နိုင်ငံခြားဘဏ်များကို အရေအတွက် ကန့်သတ်ချက်ဖြင့်သာ ခွင့်ပြုမည်ဟုဆို ရန်ကုန်၊ မတ်...

နိုင်ငံခြားဘဏ်များကို အရေအတွက် ကန့်သတ်ချက်ဖြင့်သာ ခွင့်ပြုမည်ဟုဆို



ရန်ကုန်၊ မတ် ၂၆



ပြည်တွင်းတွင် နိုင်ငံခြားဘဏ် လုပ်ငန်းများ အပြည့်အဝ လုပ်ကိုင်ခွင့်ပြုရာတွင် လက်ရှိ ကိုယ်စားလှယ်ရုံးခွဲ ဖွင့်ထားသည့် ဘဏ်များအနက်မှ ရွေးချယ် ကောက်နုတ် ခွင့်ပြုမည် ဖြစ်ကြောင်း မြန်မာနိုင်ငံတော်ဗဟိုဘဏ်မှ တာဝန်ရှိသူ တစ်ဦးက The Voice သို့ ပြောကြားသည်။



နိုင်ငံခြားဘဏ် အားလုံးကို လုပ်ကိုင်ခွင့် မပြုခြင်းသည် အဆိုပါ ဘဏ်များကို ကြီးကြပ်ကွပ်ကဲရာတွင် အခက်အခဲ ဖြစ်နိုင်သည့်အတွက် အဆိုပြုလာသည့် ဘဏ်များအနက်မှ အရည်အချင်း သတ်မှတ်ချက် ပြည့်မီသော၊ ကြီးကြပ် ကွပ်ကဲရန် အဆင်ပြေနိုင်သော အရေအတွက်အထိသာ ခွင့်ပြုရခြင်း ဖြစ်ကြောင်း ၎င်းက ပြောဆိုသည်။



“နိုင်ငံခြားဘဏ် အားလုံးကို ခွင့်ပြုမယ်ဆိုရင် ဒီမှာရှိတဲ့ လူတွေနဲ့ ကြီးကြပ်ကွပ်ကဲဖို့ ခက်ခဲနိုင်တယ်လို့ IMF (အပြည်ပြည်ဆိုင်ရာ ငွေကြေး ရန်ပုံငွေအဖွဲ့) ကလည်း အကြံပေးတာကြောင့် အဆိုပြုသူတွေထဲက Selective ပုံစံနဲ့ ခွင့်ပြုသွားမှာပါ” ဟု ၎င်းက ရှင်းပြသည်။



နိုင်ငံခြားဘဏ် ၁၀ ခုခန့်အထိ ရွေးချယ်ခွင့်ပြုရန် ဆောင်ရွက်လျက် ရှိသည်ဟု ဗဟိုဘဏ် သတင်းရင်းမြစ်များကို ကိုးကား၍ Bangkok Post သတင်းစာကလည်း ရေးသားထားသည်။



“ဘဏ်ဘယ်နှစ်ခုကို ရွေးချယ်ခွင့် ပြုမယ် ဆိုတာကိုတော့ အတိအကျ ပြောဖို့ မလွယ်သေးဘူး” ဟု ဗဟိုဘဏ် ဒုတိယဥက္ကဋ္ဌ ဦးဆက်အောင်က ဆိုသည်။



နိုင်ငံခြားဘဏ်များကို ပြည်တွင်းတွင် လုပ်ကိုင်ခွင့် ပြုခြင်းကို ကြိုဆိုပြီး မြန်မာ့ဘဏ်လုပ်ငန်း ပိုမိုကောင်းမွန်လာနိုင်ကြောင်း ပြည်တွင်း ပုဂ္ဂလိကဘဏ်တစ်ခုမှ အုပ်ချုပ်မှု ဒါရိုက်တာက ပြောကြားသည်။



“နိုင်ငံခြားဘဏ်ကို တကယ်တမ်း ခွင့်ပြုဖို့ လုပ်ချိန်မှာ သူတို့ (ပြည်တွင်း ပုဂ္ဂလိကဘဏ်များ) တွေက စိုးရိမ်မှုတွေ ရှိနေတယ်။ နိုင်ငံခြားဘဏ်တွေက လွှမ်းမိုးသွားမှာကို သူတို့ စိုးရိမ်နေကြတယ်” ဟု ဗဟိုဘဏ်မှ တာဝန်ရှိသူ တစ်ဦးက ဆိုသည်။



နိုင်ငံခြားဘဏ်များ လုပ်ကိုင်ခွင့်ပြုရန် နိုင်ငံတကာ အကြံပေး ကုမ္ပဏီ ခေါ်ယူကာ ဆောင်ရွက်သွားမည် ဖြစ်ပြီး မည်သည့် အချိန်တွင် တင်ဒါ ခေါ်ယူမည်ကို မသိရှိရသေးပေ။



နိုင်ငံခြားဘဏ်များကို ခွင့်ပြုရာတွင် ပြည်တွင်းဘဏ်နှင့် ပြည်ပဘဏ် ဖက်စပ် လုပ်ကိုင်စေပြီး ကုမ္ပဏီ အသစ်တစ်ခု တည်ထောင်ခြင်းနှင့် အပြည့်အဝ ရင်းနှီးမြှုပ်နှံခွင့် ပြုခြင်းတို့သည် နိုင်ငံအတွက် ပိုမို အကျိုးရှိစေမည် ဖြစ်ကြောင်း သမဝါယမဘဏ် ဦးဆောင်ညွှန်ကြားရေးမှူး ဦးဖေမြင့်က ဆိုသည်။



နိုင်ငံခြားဘဏ်များကို ခွင့်ပြုရာတွင် ကန့်သတ်ချက်များဖြင့် ခွင့်ပြုမည် ဖြစ်ပြီး ဘဏ်တစ်ခုလျှင် ဘဏ်ခွဲတစ်ခုသာ လုပ်ကိုင်ခွင့် ပြုခြင်းမျိုးလည်း ဖြစ်နိုင်ကြောင်း ဗဟိုဘဏ် ဒုတိယဥက္ကဋ္ဌ ဦးဆက်အောင်က ဆိုသည်။





from The Voice Weekly's Facebook Wall http://ift.tt/1g2PpJc