MPU ကတ်များ သုံးလအတွင်း အွန်လိုင်း ငွေပေးချေနိုင်မည်ဟုဆို ရန်ကုန်၊ မတ် ၁၁ ငွေသ...

MPU ကတ်များ သုံးလအတွင်း အွန်လိုင်း ငွေပေးချေနိုင်မည်ဟုဆို



ရန်ကုန်၊ မတ် ၁၁



ငွေသား ကိုင်တွယ်အသုံးပြုမှု လျှော့ချနိုင်ရန် ပြည်တွင်းဘဏ်များ ပူးပေါင်း ထုတ်လုပ်ထားသော MPU ကတ်များဖြင့် အွန်လိုင်း စတိုးများတွင် ဈေးဝယ်နိုင်မည့် ဝန်ဆောင်မှုကို မေလအတွင်း ရရှိမည် ဖြစ်ကြောင်း MPU (Myanmar Payment Union) အမှုဆောင် အရာရှိချုပ် ဦးဇော်လင်းထွဋ်က ပြောကြားသည်။



အဆိုပါ ဝန်ဆောင်မှု ပေးနိုင်ရန် Myanmar Payment Union က ထိုင်းနိုင်ငံ အခြေစိုက် 2C2P ကတ်ငွေကြေး ဝန်ဆောင်မှု လုပ်ငန်းနှင့် ပူးပေါင်း အကောင်အထည် ဖော်နေပြီး လက်ရှိတွင် စမ်းသပ် လုပ်ဆောင်မှုများ ပြုလုပ်နေကြောင်း ၎င်းက ရှင်းပြသည်။

“နောက်အကျဆုံး မေလကုန်ပဲ။ အသေးစိတ်ကိုတော့ မိတ်ဆက်ပြီး ပြောသွားမယ်” ဟု ၎င်းကပြောဆိုသည်။



ပြည်တွင်းတွင် MPU ကတ်ဖြင့် အွန်လိုင်း ဈေးဝယ်မှုများ ပြုလုပ်နိုင်သည့် အတွက် ကောင်းသော်လည်း အင်တာနက်လိုင်း မကောင်းမှုကို ဖြေရှင်းရန် လိုကြောင်း MPU ကတ် သုံးစွဲကြသူများက ဆိုသည်။



ယင်းစနစ် အကောင်အထည် ဖော်ပြီးပါက MPU ကတ် ကိုင်ဆောင်သူများသည် အွန်လိုင်း ငွေပေးချေမှုစနစ်ကို အသုံးပြုနိုင်ရန် ကတ်ပြုလုပ်သည့် ဘဏ်တွင် လာရောက် လျှောက်ထားရန် လိုကြောင်း 2C2P ကတ် ငွေကြေး ဝန်ဆောင်မှု လုပ်ငန်း အမှုဆောင် အရာရှိချုပ် ဦးအောင်ကျော်မိုးက ပြောကြားသည်။



မြန်မာနိုင်ငံတွင် MPU Debit ကတ်များကို ပြည်တွင်း ပုဂ္ဂလိကဘဏ်များ ပူးပေါင်း၍ ၂၀၁၂ ခုနှစ် စက်တင်ဘာလတွင်း စတင်အကောင်အထည် ဖော်ခဲ့ပြီး လက်ရှိတွင် သုံးစွဲသူ ခြောက်သိန်းကျော် ရှိကြောင်း Myanmar Payment Union ထံမှ စုံစမ်းသိရှိရသည်။







from The Voice Weekly's Facebook Wall http://ift.tt/1cPlZUh