ပြည်ပတင်ပို့ခွင့် ပိတ်ထားသည့် ဝါဂွမ်းနှင့် ချည်မျှင်ပြန်ခွင့်ပြု
ရန်ကုန်၊ မတ် ၂၈
ပြည်ပတင်ပို့ခွင့် ၁၄ နှစ်ကြာ ပိတ်ပင်ထားသည့် လယ်ယာထွက်ကုန် ပစ္စည်းများမှ ဝါဂွမ်းနှင့် ချည်မျှင်ကို ပြန်လည် တင်ပို့ခွင့်ပြုကြောင်း စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနက မတ်လ ၂၈ ရက်နေ့တွင် ထုတ်ပြန် ကြေညာသည်။
၁၉၉၉ ခုနှစ် နိုဝင်ဘာလ ၂၉ ရက်နေ့မှ စတင်ကာ ပြည်တွင်းသုံးစွဲမှု ဖူလုံရေးအတွက် ဝါဂွမ်းနှင့် ချည်မျှင် တင်ပို့မှုကို ပိတ်ပင် ထားခဲ့ပြီးနောက် ၁၄ နှစ်အကြာတွင် ယခုကဲ့သို့ ပြန်လည် ဖွင့်လှစ်ပေးခဲ့ခြင်း ဖြစ်ကြောင်း အဆိုပါ ဝန်ကြီးဌာနထံမှ သိရသည်။
ချည်စက်ရုံများ၏ ကုန်ကြမ်း လိုအပ်ချက်ကြောင့် ပြည်ပတင်ပို့ခွင့် ပိတ်ပင်ခဲ့ခြင်း ဖြစ်ပြီး ယခုအခါ ပြည်တွင်း စိုက်ပျိုး ထုတ်လုပ်သူများ၏ တောင်းဆိုချက်အရ ပြည်ပတင်ပို့ခွင့်ကို ဝန်ကြီးဌာနက ခွင့်ပြုပေးခဲ့ခြင်း ဖြစ်ကြောင်း စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန ကုန်သွယ်မှု မြှင့်တင်ရေး ဦးစီးဌာန ညွှန်ကြားရေးမှူးချုပ် ဦးတိုးအောင်မြင့်က ပြောကြားသည်။
မြန်မာ့ဝါကို တရုတ်ပြည်သူ့ သမ္မတနိုင်ငံနှင့် အိန္ဒိယနိုင်ငံသို့ အဓိက တင်ပို့ဖွယ်ရှိပြီး ပြည်တွင်း၌ ချည်မျှင် ထုတ်လုပ်ရန် နည်းပညာပိုင်း လိုအပ်ချက် ရှိနေကြောင်း ၎င်းကမှတ်ချက်ပြုသည်။
ပြည်တွင်း၌ လက်ခစား အထည်ချုပ် စက်ရုံပေါင်း ၂၀၀ မှ ၃၀၀ ကြားရှိပြီး လုပ်ငန်းအတွက် လိုအပ်သည့် ချည်မျှင်ကိုမူ တရုတ်ပြည်သူ့ သမ္မတနိုင်ငံမှ အဓိကထား တင်သွင်းနေရကြောင်း မြန်မာနိုင်ငံ အထည်ချုပ် လုပ်ငန်းရှင်များအသင်း ဥက္ကဋ္ဌ ဦးမြင့်စိုးက ပြောကြားသည်။
ပြည်ပတင်ပို့ခွင့်ပြုသည့် ကုန်စည်တွင် ချည်မျှင် ပါဝင်သော်လည်း မြန်မာနိုင်ငံတွင် နည်းပညာ လိုအပ်ချက်ကြောင့် ချည်မျှင် ထုတ်လုပ်ရန် အခက်တွေ့နေဆဲ ဖြစ်ကြောင်း အထည်ချုပ် လုပ်ငန်းရှင် အချို့က ဆိုသည်။
ယခုလအတွင်း စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနသည် ပို့ကုန် လိုင်စင်ကြေး ပြန်လည် အပ်နှံရာတွင် ပေးဆောင် ရသည့် ငွေကောက်ခံမှုကိုလည်း ပြန်လည် ဖြေလျှော့ပေးခဲ့ပြီး လာမည့် ကာလများတွင် ပြည်ပသို့ တင်ပို့ခွင့်မပြုသည့် ကုန်ပစ္စည်း အချို့ကိုလည်း ပြန်လည် တင်ပို့ခွင့်ပြုရန် ရှိကြောင်း စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနထံမှ သိရသည်။
from The Voice Weekly's Facebook Wall http://ift.tt/1jG6XTy
Comments
Post a Comment