ရေနံယိုဖိတ်မှု တုံ့ပြန် ဆောင်ရွက်ရေး အရေးပေါ် စီမံချက် လုပ်ဆောင်မည်
နေပြည်တော်၊ မတ် ၁၂
မြန်မာ့ ပင်လယ်ပြင်တွင် ရေနံ ယိုဖိတ်မှုများကြောင့် ဆုံးရှုံးမှုနှင့် ရေပြင် ညစ်ညမ်းမှုများအား ကာကွယ်သွားနိုင်ရေး အတွက် သက်ဆိုင်ရာ ဆိပ်ကမ်းများ အလိုက် ရေနံယိုဖိတ်မှု ကာကွယ် ထားဆီးရေးနှင့် တုံ့ပြန် ဆောင်ရွက်မည့် အစီအမံများကို ရေးဆွဲ ထားပြီ ဖြစ်ကြောင်း စွမ်းအင် ဝန်ကြီးဌာန ဒုတိယဝန်ကြီး ဦးအောင်ထူးက ပြောကြားသည်။
ကျောက်ဖြူမြို့နယ် မဒေးကျွန်း ရေနက်ဆိပ်ကမ်းရှိ ရေနံစိမ်းကန်ကြီး ၁၂ ခုနှင့် ဝင်ရောက် သယ်ယူနေသော သင်္ဘောများမှ ရေနံ ယိုဖိတ်မှုများ ဖြစ်ပေါ်လာပါက ဆောင်ရွက်မည့် အခြေအနေနှင့် ပတ်သက်၍ ဂွ မဲဆန္ဒနယ်မှ ဦးကြည်သာက ယနေ့ (မတ် ၁၂) ကျင်းပသော ပြည်သူ့လွှတ်တော် အစည်းအဝေးတွင် မေးမြန်းရာ ၎င်းက ယင်းသို့ ပြန်လည် ဖြေကြားခြင်း ဖြစ်သည်။
အဆိုပါ ရေနံစိမ်းကန် တစ်ခုလျှင် ကုဗမီတာ တစ်သိန်းစီ ရှိနေသောကြောင့် ယိုဖိတ်မှု စိုးရိမ်ရသည့် အခြေအနေ ရှိကြောင်း ဦးကြည်သာက ဆိုသည်။
အမျိုးသားအဆင့် ရေနံယိုဖိတ်မှု တုံ့ပြန် ဆောင်ရွက်ရေး အရေးပေါ် စီမံချက်ကို ပို့ဆောင်ရေး ဝန်ကြီးဌာနနှင့် ဆိပ်ကမ်း အာဏာပိုင် အဖွဲ့အစည်းများမှ မူကြမ်း ရေးဆွဲထားပြီး နိုင်ငံတော်မှ အတည်ပြု ပြဋ္ဌာန်းနိုင်ရန် တင်ပြသွားမည် ဖြစ်ကြောင်း ဒုတိယဝန်ကြီး ဦးထူးအောင်က ပြောကြားသည်။
ထို့အပြင် အရှေ့တောင်အာရှနှင့် ချုပ်ဆိုထားသော စာချုပ်များ အရ နိုင်ငံတကာ ပင်လယ်ပြင် ရေကြောင်းဆိုင်ရာ အာမခံချက် ရရှိပြီးထားသော သင်္ဘောများကိုသာ မြန်မာ့ဆိပ်ကမ်းသို့ ဆိုက်ကပ်ခွင့် ပြုလျက်ရှိကြောင်း ၎င်းကဆိုသည်။
ရေနံ ယိုဖိတ်မှုများ ဖြစ်ပေါ်လာပါက သဘာဝ ပတ်ဝန်းကျင်နှင့် နစ်နာသည့် လျော်ကြေးငွေ ရရှိရန်နှင့် အာမခံ ကုမ္ပဏီများနှင့် စီစဉ်နေပြီ ဖြစ်ကြောင်း ၎င်းက ရှင်းပြသည်။
ထို့အပြင် မြန်မာ့ဆိပ်ကမ်း နယ်နိမိတ်နှင့် နယ်နိမိတ် အပြင်ဘက် မြန်မာ့ရေပိုင်နက် အတွင်း ရေနံယိုစိမ့်မှု ဖြစ်ပါက ပို့ဆောင်ရေး ဝန်ကြီးဌာန၊ ရေကြောင်းပို့ဆောင်ရေး ညွှန်ကြားမှု ဦးစီးဌာနမှ ရေးဆွဲထားသည့် အရ ဆက်လက် ဆောင်ရွက် သွားမည် ဖြစ်ကြောင်း ၎င်းက ထပ်လောင်း ပြောဆိုသည်။
from The Voice Weekly's Facebook Wall http://ift.tt/PvTNv8
Comments
Post a Comment