ရန်ကုန်တိုင်းဒေသကြီး၏ ၂၀၁၄-၂၀၁၅ ဘဏ္ဍာနှစ် ဘတ်ဂျက်အား ဧပြီ ၂၃ ရက်တွင် စတင်ပြုလုပ်မည့် လွှတ်တော်အစည်းအဝေးမှသာ အတည်ပြုနိုင်မည်
ရန်ကုန်တိုင်းဒေသကြီး၏ ၂၀၁၄-၂၀၁၅ ဘဏ္ဍာနှစ် ဘတ်ဂျက်အား ဧပြီ ၂၃ ရက်တွင် စတင်ပြုလုပ်မည့် ရန်ကုန်တိုင်းဒေသကြီး လွှတ်တော်အစည်းအဝေးမှသာ အတည်ပြုနိုင်မည်ဖြစ်ကြောင်း တိုင်းဒေသကြီး လွှတ်တော်ကိုယ်စားလှယ်များက ပြောကြားသည်။
၂၀၁၄-၂၀၁၅ ဘဏ္ဍာနှစ် ဘတ်ဂျက်အား ဘဏ္ဍာနှစ် မစတင်မီအတည်ပြုရမည် ဖြစ်သော်လည်း လက်ရှိအချိန်ထိ အတည်ပြုနိုင်ခြင်းမရှိသေးဘဲ ဧပြီ ၂၃ ရက်တွင် စတင်ပြုလုပ်မည့် တိုင်းဒေသကြီးလွှတ်တော် အစည်းအဝေးမှသာ အတည်ပြုနိုင်မည်ဖြစ်ကြောင်း ၎င်းတို့က ပြောကြားခြင်း ဖြစ်သည်။
“ပြဋ္ဌာန်းတဲ့ ဘတ်ဂျက်ဥပဒေက ဧပြီ ၁ ရက်ကစပြီး အကျိုးသက်ရောက်မယ်လို့ ဥပဒေကြမ်းရေးထားတာ။ ဒါပေမဲ့ လွှတ်တော်တောင် မလုပ်ရသေးဘူးဆိုတဲ့ အခါကျတော့ ဥပဒေက နောက်ကြောင်းပြန်ပြီး သက်ရောက်ရမလို ဖြစ်နေတယ်။
အဲဒီလို ဖြစ်လို့မရဘူး။ ဧပြီ ၂၃ ရက်မှာ တင်သွင်းမယ်ဆိုရင် ဥပမာ အဲဒါကို လကုန်လောက်မှ အတည်ပြုဖြစ်မှာပေါ့။ ဧပြီ တစ်လလုံးမှာက အစိုးရ သုံးထားတာတွေက ဥပဒေနဲ့မညီဘူး။ ဒါက ဥပဒေရေးရာ ပြဿနာဖြစ်တယ်။ ဘာကြောင့်လဲဆိုတော့ ဧပြီ ၁ ရက်ကစပြီး အစိုးရက မသုံးဘဲမှ မနေတာ။ အခုထိ လွှတ်တော်ခေါ်ယူနိုင်ခြင်းမရှိဘူး။ ဧပြီ ၁ ရက်က စသုံးမယ်ဆိုရင် ဧပြီ ၁ ရက် မတိုင်မီကတည်းက အရေးပေါ်အစည်းအဝေး ခေါ်ပြီးတော့ အတည်ပြုရမှာ။ အဲဒီလို အတည်ပြုပြီးမှ ဧပြီ ၁ ရက်က စပြီး ဥပဒေအာဏာ သက်ရောက်ပြီး စသုံးနိုင်မှာ”ဟု ဗဟန်းမြို့နယ် မဲဆန္ဒနယ်အမှတ်(၂) မှ လွှတ်တော်ကိုယ်စားလှယ် ဒေါက်တာညိုညိုသင်းက ပြောကြားသည်။
“ပွင့်ပွင့်လင်းလင်းပြောရရင် ဘတ်ဂျက် လျာထားချက်ကို လွှတ်တော်မှာ ကြို တင်ပြီး အတည်ပြုဖို့ လိုပါတယ်။ ဒါပေမဲ့ ရန်ကုန်တိုင်းဒေသကြီး အစိုးရက လျာထားချက်ကို လွှတ်တော်ကို ကြိုမတင်ခဲ့ဘူး။ ဒါကိုမတင်ဘဲ ဘယ်လိုသုံးသလဲဆိုတာ စဉ်းစားစရာ ဖြစ်နေတယ်။ အခုဧပြီ ၁ ရက် စသုံးတဲ့ ဘတ်ဂျက်ကို ဧပြီ ၂၃ ရက်မှာ လုပ်မယ့် လွှတ်တော်အစည်းအဝေးကျမှ တင်တယ်ဆိုတာတော့ မဖြစ်သင့်ဘူး။ ပြီးခဲ့တဲ့ ဇန်န၀ါရီလမှာ လွှတ်တော်ဒုဥက္ကဋ္ဌနဲ့ တွေ့တော့ ၂၀၁၄-၂၀၁၅ ဘတ်ဂျက်ကို အတည်ပြုဖို့ ဖေဖော်ဝါရီလကုန်လောက်မှာ လွှတ်တော်ခေါ်မယ်လို့ ပြောခဲ့တယ်။ ဒါပေမဲ့ မခေါ်နိုင်ဘူး။ မတ်လကုန်မှာလည်း မခေါ်ခဲ့ဘူး။ နောက်ဆုံးဗျာ မတ်လကုန်ခေါ်ရင်တောင် ဘတ်ဂျက်ကို ကျွန်တော်တို့အတည်ပြုပေးလိုက်လို့ ရတယ်”ဟု သင်္ကန်းကျွန်းမြို့နယ် မဲဆန္ဒနယ်အမှတ် (၁)မှ တိုင်းဒေသကြီး လွှတ်တော်ကိုယ်စားလှယ် ဦးကျော်ကလည်း ပြောကြားသည်။
ရန်ကုန်တိုင်းဒေသကြီးလွှတ်တော် အစည်းအဝေးများမှာ အခြားအကြောင်းအရာများထက် အစိုးရအဖွဲ့၏ ဘဏ္ဍာငွေ အတည်ပြုချင်မှသာ ခေါ်ယူနေပြီး အစိုးရအဖွဲ့က လွှတ်တော်ကို လွှမ်းမိုးနေသည်ဟုလည်း လွှတ်တော်ကိုယ်စားလှယ်အချို့က ဝေဖန်ကြသည်။
“နိုင်ငံတကာမှာလည်း ဘတ်ဂျက်ကိစ္စမှာ လွှတ်တော်ကို ကြိုတင်ရပါတယ်။ ဒါပေမဲ့ မလုပ်ခဲ့ဘူး။ အန်တီအနေနဲ့ ဒီကိစ္စနဲ့ ပတ်သက်ပြီး ၂၃ ရက်လုပ်မယ့် လွှတ်တော်အစည်းအဝေးမှာ ဥပဒေချုပ်ကို ကြယ်ပွင့်မပြ မေးခွန်းအနေနဲ့ သဘောထား မှတ်ချက် တောင်းဖို့ရှိပါတယ်။ ဒါဟာ သမိုင်းရဲ့ အမှားတစ်ခုဖြစ်ပါတယ်”ဟု ဗဟန်းမြို့နယ် မဲဆန္ဒနယ် အမှတ် (၂)မှ လွှတ်တော်ကိုယ်စားလှယ် ဒေါက်တာညိုညိုသင်းက ပြောကြားသည်။
၂၀၁၃-၂၀၁၄ ဘဏ္ဍာရေးနှစ်တွင် ရန်ကုန်တိုင်းဒေသကြီး၏ စုစုပေါင်းဘဏ္ဍာ ငွေ အသုံးစရိတ်မှာ ကျပ် ၂၀၆ ဒသမ ၀၆၂ ဘီလျံ ရှိခဲ့သည်ဟု သိရသည်။
လာမည့် လွှတ်တော်အစည်းအဝေးတွင် တန်ဖိုးနည်းတန်ဖိုးမျှ အိမ်ရာစီမံကိန်းနှင့် ပတ်သက်သည့် အဆို၊ အများပြည်သူဆန္ဒဖြင့် ရွေးချယ်ထားသော ရပ်ကွက်အုပ်ချုပ်ရေးမှူးအချို့ကို ရားထူးမှ ဖြုတ်ချသည့်ကိစ္စအား ကန့်ကွက်သည့်အကြောင်း အဆိုစသည်တို့ကို တင်သွင်းမည်ဖြစ်ကြောင်း ဗဟန်း မြို့နယ် မဲဆန္ဒနယ်အမှတ်(၂)မှ လွှတ်တော်ကိုယ်စားလှယ် ဒေါက်တာညိုညိုသင်းက ပြောကြားသည်။
လာမည့်လွှတ်တော် အစည်းအဝေးတွင် မေးခွန်းကိုးခုကို တင်ပြမေးမြန်းထားပြီး သင်္ကန်းကျွန်းမြို့နယ်အတွင်းရှိ ငမိုးချောင်း နံဘေးမှ ကျူးကျော်ကိစ္စများ၊ ရန်ကုန်မြို့တော် စည်ပင်သာယာရေးကော်မတီနှင့် သက်ဆိုင်သောမေးခွန်း စသည်တို့ပါဝင်ကြောင်း သင်္ကန်းကျွန်းမြို့နယ် မဲဆန္ဒနယ်အ မှတ်(၁)မှ လွှတ်တော်ကိုယ်စားလှယ် ဦးကျော်က ပြောကြားသည်။
(ရန်ကုန်တိုင်းဒေသကြီး လွှတ်တော်အစည်းအဝေးတစ်ရပ် ပြုလုပ်နေသည်ကို တွေ့ရစဉ် (ဓာတ်ပုံ-ကျော်ထင်))
from Eleven Media Group's Facebook Wall http://ift.tt/1lmM6Bc
Comments
Post a Comment