ရုရှားနှင့် ယူကရိန်း နိုင်ငံခြားရေးဝန်ကြီး ပထမဆုံးအကြိမ် တွေ့ဆုံ
သည်ဟိတ်၊ မတ် ၂၅
ယူကရိန်းနိုင်ငံရှိ ကရိုင်းမီးယား ဒေသကို ရုရှားနိုင်ငံတွင်း သွတ်သွင်းခဲ့ပြီးနောက် ရုရှားနိုင်ငံခြားရေး ဝန်ကြီးနှင့် ယူကရိန်း ယာယီအစိုးရအဖွဲ့ နိုင်ငံခြားရေး ဝန်ကြီးတို့ ပထမဆုံးအကြိမ် တွေ့ဆုံဆွေးနွေး ခဲ့ကြောင်း BBC သတင်းတွင် ဖော်ပြထားသည်။
ရုရှားနိုင်ငံခြားရေးဝန်ကြီး ဆာဂျီလာဗရော့နှင့် ယူကရိန်း ကြားဖြတ်အစိုးရ အဖွဲ့ နိုင်ငံခြားရေးဝန်ကြီး Deshchytsia တို့သည် နယ်သာလန်နိုင်ငံ သည်ဟိတ်မြို့တွင် ကျင်းပလျက်ရှိသော နျူကလီးယား ထိပ်သီးဆွေးနွေးပွဲတွင် သီးခြား တွေ့ဆုံခဲ့ခြင်း ဖြစ်သည်။
ရုရှားသည် ယူကရိန်းနိုင်ငံ၏ ယာယီအစိုးရအဖွဲ့ကို ယခင်က အသိအမှတ်ပြုခြင်း မရှိသော်လည်း ယခု ပထမဆုံးအကြိမ်အဖြစ် တွေ့ဆုံဆွေးနွေး ခဲ့ခြင်းလည်းဖြစ်သည်။
ယူကရိန်းနိုင်ငံ တွင်းရှိ ကရိုင်းမီးယား ဒေသကို ရုရှားနိုင်ငံတွင်း သွတ်သွင်းခဲ့ခြင်းကြောင့် အမေရိကနှင့် ဥရောပနိုင်ငံများက ပိတ်ဆို့ အရေးယူမှုများဖြင့် တုံ့ပြန်ခဲ့ပြီး၊ ရုရှားကို စက်မှုဖွံ့ဖြိုးပြီးနိုင်ငံ ရှစ်နိုင်ငံအဖွဲ့ (G-8) အဖွဲ့မှ ထုတ်ပယ်ရန် ပြင်ဆင်လျက်ရှိသည်။
ဂျီ-၈ အဖွဲ့မှ ထုတ်ပယ်ခံရမည့် အရေးအတွက် စိုးရိမ်ခြင်း မရှိကြောင်း ရုရှားနိုင်ငံခြားရေး ဝန်ကြီး ဆာဂျီလာ ရော့က ပြောကြားသည်။
ရုရှားအပါအဝင် အမေရိကနှင့် ဥရောပနိုင်ငံကြီးများ ပါဝင်သော စက်မှုဖွံ့ဖြိုးပြီး နိုင်ငံရှစ်နိုင်ငံ ဂျီ-၈ ထိပ်သီး ဆွေးနွေးပွဲကို ယခင်က ရုရှားတွင်ပြုလုပ်ရန် စီစဉ်ထားသော်လည်း ကျန်ခုနစ်နိုင်ငံက ထိပ်သီးဆွေးနွေးပွဲကို ပယ်ဖျက်ရန် သဘောတူခဲ့ကြသည်။
ထို့ပြင် ရုရှားမပါသော ကျန်စက်မှု ဖွံ့ဖြိုးပြီးနိုင်ငံ ခုနစ်နိုင်ငံသည် ဇွန်လတွင် ဘယ်လ်ဂျီယံနိုင်ငံ ဘရပ်ဆဲလ်တွင် တွေ့ဆုံ ဆွေးနွေးကြမည် ဖြစ်သည်။
တနင်္လာနေ့က အမေရိကန် နိုင်ငံခြားရေးဝန်ကြီးနှင့် ရုရှားနိုင်ငံခြားရေး ဝန်ကြီးတို့ တွေ့ဆုံ ခဲ့ကြရာတွင် ယူကရိန်းနယ်စပ်တွင် ရုရှားတပ်ဖွဲ့များ တိုးမြှင့် ချထားခြင်းကို လွန်စွာစိုးရိမ်ကြောင်း
အမေရိကန် နိုင်ငံခြားရေးဝန်ကြီးက ပြောကြားခဲ့သည်။
ကရိုင်းမီးယားဒေသကို ရုရှား လက်အောက်သို့ သွတ်သွင်း ခဲ့ပြီးနောက် ကရိုင်းမီးယားဒေသရှိ ယူကရိန်း စစ်အခြေစိုက် စခန်းသုံးခုကို ရုရှားတပ်ဖွဲ့များက စီးနင်း သိမ်းပိုက်ထားပြီး ယူကရိန်းတပ်မှူး တစ်ဦးကိုလည်း ဖမ်းဆီးထားသည်။
from The Voice Weekly's Facebook Wall http://ift.tt/1fZS5qS
Comments
Post a Comment