လုပ်အားခ တိုးမြှင့်ပေးရန်မှအပ Asia Rose အထည်ချုပ်လုပ်သား ၄၀၀ ကျော် ဆန္ဒပြတောင်းဆိုမှု ပြေလည်မှုရ
ရန်ကုန်၊ မေ ၂၄
ရန်ကုန်တိုင်းဒေသကြီး လှိုင်သာယာ စက်မှုဇုန်အမှတ် ၂ ရှိ Asia Rose အထည်ချုပ်လုပ်သား ၄၀၀ ကျော် ဆန္ဒပြ တောင်းဆိုနေသော အချက် ၁၃ ချက်တွင် လုပ်အားခ တိုးမြှင့်ပေးရန်မှအပ အခြားအချက်များ ပြေလည်မှု ရရှိခဲ့ကြောင်း ရန်ကုန်တိုင်းဒေသကြီး အစိုးရအဖွဲ့မှ ရခိုင်တိုင်းရင်းသားဝန်ကြီး ဦးဇော်အေးမောင်က The Voice သို့ ပြောကြားသည်။
တောင်းဆိုသော အချက် ၁၃ ချက်အနက် တစ်နေ့လုပ်ခ တိုးမြှင့်ပေးရန်မှ လွဲ၍ ကျန်အချက်များကို အလုပ်ရှင်က မေလ ၂၄ ရက်နေ့တွင် သဘောတူညီ ပေးခဲ့ကြောင်း ဝင်ရောက် ညှိနှိုင်းပေးခဲ့သည့် ရန်ကုန်တိုင်းဒေသကြီး အစိုးရအဖွဲ့မှ ရခိုင်တိုင်းရင်းသားဝန်ကြီး ဦးဇော်အေးမောင်က The Voice သို့ ပြောကြားသည်။
အလုပ်ရှင်နှင့် ညှိနှိုင်းခြင်းကို အဆိုပါ စက်ရုံတွင် ပြုလုပ်ခဲ့ခြင်း ဖြစ်ပြီး လုပ်ငန်းခွင် ဘေးအန္တရာယ် ကင်းရှင်းစေရန် အလုပ်ရှင်က ဆောင်ရွက်ပေးရန်၊ စက်ရုံအတွင်း မန်နေဂျာ ပြောင်းလဲပါက လုပ်သားများကို အသိပေးရန်နှင့် လုပ်ငန်းခွင် စည်းကမ်းများကို မပြောင်းလဲရန် စသည့် အချက် ၁၂ ချက်ကို သဘောတူညီခဲ့ခြင်း ဖြစ်ပြီး တစ်နေ့ လုပ်ခ ၄၀၀ ကျပ်စီ ထပ်ဆောင်း တိုးမြှင့်ပေးရန်နှင့် ဆုကြေးကို ရှားပါးစရိတ်အဖြစ် ပြောင်းလဲကာ ၁၀၀၀၀ ကျပ် တိုးမြှင့်ပေးရန် အချက်ကိုမူ ဒါရိုက်တာ အစည်းအဝေးလုပ်ပြီး ၂၇ ရက်နေ့ နေ့လယ် ၂ နာရီတွင် အလုပ်ရှင်၊ လုပ်သားနှင့် မြို့နယ် ညှိနှိုင်းဖြန်ဖြေရေး အဖွဲ့ဝင်များနှင့် ထပ်မံ ညှိနှိုင်းဦးမည် ဖြစ်ကြောင်း ထပ်မံ ပြောကြားသည်။
ယခု ဆွေးနွေးမှု၏ ရလဒ် ကောင်းသည်ဟု ထင်မြင်မိကြောင်း၊ အဓိကအချက်များ ကျန်နေသေးသဖြင့် စက်ရုံရှေ့ ဆန္ဒထုတ်ဖော်မှုကိုလည်း ပြေလည်ပြီးမှသာ ရုပ်သိမ်းမည် ဖြစ်ကြောင်း Asia Rose အထည်ချုပ်စက်ရုံ အခြေခံအလုပ်သမားအဖွဲ့က အတွင်းရေးမှူး ဒေါ်သန္တာမိုးက ပြောကြားသည်။
ယခုကဲ့သို့ လခ တိုးပေးရန်မှာ စက်ရုံအနေနှင့် ကုမ္မဏီနှင့် လုပ်ရခြင်း ဖြစ်ကြောင်း၊ တစ်ဦးတည်း ဆုံးဖြတ်ရုံနှင့် မပြီးဘဲ အားလုံးနှင့် ပြန်ပြီး ဆွေးနွေးရဦးမည် ဖြစ်ကြောင်း Asia Rose အထည်ချုပ်စက်ရုံမှ ဒါရိုက်တာ ဦးသန်းထွဋ်က ပြောကြားသည်။
မေလ ၂ ရက်နေ့တွင် အထည်ချုပ် လုပ်သားများက အချက် ၁၃ ချက်ကို စက်ရုံဘက်သို့ စာပေးပို့ခဲ့ခြင်း ဖြစ်ပြီး မေလ ၁၄ ရက်နေ့မှ စတင်ကာ စက်ရုံ တံခါးဝကို ပိတ်ဆို့ ဆန္ဒထုတ်ဖော်ခဲ့ခြင်း ဖြစ်သည်။
from The Voice Weekly's Facebook Wall http://ift.tt/1r4Zjp2
Comments
Post a Comment