အမေရိကန် ရေထွက်ကုန်ဈေးကွက် အတွေ့အကြုံများ ပြည်တွင်းလုပ်ငန်းရှင်များသို့ ဝေငှမည်
ရန်ကုန်၊ ဧပြီ ၃
မြန်မာ့ရေထွက်ကုန်များကို အနောက်နိုင်ငံများသို့ တင်ပို့နိုင်ရေးအတွက် အမေရိကန်နိုင်ငံ ရေထွက်ကုန် ဈေးကွက်ကို သွားရောက် လေ့လာခဲ့ကြသည့် အဖွဲ့က ၎င်းတို့၏ အတွေ့အကြုံများကို ပြည်တွင်းရေထွက်ပို့ကုန် လုပ်ငန်းရှင်များသို့ ပြန်လည် ဝေငှမည်ဖြစ်ကြောင်း မြန်မာနိုင်ငံ ငါးလုပ်ငန်းအဖွဲ့ချုပ် အမှုဆောင် ဒုတိယဥက္ကဋ္ဌ ဦးဟန်ထွန်းက ပြောကြားသည်။
မြန်မာနိုင်ငံ ငါးလုပ်ငန်းအဖွဲ့ချုပ်၌ လာမည့် ဧပြီလ ၅ ရက်နေ့တွင် အမေရိကန် ရေထွက်ကုန်ဈေးကွက် အတွေ့အကြုံများကို ပြန်လည် ဝေငှမည်ဖြစ်ကြောင်း ၎င်းကဆိုသည်။
ပြီးခဲ့သည့် မတ်လ တတိယပတ်အတွင်း မြန်မာနိုင်ငံမှ ရေထွက်ပို့ကုန် လုပ်ငန်းရှင်များက အမေရိကန်နိုင်ငံ ဘော်စတွန်မြို့ရှိ Boston Sea Food Show 2014 ပွဲသို့ သွားရောက်၍ အမေရိကန် ရေထွက်ကုန် ဈေးကွက် အခြေအနေကို လေ့လာခဲ့ကြောင်း အဆိုပါ လေ့လာမှုတွင် ပါဝင်ခဲ့သည့် မြန်မာနိုင်ငံ ငါးလုပ်ငန်းအဖွဲ့ချုပ် အထွေထွေအတွင်းရေးမှူး ဦးဝင်းကြိုင်က ဆိုသည်။
“ကျွန်တော်တို့ တွေ့ခဲ့၊ ကြုံခဲ့၊ လေ့လာခဲ့သမျှကို ဒီက ရေထွက်ပို့ကုန် လုပ်ငန်းရှင်တွေကို ပြန်ပြောပြမှာပါ။ အဓိကကတော့ အမေရိကန် ရေထွက်ကုန် ဈေးကွက် အခြေအနေပေါ့” ဟု ၎င်းကဆိုသည်။
အမေရိကန် စီးပွားရေး ပိတ်ဆို့မှု ဖွင့်လှစ်ပြီးနောက်ပိုင်း မြန်မာ့ရေထွက်ကုန် များကို ပထမဆုံးအကြိမ် Boston Sea Food Show 2014 ပွဲသို့ ဝင်ရောက်ပြသခဲ့ပြီး မြန်မာနိုင်ငံမှ ငါးမွေးမြူရေး လုပ်ငန်းရှင်များ၊ ပုစွန်မွေးမြူရေး လုပ်ငန်းရှင်များနှင့် ရေထွက်ပို့ကုန် လုပ်ငန်းရှင်များအပြင် ကဏန်းပျော့ မွေးမြူရေး လုပ်ငန်းရှင်များလည်း သွားရောက် လေ့လာခဲ့ကြောင်း ရေထွက်ပို့ကုန်ပစ္စည်း ထုတ်လုပ်သူများနှင့် ပို့ကုန်လုပ်ငန်းရှင်များ အသင်းထံမှ သိရသည်။
from The Voice Weekly's Facebook Wall http://ift.tt/1mGNI9S
Comments
Post a Comment