(ဧပြီလ ၂၇ ရက်နေ့ထုတ် The Voice နေ့စဉ်သတင်းစာ မျက်နှာဖုံးနှင့် Editor's Word)
ဘာ့ကြောင့် သင်္ကြန်မှာ လွန်ကဲကြတာလဲ
ဒီနှစ် သင်္ကြန်နဲ့ ပတ်သက်ပြီး အွန်လိုင်း လူမှုရေးကွန်ရက်ပေါ်မှာ ပြောကြ၊ ဆိုကြ၊ ဝေဖန် ဆွေးနွေးကြတာတွေ အတော်များတယ်။ သင်္ကြန်ဆိုတာ ကတော့ သိတဲ့အတိုင်း အရွယ်သုံးပါးစလုံး လွတ်လွတ်လပ်လပ် ပျော်ပျော်ပါးပါး ဆင်နွှဲကြတဲ့ပွဲကိုး။ တစ်နှစ်လုံး တကုပ်ကုပ် အလုပ်လုပ်လာခဲ့ကြတော့ သင်္ကြန်တွင်း သုံးလေးရက်ကလေးမှာ စိတ်ရှိလက်ရှိ ပျော်ကြတာ ဓမ္မတာပဲလေ။
ထုံးစံအတိုင်း ဒီဘက် အနှစ်နှစ်ဆယ်မှာ မြန်မာ့ရိုးရာ သင်္ကြန်ရဲ့ သရုပ်သကန်တွေ တဖြည်းဖြည်း ပါးလျားလာပြီး ခေတ်ဆန်လွန်း (တချို့ကတော့ သရုပ်ပျက်လို့ ပြောကြတယ်) တဲ့ ဝတ်စားဆင်ယင်မှုတွေ တင်းကြမ်း ပြည့်လာတယ်လို့ ပြောကြတာလည်း ရှိတယ်။ ပြောတဲ့အတိုင်း အလွန်အကျွံ ဝတ်စားဆင်ယင်မှု၊ လိင်ပိုင်းဆိုင်ရာ အသားပေးဖျော်ဖြေ ကပြမှု တချို့ရှိတာ မငြင်းနိုင်ဘူး။ တစ်ဖက်မှာလည်း တရားစခန်းဝင်၊ ဥပုသ်စောင့်၊ စတုဒိသာကျွေး၊ ဘေးမဲ့လွှတ်ပြီး ကောင်းမှုကုသိုလ် ယူတဲ့သူတွေလည်း အများကြီး။
သင်္ကြန်မှာတော့ သူ့အတိုင်းအတာနဲ့သူ လွတ်လပ်ပျော်ရွှင်တာ ပြဿနာ မရှိပေမယ့် အများအမြင် မတင့်တယ်လောက်အောင် စည်းလွတ်ဝါးလွတ် ဖြစ်နေတာတွေကိုတော့ သတိထားဆင်ခြင်ဖို့ လိုမယ်။ သင်္ကြန်ကို ဘီယာ၊ အရက် ပွဲတော်လို ဖြစ်အောင် သရုပ်ဖော်နေတာမျိုး၊ သင်္ကြန်မဏ္ဍပ်တွေ အနားမှာ နေရာတိုင်းနီးပါးမှာ အရက်၊ ဘီယာ ထင်သလို ဝယ်လို့ ရနေတာမျိုးက သင်္ကြန်အလှကို ဖျက်ဆီးနေတာပေါ့။ ကိုရီးယား ကားတွေထဲက ကောင်းတဲ့အချက်တွေ မယူဘဲ မကောင်းတဲ့ ဆိုဂျူသောက်တာကို အတုယူပြီး သင်္ကြန်တွင်းမှာ မူးနေတဲ့ မိန်းကလေးငယ်တွေ အတွေ့ရ များလာတာကလည်း ပြောစရာတစ်ခု ဖြစ်သွားတယ်။
တကယ်တော့ သင်္ကြန်တွင်းမှာ အတော်များများ စည်းလွတ်ဝါးလွတ် ဖြစ်တာ သိပ်အပြစ်ပြောလို့တော့ မရဘူး။ ဖိနှိပ်ကန့်သတ်မှုပေါင်း များစွာ အောက်မှာ နေလာခဲ့ကြတဲ့ မြန်မာတွေအတွက် သင်္ကြန်က တစ်ခုတည်းသော စိတ်ထွက်ပေါက်ပေးစရာ အခိုက်အတန့်ကလေး။ သိတဲ့အတိုင်း ကုန်ခဲ့တဲ့ ကာလတွေ တစ်လျှောက်လုံး အမိန့်တွေ၊ အာဏာတွေ၊ ခြိမ်းခြောက်မှုတွေနဲ့ ကျွန်တော်တို့ မလုပ်ချင်တာတွေချည်း လုပ်နေခဲ့ရတာတွေကို ကျိတ်မှိတ် မျိုသိပ်ပြီး နေတတ်အောင် ကြိုးစား နေလာခဲ့ကြရတဲ့အတွက် သင်္ကြန်ရောက်တိုင်း အဲဒါတွေ အားလုံးကို ထွက်ပေါက်ပေးဖြစ်ကြတယ်။ စိတ်ကို ထွက်ပေါက် ပေးတဲ့အခါ မျိုသိပ်ချက်၊ ခံစားချက်များတဲ့ သူတွေမှာတော့ ပေါက်ကွဲမှုသံစဉ် ပြင်းတတ်တာပေါ့။ တချို့ကျ ကိုယ်နားလည်သလို ထွက်ပေါက်ပေးကြတော့ မူးတာ၊ ကွဲတာ၊ ဖော်တာ၊ ချွတ်တာတွေ ဖြစ်ကုန်ရော။ ပြောရရင် ဒါလည်း အကြောင်း၊ အကျိုးသဘောပဲပေါ့။
နောင်မှာတော့ ဒါတွေက သူ့အလိုလို ထိန်းသွားလိမ့်မယ်။ ဒီမိုကရေစီနဲ့ ကျင့်သားရသွားရင်၊ တစ်ပါးသူကို မထိခိုက်စေတဲ့ လွတ်လပ်မှု လူ့တန်ဖိုးကို အလေးအနက် နားလည်လာရင်၊ ကျွန်တော်တို့ ကိုယ်စွမ်းဉာဏ်စွမ်း ရှိသလောက် ကြီးပွားတိုးတက်ခွင့် ဖန်တီးပေးတဲ့ ပတ်ဝန်းကျင် တစ်နည်းအားဖြင့် ဒီမိုကရက်တစ် လက်တွေ့ကျင့်စဉ်တွေကို ထဲထဲဝင်ဝင် ယဉ်းပါးလာရင် သူ့အလိုလို ပြန်ထိန်းသွားမယ်။ အခုအချိန်မှာတော့ အနှစ်နှစ်ဆယ်လုံးလုံး ထိန်းလာတဲ့ ခံစားချက် အရှိန် မသေသေးခင် အဝေဖန် အပြစ်တင် မစောကြဖို့ မေတ္တာရပ်ခံချင်တယ်။
အယ်ဒီတာ (၂၆-၄-၂၀၁၄)
from The Voice Weekly's Facebook Wall http://ift.tt/1nwC6JS
Comments
Post a Comment