိုးထားပြီး မလေးရှားနှင့် စင်ကာပူ နိုင်ငံတို့နှင့်လည်း ဆက်လက် ဆွေးနွေးနေဆဲ ရှိသည်။
from The Voice Weekly's Facebook Wall http://ift.tt/1jeHOsc
Comments
Post a Comment