တ.စ.ည ပါတီဥက္ကဋ္ဌ ဒုဗိုလ်ချုပ်ကြီးဟောင်း ဦးထွန်းရီ ကွယ်လွန်

ရန်ကုန်၊ ဧပြီ ၄မြန်မာ့ဆိုရှယ်လစ်လမ်းစဉ် ပါတီ၏ အသွင်ပြောင်း ပါတီဟု သတ်မှတ်ခံရသော တိုင်းရင်းသားစည်းလုံးညီညွတ်ရေး ပါတီ၏ ဥက္ကဋ္ဌ ဒုတိယ ဗိုလ်ချုပ်ကြီးဟောင်း ဦးထွန်းရီသည် ဧပြီလ ၄ ရက်နေ့ နံနက်ပိုင်းတွင် ကွယ်လွန်သွားကြောင်း တ.စ.ည ပါတီ ဗဟိုကော်မတီဝင် ဦးဟန်ရွှေက ပြောကြားသည်။

ဗိုလ်ချုပ်ကြီးဟောင်း ဦးနေဝင်း ဦးဆောင်သည့် မြန်မာ့ဆိုရှယ်လစ်လမ်းစဉ် ပါတီခေတ်တွင် ဒုတိယ တပ်မတော် ကာကွယ်ရေးဦးစီးချုပ် တာဝန် ထမ်းဆောင်ခဲ့သော ဒုတိယဗိုလ်ချုပ်ကြီးဟောင်း ဦးထွန်းရီမှာ အသက် ၈၈ နှစ်ရှိပြီ ဖြစ်ပြီး ကျောက်ကပ်ရောဂါဖြင့် ရန်ကုန်မြို့ ရွှေဂုံတိုင် အထူးကုဆေးရုံတွင် ကုသမှု ခံယူနေရာမှ ကွယ်လွန်သွားခြင်း ဖြစ်ကြောင်း ၎င်းက ရှင်းပြသည်။



“၂ ရက်နေ့အထိ ရုံးတက်တယ်။ ရုံးမှာတောင် စကားတွေပြောပြီး ညနေပိုင်း အိမ်ရောက်မှ ဆေးရုံတင်လိုက်ရတာ” ဟု ဦးဟန်ရွှေက ဆိုသည်။



ကွယ်လွန်သူ ဦးထွန်းရီကို ဧပြီလ ၆ ရက်နေ့ မွန်းတည့် ၁၂ နာရီတွင် ရေဝေးသုသာန်၌ မီးသင်္ဂြိုဟ်မည် ဖြစ်ကြောင်း ၎င်း၏ မိသားစုဝင်များက ပြောဆိုသည်။



မြင်းမူဇာတိ ဦးထွန်းရီသည် ဗမာ့ကာကွယ်ရေးတပ်မတော် (BDA) တပ်သားအဆင့်မှသည် တပ်မတော် ဒုတိယ ကာကွယ်ရေးဦးစီးချုပ် အဆင့်အထိ တာဝန် ထမ်းဆောင်ခဲ့သူ ဖြစ်ပြီး ၁၉၈၅ ခုနှစ်တွင် မြန်မာ့ဆိုရှယ်လစ်လမ်းစဉ် ပါတီသို့ ပြောင်းရွှေ့ တာဝန် ထမ်းဆောင်ခဲ့ကြောင်း မှတ်တမ်းများအရ သိရသည်။



၁၉၈၈ ခုနှစ်တွင် မ.ဆ.လ ပါတီကို အသွင်ပြောင်း ဖွဲ့စည်းခဲ့သော တ.စ.ည ပါတီမှာ ၁၉၉၀ ပြည့်နှစ် ရွေးကောက်ပွဲတွင် အမျိုးသားဒီမိုကရေစီအဖွဲ့ချုပ် (NLD) ပါတီကို အပြတ်အသတ် ရှုံးနိမ့်ခဲ့ပြီး ၂၀၁၀ ရွေးကောက်ပွဲ၌ ထပ်မံဝင်ရောက် ယှဉ်ပြိုင်ရာတွင် ပြည်ထောင်စုအဆင့်နှင့် တိုင်းဒေသကြီး၊ ပြည်နယ်အဆင့် ကိုယ်စားလှယ် ၆၁ ဦး ရွေးချယ်ခံခဲ့ရကြောင်း၊ လက်ရှိ ပါတီဝင် စုစုပေါင်း လေးသိန်းနီးပါး ရှိကြောင်း အဆိုပါ ပါတီထံမှ သိရသည်။

{fcomment}

from Voice http://ift.tt/1q34iRn