စားသုံးသူဈေးကွက် ဖွံ့ဖြိုးရေးဆိုင်ရာ ဆွေးနွေးမည် ရန်ကုန်၊ ဧပြီ ၁ မြန်မာနိုင်...

စားသုံးသူဈေးကွက် ဖွံ့ဖြိုးရေးဆိုင်ရာ ဆွေးနွေးမည်



ရန်ကုန်၊ ဧပြီ ၁



မြန်မာနိုင်ငံအတွင်းမှ စားသုံးသူဈေးကွက် ဖွံ့ဖြိုးရေးအတွက် ပြည်တွင်း၊ ပြည်ပ စားသောက်ကုန်၊ လျှပ်စစ်ပစ္စည်း၊ မိုဘိုင်းလ်ဖုန်း စသည့် လူသုံးကုန်ပစ္စည်း ထုတ်လုပ်သူများ တက်ရောက် ဆွေးနွေးကြမည့် 2nd Myanmar Consumer Summit ကို လာမည့် ဇွန်လ ၁၈ နှင့် ၁၉ ရက်နေ့တို့တွင် ရန်ကုန်မြို့၌ ကျင်းပသွားမည် ဖြစ်ကြောင်း ပွဲစီစဉ်သည့် စင်ကာပူအခြေစိုက် CMT Events ထံမှ သိရသည်။



ဒုတိယအကြိမ်အဖြစ် ကျင်းပမည့် အဆိုပါပွဲတွင် နိုင်ငံတကာနှင့် ပြည်တွင်းမှ စားသောက်ကုန်များ (FMCG)၊ လူသုံးနှင့် အိမ်သုံးလျှပ်စစ်ပစ္စည်းများ (Electronic)၊ မိုဘိုင်းလ်ဖုန်းနှင့် နည်းပညာ ထုတ်ကုန် ထုတ်လုပ်သူများ (Device Makers) က မြန်မာနိုင်ငံ၏ ဈေးကွက် အခွင့်အလမ်းများကို အသေးစိတ် ဆွေးနွေးကြမည်ဟု ဆိုသည်။



ယင်းအပြင် မြန်မာဈေးကွက်မှ စားသုံးမှုပုံစံများကို နိုင်ငံတကာရှိ အဓိက စားသုံးသူ ဈေးကွက်ကြီးများနှင့် နှိုင်းယှဉ် သုံးသပ်မည် ဖြစ်ပြီး မြန်မာနိုင်ငံအတွင်း စီးပွားရေးပိုင်းဆိုင်ရာ အောင်မြင်မှု အခြေအနေ၊ လက်ရှိ ပြည်တွင်းဈေးကွက် အခြေအနေ၊ စိန်ခေါ်မှုများ၊ မြန်မာစားသုံးသူ ဈေးကွက်များ၏ အလားအလာများကို သုံးသပ်ချက်များဖြင့် တင်ပြသွားမည် ဖြစ်ကြောင်း အဆိုပါ ကုမ္ပဏီထံမှ သိရှိရသည်။



“ဒီနိုင်ငံက ဈေးကွက်ကြီး တစ်ခုပါ။ လူသုံးကုန်နဲ့ စားသောက်ကုန်ပစ္စည်း ဝယ်လိုအားက တိုးတက်လာဖို့ ရှိနေတယ်။ ဥပမာ-ပန်းကန်ဆေး ဆပ်ပြာရည် ဆိုပါတော့။ ပြည်တွင်းမှာ ပန်းကန်ဆေး ဆပ်ပြာရည်သုံးတဲ့ မိသားစု ဘယ်နှစုရှိလဲ။ လူနေမှုအဆင့်အတန်း မြင့်လာတာနဲ့အမျှ လူတွေက ပိုအဆင့်မြင့်တာတွေကို သုံးလာမယ်။ အရင်က မသုံးခဲ့တဲ့ သူတွေက သုံးလာမယ်” ဟု Unilever Myanmar မှ တာဝန်ရှိသူတစ်ဦးက ဆိုသည်။



အခမ်းအနားကို ပြည်တွင်းပြည်ပမှ စားသောက်ကုန် ထုတ်လုပ်သည့် ကုမ္ပဏီများ၊ မီဒီယာနှင့် ကြော်ငြာလုပ်ငန်းများ၊ ဈေးဝယ်စင်တာနှင့် လက်လီစတိုး လုပ်ငန်းများ၊ ဈေးကွက် သုတေသနနှင့် အကြံပေးကုမ္ပဏီများ၊ သိုလှောင်ရုံနှင့် ကုန်စည်သယ်ယူ ပို့ဆောင်ရေး လုပ်ငန်းများ၊ ဖက်ရှင်နှင့် အဝတ်အထည် ထုတ်လုပ်မှု လုပ်ငန်းများ၊ မိုဘိုင်းလ်ဖုန်းနှင့် အိမ်သုံး၊ လူသုံး လျှပ်စစ်ပစ္စည်း လုပ်ငန်းများမှ အကြီးတန်း တာဝန်ရှိသူများနှင့် အစိုးရ အရာရှိများ ဆွေးနွေးသွားမည် ဖြစ်သည်။



ပထမဆုံး Myanmar Consumer Summit ကို ၂၀၁၂ ခုနှစ် မတ်လအတွင်းက ရန်ကုန်မြို့တွင် ကျင်းပခဲ့ပြီး စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန ဒုတိယဝန်ကြီး ဒေါက်တာပွင့်ဆန်း အပါအဝင် နိုင်ငံပေါင်း ၅၀ မှ ဧည့်သည် သုံးထောင်ကျော် တက်ရောက်ခဲ့သည်။

from The Voice Weekly's Facebook Wall http://ift.tt/1mBTjy0