အစိုးရနှင့် လက်နက်ကိုင် ဆက်ဆံရေးရုံးများ ဆက်တိုက်တွေ့ဆုံမှုကြောင့် တိုက်ပွဲများ ပြန်လည် ငြိမ်သက်ဟုဆို
ရန်ကုန်၊ မတ် ၁၈
ရှမ်းပြည်နယ် မြောက်ပိုင်းနှင့် တောင်ပိုင်းတွင် ယခုလအစပိုင်းက တိုက်ပွဲများ မကြာခဏ ဖြစ်ပွားခဲ့သော်လည်း တိုင်းရင်းသား လက်နက်ကိုင်အဖွဲ့များ၏ ဆက်ဆံရေးရုံများနှင့် အစိုးရတို့ ဆက်တိုက် တွေ့ဆုံမှုကြောင့် တိုက်ပွဲများ ပြန်လည် ငြိမ်သက်လာကြောင်း ရှမ်းပြည် ပြန်လည်ထူထောင်ရေး ကောင်စီ (RCSS/SSA) တောင်ကြီး ဆက်ဆံရေးရုံး တာဝန်ခံ ဦးစိုင်းဦးက ပြောကြားသည်။
ရှမ်းပြည်နယ်အတွင်း မတ်လဆန်းပိုင်းတွင် တိုက်ပွဲများ ဖြစ်ပွားခဲ့သော်လည်း တောင်ကြီးမြို့တွင် အစိုးရနှင့် တိုင်းရင်းသား လက်နက်ကိုင် ဆက်ဆံရေး ခြောက်ဖွဲ့ တွေ့ဆုံပြီးနောက် တိုက်ပွဲများ ပြန်လည် ငြိမ်သက်သွားကြောင်း ၎င်းက ရှင်းပြသည်။
“အခု တိုက်ပွဲတွေ ပြန်ငြိမ်သွားပါတယ်။ နှစ်ဖက်တွေ့ဆုံတာကြောင့် ဆက်ဆံရေးပိုင်းတွေ ပိုအဆင်ပြေလာတယ်လို့ မြင်ပါတယ်” ဟု ၎င်းကဆိုသည်။
ထို့အပြင် အစိုးရနှင့် တိုင်းရင်းသား လက်နက်ကိုင် ဆက်ဆံရေးရုံးများ တွေ့ဆုံခဲ့ပြီးနောက် နှစ်ဖက်ထိတွေ့မှုများ လျှော့ချရေး ပိုမိုပူးပေါင်း ဆောင်ရွက်နိုင်ရန် သုံးလတစ်ကြိမ် တွေ့ဆုံရန် သဘောတူညီခဲ့ကြောင်း RCSS/SSA ထံမှသိရသည်။
မတ်လဆန်းပိုင်းတွင် ရှမ်းပြည်နယ် အတွင်းရှိ မြို့နယ်အချို့တွင် အစိုးရနှင့် ရှမ်းပြည် တိုးတက်ရေးပါတီ (SSPP/SSA)၊ ရှမ်းပြည် ပြန်လည် ထူထောင်ရေးကောင်စီ (RCSS/SSA) တပ်ဖွဲ့ဝင်များ တိုက်ပွဲများ ဆက်တိုက် ဖြစ်ပွားခဲ့ကြောင်း၊ ယင်းသို့ ဖြစ်ပွားခဲ့ခြင်းမှာ အစိုးရဘက်မှ နယ်မြေရှင်းလင်းခြင်း မဟုတ်ဘဲ တပ်အပြောင်းအရွှေ့ လမ်းကြောင်းများ ကြိုတင်ချိတ်ဆက်မှု မရှိခြင်းကြောင့် ဖြစ်ပြီး သတင်းအချက်အလက် ဆက်သွယ်ရေးကို ပိုမို မြန်ဆန်စေမည့် နည်းလမ်းများကို ပူးပေါင်း ညှိနှိုင်းသွားမည် ဖြစ်ကြောင်း မြန်မာ ငြိမ်းချမ်းရေးစင်တာ (Myanmar Peace Center) မှ သိရသည်။
ရှမ်းပြည် ပြန်လည်ထူထောင်ရေး ကောင်စီ (RCSS/SSA)၊ ရှမ်းပြည် တိုးတက်ရေးပါတီ (SSPP/SSA)၊ ‘ဝ’ ပြည် သွေးစည်းညီညွတ်ရေးပါတီ (UWSA)၊ မိုင်းလား လက်နက်ကိုင်တပ်ဖွဲ့၊ ပအိုဝ်း အမျိုးသား လွတ်မြောက်ရေး အဖွဲ့ချုပ် (PNLO) နှင့် ကရင်နီ အမျိုးသားတိုးတက်ရေးပါတီ (KNPP) တို့မှ ကိုယ်စားလှယ်များနှင့် ပြည်နယ်အစိုးရ၊ တပ်ပိုင်းဆိုင်ရာ အရာရှိများ၊ မြန်မာငြိမ်းချမ်းရေးစင်တာမှ တာဝန်ရှိသူများ မတ်လ ဒုတိယပတ်အတွင်း ရှမ်းပြည်နယ် တောင်ကြီးမြို့တွင် တွေ့ဆုံကာ တိုက်ပွဲများ လျှော့ချနိုင်ရေး ဆွေးနွေးခဲ့ကြသည်။
from The Voice Weekly's Facebook Wall http://ift.tt/1cYbLAz
Comments
Post a Comment