မြန်မာ အာဆီယံလူမှုရေး-ယဉ်ကျေးမှု အသိုက်အဝန်း လုပ်ငန်းစဉ်များအတွက် ရန်ပုံငွေလိုအပ်
နေပြည်တော်၊ ဧပြီ ၄
မြန်မာနိုင်ငံက အာဆီယံ လူမှုရေး-ယဉ်ကျေးမှု အသိုက်အဝန်း ကောင်စီဥက္ကဋ္ဌ သက်တမ်းတစ်နှစ်အတွင်း ဆောင်ရွက်မည့် ကဏ္ဍကြီး ခြောက်ခုကို လက်တွေ့ အကောင်အထည် ဖော်ရန် မြန်မာနိုင်ငံ အပါအဝင် ဒေသတွင်း နိုင်ငံများအတွက် ရန်ပုံငွေနှင့် လူသားအရင်းအမြစ် လိုအပ်ချက်များ ရှိနေသေးကြောင်း ကမ္ဘောဒီးယား နိုင်ငံ၏ အာဆီယံ လူမှုယဉ်ကျေးမှုဝန်ကြီး H.E Yuok Ngoy က ပြောကြားသည်။
ဧပြီလ ၄ ရက်နေ့က နေပြည်တော်ရှိ Grand Amara Hotel တွင် ကျင်းပသော အာဆီယံ လူမှုရေး-ယဉ်ကျေးမှု အသိုက်အဝန်း ကောင်စီ (ASCC) ဝန်ကြီးအဆင့် အစည်းအဝေးတွင် ၎င်းက ယင်းသို့ ပြောကြားခြင်း ဖြစ်သည်။
အာဆီယံနိုင်ငံများအကြား လက်တွေ့ ဆောင်ရွက်မည် ဆိုပါက ငွေကြေးပံ့ပိုးမှုအပြင် ကျွမ်းကျင်မှု (Professional) ပိုင်းအတွက် လူသားအရင်းအမြစ် လိုအပ်ချက်များနှင့် ဒေသတွင်းနိုင်ငံ အချင်းချင်း ပူးပေါင်းမှုများ တိုးမြှင့်ရန် အရေးကြီးကြောင်း H.E Yuok Ngoy က ပြောဆိုသည်။
မြန်မာ အာဆီယံဥက္ကဋ္ဌ ရာထူး လက်ခံစဉ် လူသား အရင်းအမြစ် ဖွံ့ဖြိုးရေး၊ လူမှုဖူလုံရေးနှင့် ကာကွယ် စောင့်ရှောက်ရေး၊ လူမှုအခွင့်အရေးနှင့် တရားမျှတရေး၊ သဘာဝ ပတ်ဝန်းကျင် ထိန်းသိမ်း စောင့်ရှောက်ရေး၊ အာဆီယံ ဂုဏ်သိက္ခာ တည်ဆောက်ရေးနှင့် ဖွံ့ဖြိုးမှု ကွာဟချက်များ လျှော့ချရေးကဲ့သို့ ကဏ္ဍကြီး ခြောက်ခုကို ဦးစားပေး ဆောင်ရွက်ရန် လျာထားသည်။
ယင်းကြောင့် ဧပြီလ ၄ ရက်နေ့ အစည်းအဝေးတွင် သဘာဝ ဘေးအန္တရာယ် စီမံခန့်ခွဲရေး လုပ်ငန်းစဉ်များ ချမှတ်ခြင်း၊ ရာသီဥတု ပြောင်းလဲမှုဆိုင်ရာ ပူးတွဲကြေညာချက် ထုတ်ပြန်ရန် အတည်ပြုခြင်းနှင့် ရွှေ့ပြောင်းလုပ်သား အခွင့်အရေး မူဘောင်ကို ၂၀၁၄ ခုနှစ်အတွင်း အပြီးသတ်ရန် သဘောတူညီချက်တို့ ရရှိခြင်းတို့ ဆောင်ရွက်နိုင်ခဲ့ကြောင်း ယဉ်ကျေးမှု ဝန်ကြီးဌာန ပြည်ထောင်စုဝန်ကြီး ဦးအေးမြင့်ကြူက ပြောကြားသည်။
ယင်းအပြင် အာဆီယံနိုင်ငံများ ယဉ်ကျေးမှုနှင့် သတင်းအချက်အလက်များ စုစည်းထားသော Web Portal တည်ထောင်ရန် ယင်းအစည်းအဝေး တက်ရောက်သူများက သဘောတူညီခဲ့ကြပြီး အဆိုပါ အစည်းအဝေး သဘောတူညီချက် အားလုံးကို လာမည့် အာဆီယံ ထိပ်သီး အစည်းအဝေးများတွင် အတည်ပြုရန် စီစဉ်ထားသည်။
from The Voice Weekly's Facebook Wall http://ift.tt/OjC8Fl
Comments
Post a Comment