အိမ်သုံး ထင်းလောင်စာများ လိုအပ်မှု သစ်တောဦးစီးဌာနများက ဖြန့်ဝေပေးရန် လိုအပ်ဟုဆို...

အိမ်သုံး ထင်းလောင်စာများ လိုအပ်မှု သစ်တောဦးစီးဌာနများက ဖြန့်ဝေပေးရန် လိုအပ်ဟုဆို



ဟင်္သာတ၊ ဧပြီ ၂



ရခိုင်ရိုးမနှင့် နီးစပ်သည့် ဒေသများတွင် မြေပဲနှင့် အခြားသီးနှံများကို စီးပွားရေးအရ ဦးစားပေး စိုက်ပျိုး ထုတ်လုပ်ခဲ့မှုကြောင့် မီးဖိုချောင်အတွက် အိမ်သုံး ထင်းလောင်စာများ လိုအပ်မှုကို သက်ဆိုင်ရာ သစ်တောဦးစီးဌာန များက ထင်းလောင်စာ ဖြန့်ဝေပေးရန် လိုအပ်ကြောင်း ဒေသခံများက ပြောကြားသည်။



ကြံခင်းမြို့နယ်တွင် ကျွန်းသစ်တောများနှင့် နီးစပ်ပြီး တရားမဝင် သစ်ထုတ်လုပ်သူများ၊ မီးသွေး ထုတ်လုပ်သူများ ရှိသော်လည်း ကျေးလက်ဒေသနေ လက်လုပ်လက်စားများမှာ ထင်းလောင်စာ လိုအပ်လျက် ရှိနေကြောင်း ၎င်းတို့က ဆိုသည်။



မြန်အောင်မြို့နယ်ရှိ ကျေးလက်ဒေသနေ လူတန်းစားများက ထင်းလောင်စာ အတွက် အပင်များကို ခုတ်လှဲ အသုံးပြုလေ့ရှိပြီး ပြန်လည်စိုက်ပျိုးမှု အားနည်းခြင်းကြောင့် ထင်းလောင်စာ လိုအပ်မှု မြင့်မားကြောင်း မြန်အောင်မြို့ခံ ဦးတင်ရွှေက ပြောကြားသည်။



သစ်တောဦးစီးဌာန အနေနှင့် သစ်တောစိုက်ခင်း တည်ထောင်ခြင်းများကို ရှေးယခင်ကတည်း စိုက်ပျိုးခဲ့သော်လည်း ၁၉၇၇- ၁၉၇၈ ခုနှစ်မှစ၍ ထင်းအစားထိုး သစ်ပင်များကို စိုက်ပျိုးတည်ထောင်ခဲ့ပြီး လက်ရှိ အချိန်၌လည်း နေရာဒေသကို အခြေခံ စိုက်ပျိုးတည်ထောင်လျက် ရှိကြောင်း၊ ယင်းစိုက်ခင်း အမျိုးအစားများအနက် ကျေးရွာသုံး စိုက်ခင်းများသည် ဒေသခံများ၏ ထင်း လိုအပ်ချက်ကို ဖြည့်ဆည်းပေးနိုင်ရန် ရည်ရွယ်ချက်ဖြင့် စိုက်ပျိုးခဲ့သော စိုက်ခင်းများ ဖြစ်ကြောင်း ဟင်္သာတခရိုင် သစ်တောဦးစီးဌာန လက်ထောက် ညွှန်ကြားရေးမှူး ဦးအောင်မြက ပြောကြားသည်။



ကျေးလက်ဒေသ ဖွံ့ဖြိုးရေးနှင့် ကျေးလက်အိမ်ရာ ထူထောင်ရေးအတွက် ကျေးရွာပိုင် တစ်ရွာတစ်ဧက စိုက်ခင်းနှင့် တစ်အိမ်ထောင် ကျွန်းသုံးပင်၊ သစ်မာအပင် ၂၀ စိုက်ပျိုးထုတ်လုပ်ရန် စီမံချက်ဖြင့် ၂၀၀၈-၂၀၀၉ ဘဏ္ဍာရေးနှစ်က စတင်စိုက်ပျိုးခဲ့ရာ ဒေသခံများကို ပြုစုထိန်းသိမ်းစေခဲ့ကြောင်း၊ မြို့နယ်အလိုက်၊ ကျေးရွာအလိုက်၊ အိမ်ထောင်စုအလိုက်၊ စိုက်ပျိုးပေးခဲ့သည့် မှတ်တမ်းများ ထားရှိကြောင်း၊ သက်ဆိုင်ရာ ကျေးရွာအုပ်ချုပ်ရေးမှူးများကိုလည်း မှတ်တမ်းမှတ်ရာဖြင့် စနစ်တကျ လွှဲပြောင်းပေးထားခဲ့ကြောင်း ၎င်းကဆိုသည်။



ကျေးရွာပိုင် တစ်ရွာတစ်ဧကမှ လည်းကောင်း၊ ခြံဝင်းအတွင်းမှ စိုက်ပျိုးထားသော ကျွန်းသုံးပင်နှင့် သစ်မာ ၂၀ ပင်တို့မှ ကိုင်းဖျားကိုင်းနားများ၊ ပင်ပူးများမှ ထင်းရရှိနိုင်ကြောင်း၊ စိုက်ပျိုးခဲ့သော စီမံချက်လုပ်ငန်းသည် ၅ နှစ်ခန့်သာရှိသဖြင့် ထင်းထုတ်လုပ်နိုင်မှု အခြေအနေ မရှိသေးသော်လည်း နောင် ၃ နှစ်ခန့်တွင် ကျေးရွာပိုင် သစ်တော စိုက်ခင်းများမှ ထင်းဖြန့်ဝေခြင်း လုပ်ငန်းကို အကောင်အထည် ဖော်နိုင်မည် ဖြစ်ကြောင်း လက်ထောက်ညွှန်ကြားရေးမှူးက ရှင်းပြသည်။



၂၀၁၁-၂၀၁၂ ဘဏ္ဍာနှစ်မှ ၂၀၁၃-၂၀၁၄ ဘဏ္ဍာနှစ်အထိ ကျေးရွာပိုင် တစ်ရွာတစ်ဧက စိုက်ခင်း ၄၇ ဧက၊ ကျွန်းပင်ပေါင်း တစ်သိန်းငါးသောင်းကျော်၊ သစ်မာပင် ကိုးသိန်းကျော် ဖြန့်ဝေစိုက်ပျိုးကာ သက်ဆိုင်ရာ ကျေးရွာများကို လွှဲပြောင်းပေးအပ်ခဲ့ပြီး ၂၀၁၄-၂၀၁၅ ဘဏ္ဍာရေးနှစ်၏ မိုးရာသီတွင် ဟင်္သာတခရိုင် ၆ မြို့နယ်၌ ၁၃ ဧက၊ တစ်အိမ်ထောင် ကျွန်း၃ ပင်အတွက် အပင်ပေါင်း ၁၉,၂၄၈ ပင်၊ တစ်အိမ်ထောင် သစ်မာ ၂၀ ပင်ပေါင်း ၁၁၉,၁၆၀ ပင် စိုက်ပျိုးရန် လျာထားကြောင်း ခရိုင်သစ်တော ဦးစီးဌာန၏ ထုတ်ပြန်ချက်အရ သိရသည်။

from The Voice Weekly's Facebook Wall http://ift.tt/1pSpr2B