#emg_opinions
တူနဲ့ပေ
(Written by: ဦးငွေသိန်း (ကုမ္ပဏီလမ်းညွှန်))
စာရေးသူတို့ မြန်မာစကားမှာ တူဖြစ်လျှင်နှံ၊ ပေဖြစ်လျှင်ခံဆိုတာ ရှိတယ်။ အတုံ့အလှည့်သဘောကို ညွှန်းဆိုတာ ထင်တယ်။ လူ့ဘ၀က အတက်အကျဆိုတာ ရှိတတ်ကြတယ်။ ဒါကိုရည်ညွှန်းပြီး မိမိက အပေါ်နေရာမှာရောက်ရင် တူလို့သဘောထားပြီး အောက်မှာရောက်နေတဲ့ပေကို နာနာထုတတ်ကြတဲ့ သဘောဖြစ်တယ်။ စာရေးသူတို့နိုင်ငံမှာ ပြည်သူလူထုက အမြဲလို ပေဖြစ်နေခဲ့ကြရတယ်။ နှစ်ပေါင်း ၅၀ ကျော် ခါးစည်းပြီး အထက်နေရာ အသီးသီးမှာ ရောက်နေသူတွေရဲ့ အထုအထောင်း အရိုက်အနှက်တွေ ခံကြရတယ်။
ဟိုယခင်က ဌာနတစ်ခုရဲ့ ၀န်ကြီးဖြစ်ခဲ့သူရဲ့ စကားကို ပြန်ပြောချင်တယ်။ သူက မင်းတို့ပေဖြစ်ရင် ခံထားကြပေါ့ကွာ၊ တူဖြစ်ရင်တော့ ဖြည်းဖြည်းထုပေါ့တဲ့။ ထိုသူက ဘယ်လိုအဓိပ္ပာယ် သဘောတရားနဲ့ ပြောခဲ့တယ်ဆိုတာ အခုမှ သဘောပေါက်တယ်။ ဟိုယခင်က သူတို့က တူတွေ၊ အခုတော့ သူတို့က တူနေရာကနေ ပေနေရာ ရောက်သွားပြီမို့ ငါတို့ကိုထုရင် ဖြေးဖြေးထုနော်လို့ဆိုတဲ့ သဘောဖြစ်တယ်။
အမှန်တကယ်တမ်းက တူဖြစ်ရင်လည်း ပေကိုနာအောင် ထုစရာမလို။ ပေဖြစ်ရင်လည်း တူရဲ့အထုအထောင်းကို အထုခံစေဖို့ မလိုဘဲ အပေါ်နဲ့အောက်၊ တစ်ဖက်နဲ့တစ်ဖက်၊ အစိုးရနဲ့ပြည်သူ တစ်ဦးနဲ့တစ်ဦး၊ တစ်ဖက်နဲ့တစ်ဖက် အပြန်အလှန် လေးစားသမှုနဲ့ ပွင့်လင်းမြင်သာ ဆက်ဆံနိုင် ဆက်ဆံတတ်ကြရင် ဘယ်လိုအခက်အခဲ ဘယ်လိုပြဿနာပေါင်းစုံနဲ့မျှ မကြုံတွေ့နိုင်ဘဲ အပြန်အလှန် ယုံကြည်မှု တည်ဆောက်နိုင်ကြကာ အများမျှော်လင့်နေတဲ့ ငြိမ်းချမ်းရေးလည်း ထာဝရရရှိလာနိုင်စေမှာ ဖြစ်တယ်။
ဘေးလူတွေ ဘေးနိုင်ငံတွေရဲ့ မြှောက်ပင့်သွေးထိုးမှု၊ မိမိဘက်ကသာ အသာစီးယူလိုတဲ့စိတ်နဲ့ ပေါင်းသင်းဆက်ဆံတတ်သူတွေကို သတိပြုကြရမှာ ဖြစ်တယ်။ အရာရာတိုင်းမှာ မှန်ကန်တဲ့အမြင် မှန်ကန်တဲ့အသိနဲ့ ဆက်ဆံတတ်ကြရမှာ ဖြစ်တယ်။ မိမိကလည်း တူမဖြစ်စေဖို့နဲ့ အခြားသူကိုလည်း ပေမဖြစ်စေဘဲ သာတူညီမျှစိတ်ဓာတ်နဲ့ ဆက်ဆံတတ်ကြရမှာ ဖြစ်တယ်။ Jim Collin ရဲ့ Win-Win Approach ကို နားလည်သဘောပေါက်ပြီး ပေါင်းစည်းလုပ်ဆောင်ကြရမှာ ဖြစ်တယ်။
နိုင်ငံတစ်နိုင်ငံကို အုပ်ချုပ်ရာမှာဖြစ်စေ အဖွဲ့အစည်းတစ်ခုကို စီမံခန့်ခွဲရာမှာဖြစ်စေ လုပ်ဆောင်ကြရမည့် လုပ်ငန်းတာဝန်တွေကို ခွဲဝေပေးတာက မှန်ကန်တဲ့ လုပ်ဆောင်ချက် ဖြစ်တယ်။ ဖက်ဒရယ်စနစ်ဆိုတာ ဒီသဘောတရား ဖြစ်တယ်။ အရာရာကို မိမိကသာ ချုပ်ကိုင်လိုစိတ်က တစ်ကိုယ်ကောင်းဆန်စိတ်ဓာတ် အာဏာရှင်စိတ်ဓာတ် ဖြစ်တယ်။ ဒီမိုကရေစီခေတ်မှာ တစ်ဦးချင်းစီက တာဝန်ကိုယ်စီ ယူကြရပြီး မိမိလုပ်ဆောင်ရတဲ့ လုပ်ငန်းဆောင်တာတွေအတွက် တစ်ဦးချင်းစီကပဲ တာဝန်ယူကြရတာ ဖြစ်တယ်။ ငါ့ကြောင့်မဟုတ်ဘူး။ သူ့ကြောင့်ဆိုပြီး အပြစ်တင်စိတ်နဲ့ တစ်ဖက်ကို လွှဲချတတ်တာက ဒီမိုကရေစီစိတ်ဓာတ် မဟုတ်ပါ။
နိုင်ငံတော်သမ္မတကြီးရဲ့ ကချင်ပြည်နယ် ခရီးစဉ်မှာ တစ်မြေတည်းနေ တစ်ရေတည်းသောက်ကြတဲ့ သူတွေဆိုတဲ့ စကားကို အသုံးပြုသွားတယ်။ ဟိုယခင်နှစ်ပေါင်း ၅၀ က ဒီအတွေး ဒီအမြင်တွေ မရှိခဲ့ကြလို့ နိုင်ငံအတွင်းမှာ ပြည်တွင်းစစ်တွေ နှစ်ပေါင်းများစွာ ဖြစ်ခဲ့တယ်။ တစ်ခါ စစ်ဘေးဒဏ်ကြောင့် မိမိနေအိမ်တွေကို စွန့်ခွာထွက်ပြေးကြသူတွေရဲ့ မြေတွေကို သိမ်းပိုက်တာတွေ ရှိခဲ့ပြန်တယ်။ မလုပ်သင့်တာတွေ လုပ်ခဲ့ကြတာ ဖြစ်တယ်။ ညီရင်းအစ်ကို၊ မောင်ရင်းနှမ စိတ်ဓာတ်နဲ့သာ အသိစိတ်ဓာတ်တွေ ရှိခဲ့ကြရင် ငြိမ်းချမ်းရေးဆိုတာ လွန်ခဲ့သော နှစ် ၅၀ ကတည်းက ရရှိခဲ့ကြမှာဖြစ်တယ်။
စာရေးသူရဲ့ စတော့အခြေခံသင်တန်းမှာ လာရောက်တက်သွားတဲ့ မော်လမြိုင်က ဆရာဝန်တစ်ယောက်က သူနဲ့တစ်ရပ်တည်းနေသူ ရပ်ဆွေရပ်မျိုးဖြစ်နေတဲ့ ၀န်ကြီးတစ်ပါးက သူ့ကို နေပြည်တော်နေရာအနှံ့လိုက်ပြီး မော်တော်ကားနဲ့ပြတယ်။ လမ်းတွေက ကောင်းလည်းကောင်း၊ ကျယ်လည်းကျယ်တယ်။ ညဘက်မှာ လျှပ်စစ်မီးတွေကလည်း ထိန်ထိန်လင်းနေတယ်။ လူနေအိမ်ခြေမရှိတဲ့ နေရာတွေအတော်များများမှာ ထိန်လင်းနေတယ်။ ကားနဲ့ မောင်းသွားရင်းနဲ့ စာရေးသူရဲ့ သင်တန်းသားကို အဲဒီပုဂ္ဂိုလ်က လူမရှိတဲ့ နေရာတွေမှာ မီးတွေလင်းထိန်တယ်။ ဒီလျှပ်စစ်မီးတွေသာ ရန်ကုန်မှာ ထိန်ထိန်လင်းပေးနိုင်ရင် ဘယ်လောက်ကောင်းမလဲလို့ ပြောတယ်။ အခုလိုပြောတာကို စာရေးသူရဲ့ သင်တန်းသားက “၀န်ကြီး ကျွန်တော့်ကိုပဲ ပြောရဲတာ မဟုတ်လား။ အထက်ကို မတင်ပြ၊ မပြောရဲဘူး မဟုတ်လား” လို့ ပြောလိုက်တော့ အဲဒီပုဂ္ဂိုလ်က “အေးဟုတ်တယ်” လို့ ၀န်ခံပြောကြားသွားတယ်လို့ ဆိုတယ်။ ကြောက်စိတ်က သူတို့ကို ဖုံးလွှမ်းနေဆဲဆိုတာ ထင်ရှားနေတယ်။ သည်းခံစိတ်နဲ့ မိမိကိုယ်မိမိ နှိမ်ချတတ်တဲ့စိတ်က လူတစ်ဦးချင်းစီမှာ ရှိနေကြရမယ့် ကောင်းမွန်တဲ့စိတ်ဓာတ် ဖြစ်တယ်။ သို့ပေမဲ့ အချို့သူတွေကလည်း သည်းခံစိတ်ရှိသူတွေကို အပေါ်စီးနဲ့ ဖိနှိပ်ဆက်ဆံတတ်ကြတာ ရှိနေတတ်တယ်။ အကောင်းဆုံးက တူလိုငါက အပေါ်စီးနဲ့ရခိုက် ထုချလိုက်မယ်ဆိုတဲ့ စိတ်ဓာတ်မျိုး မထားသင့်သလို ပေအဖြစ် ရှိနေသူတွေကို ကိုယ်ချင်းစာနာစိတ်ထားပြီး စောင့်ရှောက်တတ်ကြရမှာ ဖြစ်တယ်။ မိဘတွေက မိမိတို့ သားသမီးတွေကို စောင့်ရှောက်ပေးသလို နိုင်ငံအစိုးရတွေကလည်း မိမိတို့ နိုင်ငံသားတွေကို စောင့်ရှောက်ပေးကြရမှာ ဖြစ်တယ်။ တူဖြစ်ရင် နှံလိုက်မယ်ဆိုတဲ့ ယုတ်ညံ့တဲ့စိတ်ဓာတ်တွေ မမွေးကြဘဲ အစဉ်အမြဲ စောင့်ရှောက်ပေးတတ်မှုကနေ ကောင်းမွန်တဲ့ အုပ်ချုပ်စီမံခန့်ခွဲမှု (Good Governance) နဲ့ ကောင်းမွန်သောအစိုးရ (Good Government) ကောင်းမွန်တဲ့ အစိုးရကနေ အကျင့်ပျက် ခြစားမှုကင်းတဲ့ သန့်ရှင်းသောအစိုးရ (Clean Government) ဖြစ်အောင် ကြိုးပမ်းကြရမှာ ဖြစ်တယ်။ ပညာရှင်တွေကို ပညာရှင်တွေလို့ မှန်ကန်တဲ့ စိတ်ဓာတ်အရင်းခံနဲ့ ချဉ်းကပ်ပြီး ပညာရှင်တွေပေးတဲ့ ကောင်းမွန်တဲ့ အကြံဉာဏ်တွေကို နိုင်ငံအတွက် အကျိုးရှိအောင် လုပ်ဆောင်နိုင်ကြရင် ပေလည်းဖြစ်စရာမလို၊ တူလည်းဖြစ်စရာ မလိုတော့ဘဲ တူနဲ့ပေ တစ်သားတည်း ဖြစ်သွားရင် မိမိနိုင်ငံ ကမ္ဘာ့အလယ်မှာ အဆင်းရဲဆုံးနိုင်ငံ အဖြစ်ကနေ ကျွတ်လွတ်ပြီး ကမ္ဘာမှာ မြန်မာဟေ့လို့ ကြွေးကြော်နိုင်စေမှာ ဖြစ်တယ်။
မာန်မာနတွေ၊ အာဃာတတွေ မထားကြဘဲ အတိတ်ကို ခ၀ါချပြီး အနာဂတ်ကောင်းအောင် လုပ်ဆောင်ကြရမှာက မျက်မှောက်ပကတိမှာ ရှိနေသူ မြန်မာနိုင်ငံသားတွေ တစ်ဦးချင်းမှာ တာဝန်ရှိနေတယ်။ ဂျပန်နိုင်ငံ တိုးတက်မှုက လူတစ်ဦးချင်းစီမှာ ကောင်းမွန်မှန်ကန်တဲ့စိတ်ဓာတ် အမြင်ကောင်းတွေ ရှိကြလို့ ဖြစ်တယ်။ ကတုံးပေါ်ထိပ်ကွက်လိုစိတ်၊ မျက်ခုံးမွေးပေါ် စင်္ကြံလျှောက်လိုစိတ် မိမိကသာ အသာစီးယူလိုစိတ်၊ အကောင်းမြင်စိတ် မရှိမှုတွေကို ဖယ်ခွာပစ်ကြပြီး မှန်ကန်တူညီတဲ့ အမြင်ကောင်းတွေနဲ့ အနာဂတ်ကို ပုံဖော်ကြရစေဖို့ပါ။
ပြိုင်တူတွန်းလျှင် ရွေ့နိုင်ပါတယ်။ တစ်နိုင်ငံလုံးမှာ ရှိကြတဲ့ သန်း ၆၀ သော နိုင်ငံသားတွေရဲ့အားနဲ့ မိမိနိုင်ငံ တိုးတက်အောင် လုပ်ဆောင်ကြရမှာ ဖြစ်ကြောင်းပါ။
from Eleven Media Group's Facebook Wall http://ift.tt/1hqJTAq
Comments
Post a Comment