ရန်ကုန်၊ မတ် ၂၄
တရုတ်ပြည်သူ့ သမ္မတနိုင်ငံမှ ရင်းနှီးမြှုပ်နှံမှုများတွင် နိုင်ငံတကာ စံချိန်စံနှုန်းနှင့် မကိုက်ညီသော စီမံကိန်းများကို အာဆီယံ ဒေသတွင်း နိုင်ငံများမှ သက်ဆိုင်ရာ အစိုးရများက တာဝန်ခံ ဖြေရှင်းပေးရန် အာဆီယံ ပြည်သူ့ဖိုရမ် ဖြစ်မြောက်ရေး ဦးဆောင် ကော်မတီ တွဲဖက်ဥက္ကဋ္ဌ မစ္စဖရီမရူဒီဒေါင်ရွန်က မတ်လ ၂၄ ရက်နေ့က တိုက်တွန်း ပြောကြားသည်။
မြန်မာနိုင်ငံအတွင်း သုံးရက်တာ ပြုလုပ်ခဲ့သော အာဆီယံ ပြည်သူ့ဖိုရမ်၏ ရင်းနှီးမြှုပ်နှံမှုများနှင့် ပတ်သက်သော အလုပ်ရုံ ဆွေးနွေးပွဲနှင့် ပတ်သက်သည့် သတင်းစာ ရှင်းလင်းပွဲတွင် ၎င်းက ယင်းသို့ ပြောကြားခဲ့ခြင်း ဖြစ်သည်။
တရုတ်နိုင်ငံမှ ရင်းနှီးမြှုပ်နှံမှုများမှာ နိုင်ငံတကာ စံချိန်စံနှုန်းများနှင့် ညီညွတ်ခြင်း မရှိဘဲ တစ်ဖက်သတ် ချမှတ်ထားသော မူဝါဒများ ဖြစ်သောကြောင့် အာဆီယံ ဒေသအတွင်းရှိ ပြည်သူများ အကာအကွယ် ရရှိရေးအတွက် သက်ဆိုင်ရာ အစိုးရပိုင်းမှ တာဝန်ယူ ဖြေရှင်းရမည် ဖြစ်ကြောင်း မစ္စဖရီမရူဒီဒေါင်ရွန်က ပြောကြားသည်။
“မြန်မာနိုင်ငံမှာလည်း အစိုးရသစ် အနေနဲ့ တရုတ် စီမံကိန်းတွေကို ကိုင်တွယ်ရ ခက်နေပါတယ်။ ဒါဟာ ဘယ်အစိုးရတက်တက် အရေးတကြီး ဖြေရှင်းပေးရမယ့် ကိစ္စတစ်ရပ် ဖြစ်ပါတယ်” ဟု ၎င်းကဆိုသည်။
ထို့အပြင် တရုတ်ပြည်သူ့သမ္မတနိုင်ငံသည် အရှေ့တောင်အာရှ ဒေသအတွင်း ရင်းနှီးမြှုပ်နှံမှု အများဆုံး ပြုလုပ်နေခြင်းကြောင့် ဒေသခံ အရပ်ဘက် လူ့အဖွဲ့အစည်းများနှင့် အစိုးရ အဖွဲ့အစည်းများ အနေနှင့် ဂရုစိုက် ကိုင်တွယ်သင့်ကြောင်း ၎င်းက ထပ်လောင်း ပြောကြားသည်။
ယင်းသို့ တရုတ်နိုင်ငံမှ ရင်းနှီးမြှုပ်နှံမှု အများစုမှာ စံချိန်စံနှုန်း မမီသည်ကို ဆက်လက် လုပ်ကိုင်ရန် ခွင့်ပြုပေးနေသော အစိုးရပိုင်းကသာ အဓိက တာဝန်ရှိကြောင်း အမျိုးသား ဒီမိုကရေစီ အင်အားစု NDF ပါတီ ဥက္ကဋ္ဌ ဦးခင်မောင်ဆွေက ပြောကြားသည်။
“ကျွန်တော်တို့က တရုတ်ကို မုန်းလို့ မရဘူး။ သူက စီးပွားရေးမှာ ကျားတစ်ကောင် ဖြစ်နေပြီ။ ဒါပေမဲ့ ပြည်တွင်းမှာ လာရောက် လုပ်ကိုင် ရင်တော့ ဘယ်လို အာမခံချက်တွေကို ပေးရမယ် ဆိုတဲ့ အစိုးရရဲ့ မူဝါဒတွေ ရှိမှရမယ်” ဟု ၎င်းကဆိုသည်။
လက်ရှိ မြန်မာနိုင်ငံတွင်လည်း တရုတ်နိုင်ငံမှ လုပ်ဆောင်နေသော မြစ်ဆုံ ရေကာတာ စီမံကိန်းနှင့် ကျောက်ဖြူ စီမံကိန်းများမှာ ပွင့်လင်းမြင်သာမှု အားနည်းခြင်းနှင့် ဒေသခံများ ထိခိုက်နစ်နာမှု များကြောင့်ဟု ဆိုကာ ဆန္ဒထုတ်ဖော်မှုများ ပြုလုပ်လျက် ရှိသည်။
The Voice Weekly
from သစ်ထူးလွင် (နေ့စဉ်သတင်း) - Thit Htoo Lwin http://ift.tt/1puuMei
Comments
Post a Comment