မန္တလေးတိုင်းအတွင်း အခြေခံ စာတတ်မြောက်ရေးလုပ်ငန်း မေလ အထိ ဆောင်ရွက်မည်
မန္တလေး၊ ဧပြီ ၃
အခြေခံ စာတတ်မြောက်မှုနှုန်း တိုးတက်ရေးအတွက် ဆောင်ရွက်လျက် ရှိရာ မန္တလေးတိုင်းဒေသကြီး အတွင်းရှိ မြို့နယ် နှစ်မြို့နယ်တွင် ဧပြီလ ၁ ရက်မှ မေလ ၁၅ ရက်နေ့အထိ ဆောင်ရွက်သွားမည် ဖြစ်ကြောင်း အထက်မြန်မာပြည် အမှတ် ၂ အခြေခံပညာ ဦးစီးဌာနထံမှ စုံစမ်းသိရှိရသည်။
မြန်မာနိုင်ငံတွင် အခြေခံ စာတတ်မြောက်မှုနှုန်း တိုးတက်ရေးအတွက် လူထုလှုပ်ရှားမှု အသွင်ဖြင့် ဆောင်ရွက်ရန်ဟူသော ရည်ရွယ်ချက်ဖြင့် ယင်းသို့ ဆောင်ရွက်ရခြင်း ဖြစ်ကြောင်း အဆိုပါဌာန တာဝန်ရှိသူတစ်ဦးက The Voice သို့ ပြောကြားသည်။
အဆိုပါ အခြေခံပညာ စာတတ်မြောက်ရေး လုပ်ငန်းကို တက္ကသိုလ်သင်တန်း ကြီးကြပ်ဆရာများ၊ သင်တန်းနည်းပြများ၊ အခြေခံပညာ ကျောင်းများမှ ကြီးကြပ်ရေးမှူး ဆရာမများ၊ မန္တလေးတက္ကသိုလ်၊ ရတနာပုံ တက္ကသိုလ်များမှ စေတနာရှင် လုပ်အားပေး ကျောင်းသား၊ ကျောင်းသူများ စသည်တို့ ပါဝင် လုပ်ဆောင်သွားမည် ဖြစ်ကြောင်း ၎င်းကဆိုသည်။
မန္တလေးတိုင်းဒေသကြီး ၂၀၁၄ ခုနှစ် အခြေခံ စာတတ်မြောက်ရေး လှုပ်ရှားမှု လုပ်ငန်းများကို ဧပြီလ ၁ ရက်နေ့တွင် ကျောက်ဆည် တက္ကသိုလ်မှ ကျောင်းသား၊ ကျောင်းသူဦးရေ ၂၀၀ သည် စဥ့်ကိုင်မြို့နယ် အတွင်းရှိ ရပ်ကွက်၊ ကျေးရွာ ၁၆၈ ခုတွင် စာသင်ဝိုင်း ၂၀၀ ဖြင့် ဒေသခံ ၂၀၀၀ ခန့်ကို စာဖတ်နှုန်း တိုးတက်ရေးအတွက် လုပ်ဆောင်ခဲ့ကြောင်း ယင်းအစီအစဉ်တွင် ပါဝင်သော စဥ့်ကိုင်မြို့နယ် ရွာသစ်ကျေးရွာ အခြေခံပညာ မူလတန်းကျောင်း ကျောင်းအုပ် ဆရာမကြီး ဒေါ်မာမာသန်းက The Voice သို့ ပြောကြားသည်။
မန္တလေးခရိုင် မဟာအောင်မြေ မြို့နယ်တွင် စာသင်ဝိုင်း ၁၃ ဝိုင်း၊ သင်တန်းသား ၁၁၆ ဦးတို့ဖြင့် အခြေခံ စာတတ်မြောက်ရေး လုပ်ငန်းများကို ဧပြီလ ၂ ရက်နေ့တွင် ပြုလုပ်ခဲ့ကြောင်း အမှတ် ၂ အခြေခံပညာ ဦးစီးဌာနမှ ထပ်မံသိရသည်။
အဆိုပါ ၂၀၁၄ ခုနှစ် အခြေခံ စာတတ်မြောက်ရေး လုပ်ငန်းတွင် ပါဝင် ဆောင်ရွက်ကြမည့် ကျောင်းသား၊ ကျောင်းသူများ ကြိုဆိုဂုဏ်ပြုပွဲကို ဧပြီလ ၁ ရက်နေ့က စဥ့်ကိုင်မြို့နယ် ကျောက်ဆည် တက္ကသိုလ်နှင့် မန္တလေး တက္ကသိုလ်တို့တွင် ပြုလုပ်ရာ မန္တလေးတိုင်းဒေသကြီး အစိုးရအဖွဲ့ ဝန်ကြီးချုပ် ဦးရဲမြင့် တက်ရောက် ဖွင့်လှစ်ပေးခဲ့သည်။
from The Voice Weekly's Facebook Wall http://ift.tt/1hHSYt6
Comments
Post a Comment