စစ်တွေရှိ INGOs ဝန်ထမ်းများ ဘေးကင်းရေး ကုလသမဂ္ဂနှင့် EU အဖွဲ့များ တောင်းဆို ရန်...

စစ်တွေရှိ INGOs ဝန်ထမ်းများ ဘေးကင်းရေး ကုလသမဂ္ဂနှင့် EU အဖွဲ့များ တောင်းဆို



ရန်ကုန်၊ မတ် ၂၈



ရခိုင်ပြည်နယ် စစ်တွေမြို့တွင် INGO ဝန်ထမ်း နိုင်ငံခြားသူတစ်ဦး သာသနာ့အလံ ဖြုတ်ချရာမှ ဖြစ်ပွားနေသော ပဋိပက္ခတွင် စစ်တွေမြို့ရှိ လူသားချင်း စာနာထောက်ထားမှု အကူအညီ ပေးနေသည့် ဝန်ထမ်းများ ဘေးကင်းလုံခြုံရေး လုပ်ဆောင်ပေးရန် မတ်လ ၂၇ ရက်နေ့က ကုလသမဂ္ဂနှင့် EU အဖွဲ့ အသီးသီးက တောင်းဆိုခဲ့ကြသည်။



ဥရောပသမဂ္ဂ လူသားချင်းစာနာ ထောက်ထားမှု အကူအညီပေးရေးနှင့် ပဋိပက္ခများ တုံ့ပြန်မှု ကော်မရှင်နှင့် ဖွံ့ဖြိုးရေးကော်မရှင်တို့၏ မတ်လ ၂၇ ရက်နေ့ ထုတ်ပြန်ချက်တွင် နိုင်ငံတကာ အကူအညီပေးရေးအဖွဲ့ ဝန်ထမ်းများ၏ လုံခြုံရေးကို အစိုးရနှင့် ဒေသခံများ ပူးပေါင်း၍ ကူညီစောင့်ရှောက်ရန် လိုအပ်ကြောင်း ဖော်ပြထားသည်။



အလားတူ ကုလသမဂ္ဂ နေထိုင်ရေးနှင့် လူသားချင်း စာနာထောက်ထားမှု ညှိနှိုင်းရေးအဖွဲ့ ထုတ်ပြန်ချက်တွင်လည်း အစိုးရက ဖွံ့ဖြိုးရေးလုပ်ငန်းများ ဆောင်ရွက်နေသူများကို စောင့်ရှောက်ပေးရန် တောင်းဆိုထားပြီး အသက်ကယ် လူသားချင်းစာနာ ထောက်ထားမှု အကူအညီများကို ဆက်လက် အကူအညီပေးရန် ဆုံးဖြတ်ထားကြောင်း ယင်းအဖွဲ့၏ မြန်မာနိုင်ငံဆိုင်ရာ ညှိနှိုင်းရေးမှူး Mr.Toily Kurbanov က ပြောဆိုသည်။



ပဋိပက္ခကြောင့် လူသားချင်း စာနာထောက်ထားမှုများ ရပ်ဆိုင်းလျှင် အကူအညီ လိုအပ်နေသော လူထုအတွက် မလိုလားအပ်သော လက္ခဏာများ ဖြစ်နိုင်ကြောင်း၊ အစိုးရ တာဝန်ရှိသူများက အလျဉ်းသင့်သလို ထောက်ပံ့မှုများ ပြင်ဆင်ထားပြီး ပြစ်မှုကျူးလွန်သူများကို ဥပဒေနှင့်အညီ ဆောင်ရွက်ရန် တိုက်တွန်းကြောင်း ၎င်းက ဆက်လက် ပြောကြားသည်။



ယင်းအပြင် အမေရိကန်အစိုးရက ရခိုင်ပြည်နယ်အတွင်း ဖြစ်ပွားနေသော ပဋိပက္ခများနှင့် ပတ်သက်၍ ရေရှည်ဖြေရှင်းချက် တစ်ခု ထွက်ပေါ်လာရန် ပြည်ထောင်စုအစိုးရကို တိုက်တွန်းပြီး ယင်းအတွက်လည်း အမေရိကန် ပြည်ထောင်စုက ကူညီရန် အသင့်ရှိကြောင်း မတ်လ ၂၇ ရက်နေ့က ထုတ်ပြန်သော အဆိုပါ ထုတ်ပြန်ချက်တွင် ဖော်ပြပါရှိသည်။



အဆိုပါ ပဋိပက္ခကြောင့် အနည်းဆုံး အမေရိကန်နိုင်ငံသား သုံးဦး အပါအဝင် နိုင်ငံတကာ အကူအညီပေးရေး လုပ်သားများကို ဘေးကင်းရာသို့ ရွှေ့ပြောင်းပေးခဲ့ကြောင်း အဆိုပါ ထုတ်ပြန်ချက်အရ သိရသည်။



စစ်တွေမြို့တွင် မတ်လ ၂၆ ရက် နေ့က Malteser International အမည်ရှိ နိုင်ငံတကာ အကူအညီပေးရေး အဖွဲ့က အမေရိကန်နိုင်ငံသူ တစ်ဦးသည် ၎င်းတို့ ငှားရမ်းနေထိုင်သော နေအိမ်ပိုင်ရှင် လွှင့်ထူထားသော သာသနာ့အလံကို ဖြုတ်ချ၍ ခါးကြားတွင် ညှပ်ထားရာမှ ရုန်းရင်းဆန်ခတ် ဖြစ်ပွားခဲ့ကြောင်း စစ်တွေမြို့ခံများထံမှ စုံစမ်းသိရှိရသည်။



ယခုနှစ်ဆန်းပိုင်းက ဖြစ်ပွားခဲ့သော မောင်တောပဋိပက္ခနှင့် ဆက်စပ်၍လည်း နိုင်ငံတကာ အဖွဲ့အစည်း MSF (Holland) ကို ရခိုင်ပြည်နယ်တွင် ဆက်လက်လုပ်ကိုင်ခွင့် ပိတ်ပင်ထားပြီး နောက်ပိုင်း မတ်လ ၂၆ ရက်နေ့က စစ်တွေပဋိပက္ခ ထပ်မံဖြစ်ပွားခဲ့ခြင်း ဖြစ်သည်။





from The Voice Weekly's Facebook Wall http://ift.tt/1mdpqnM