တပ်သိမ်းမြေ ပြန်ပေးရန် လျှောက်ထားသူ ၂၅ ဦးတွင် သုံးဦးသာ လယ်မြေအချို့ ပြန်လည်ရရှိ
မော်လမြိုင်၊ မတ် ၂၉
မွန်ပြည်နယ် မော်လမြိုင်မြို့နယ် ရွှေမြိုင်သီရိနယ်မြေ မျှော်လင့် (၁) ရပ်ကွက်တွင် တပ်မတော်က သိမ်းယူထားသော လယ်မြေ ၁၈၃ ဧကကို လယ်ပိုင်ရှင်၂၅ ဦးထံ ပြန်လည် ပေးအပ်ရန် မွန်ပြည်နယ် ဝန်ကြီးချုပ် အပါအဝင် ဝန်ကြီးဌာန ခုနှစ်ခုသို့ တိုင်ကြားထားရာ လယ်သမား သုံးဦးသာ လယ်မြေအချို့ ပြန်လည် ရရှိသေးကြောင်း ဒေသခံ တောင်သူများက ပြောကြားသည်။
သိမ်းဆည်းခံရသည့် လယ်မြေများထဲမှ လယ်ဧက ၇၀ နီးပါကို ငါးကန် ၅၆ ကန် တူးဖော်ထားပြီး ငါးကန်များနှင့် လယ်မြေများကို တပ်မတော်က ၂၀၁၃ ခုနှစ် နှစ်ကုန်ပိုင်းအထိ လယ်သမားများ၊ အုတ်လုပ်ငန်းရှင်များနှင့် မွေးမြူရေး လုပ်ငန်းရှင်များကို အငှားချထားပေးခြင်း ဖြစ်ကြောင်း လယ်သမားခေါင်းဆောင် ဦးမောင်မြင့်က ပြောကြားသည်။
သိမ်းယူထားသော လယ်မြေများအနက် တပ်မတော်က လုပ်ကိုင်ခြင်း မရှိတော့သည့် ရွာသစ်ကွင်း လယ်မြေ ၂၃ ဒသမ ၅၉ ဧကို ပြန်လည် ပေးအပ်ရန် မြို့နယ်မြေစာရင်း ဦးစီးဌာနက မတ်လ ၂၅ ရက်နေ့တွင် ရပ်ကွက်အုပ်ချုပ်ရေးမှူး ရုံးသို့ အကြောင်းကြားခဲ့ခြင်း ဖြစ်ပြီး လယ်မြေ ပြန်လည်ရရှိသူများထဲတွင် လယ်ပြန်လည်ရရှိရေးအတွက် တိုင်ကြားထားသူ လယ်သမား သုံးဦးအပြင် တိုင်ကြားထားခြင်း မရှိသည့် လယ်သမား နှစ်ဦးလည်း ပါဝင်ကြောင်း ရွှေမြိုင်သီရိ နယ်မြေ အုပ်ချုပ်ရေးမှူး ဦးဝင်းမော်က ပြောဆိုသည်။
“အခုလယ်တွေ ပြန်ရလို့ ပျော်ပြီပေါ့။ လယ်ပြန်လုပ်မယ် စိတ်ကူးထားတယ်။ တဲဆောက်ပြီး စပါးစိုက်၊ နွေကျရင် ဟင်းရွက်စိုက်၊ သူတို့သိမ်းတော့ ကိုယ်ဘာလုပ်လို့ ရမှာလဲ။ သိမ်းတော့ ကျွန်တော့်ကို လက်မှတ်ထိုးခိုင်းတယ်။ ကျွန်တော့်လယ် ကျွန်တော်လက်မှတ် ဘယ်ထိုးမလဲ။ သူတို့သိမ်းရင် သိမ်းပေါ့ ဘာတတ်နိုင်မလဲ။ ကျွန်တော် လယ်ရှစ်ဧက ရှိတယ်။ လေးဧကကျော် ပြန်ရတယ်” ဟု သုခဝတီ ၄ လမ်းမှ တပ်သိမ်းလယ်မြေ ပြန်ရရှိသူ ဦးဟုက ဆိုသည်။
ပုလဲနှင့် ငါးလုပ်ငန်းဦးစီးဌာနက ငါးမွေးမြူရန်အတွက် လယ်သမားရှစ်ဦးထံမှ လယ်မြေများကို ပထမအကြိမ် သိမ်းယူခဲ့ခြင်း ဖြစ်ကြောင်း၊ ၎င်းဌာနမှ ၁၉၈၄ ခုနှစ်တွင် ငါးမွေးမြူရေးလုပ်ငန်းကို ဆက်လက်လုပ်ကိုင်ခြင်း မရှိတော့သဖြင့် အဆိုပါ လယ်မြေများကို အရှေ့တောင်တိုင်း စစ်ဌာနချုပ်သို့ လွှဲပြောင်းအပ်နှံခဲ့ခြင်း ဖြစ်ကြောင်းနှင့် ယင်းနောက် တပ်မတော်မှ လုပ်ငန်းကွင်း ဧရိယာ ထပ်မံတိုးချဲ့ရန်အတွက် လယ်သမား ၁၇ ဦးထံမှ လယ်မြေများကို ထပ်မံသိမ်းယူခဲ့ခြင်း ဖြစ်သည်ဟု လယ်သမား ဒေါ်မြင့်ဝေက ပြောကြားသည်။
from The Voice Weekly's Facebook Wall http://ift.tt/1hMPxh2
Comments
Post a Comment