ဘူတာကြီး ကညနတွင် ယာဉ်မောင်းလိုင်စင် သက်တမ်းတိုးသူ တစ်ထောင်ကျော်ရှိ
ရန်ကုန်၊ မတ် ၂၉
ကုန်းလမ်းပ်ို့ဆောင်ရေး ညွန်ကြားမှု ဦးစီးဌာန (ကညန) က ယာဉ်မောင်းလိုင်စင် သက်တမ်းတိုး ဆောင်ရွက်ရန် မတ်လဆန်းက အသစ်ဖွင့်လိုက်သည့် ရန်ကုန်ဘူတာကြီးနှင့် ရွာသာကြီးတို့အနက် ရန်ကုန်ဘူတာကြီး သက်တမ်းတိုးရုံးတွင် စတင်ဖွင့်လှစ်သည့် မတ်လ ၄ ရက်မှ ၂၈ ရက်ထိ သက်တမ်းတိုး ဆောင်ရွက်သူ ၁၂၇၃ ဦးရှိကြောင်း ကုန်းလမ်းပို့ဆောင်ရေး ညွန်ကြားမှု ဦးစီးဌာန (ကညန) ဒုတိယဦးစီးမှူး ဒေါ်ညွန်ညွန့်ဝင်းက ပြောကြားသည်။
ရန်ကုန်ဘူတာကြီးတွင် ဖွင့်လှစ်ထားသည့် ယာဉ်မောင်းလိုင်စင် သက်တမ်းတိုးရုံးတွင် မြို့နယ် ၁၁ မြို့နယ်မှ သက်တမ်းတိုးနိုင်ကြောင်း ၎င်းက ဆက်လက် ပြောကြားသည်။
အသစ်ထပ်မံ ဖွင့်လှစ်ထားသည့် သက်တမ်းတိုးသည့် နေရာနှစ်ခုမှာ နယ်ဝင်နယ်ထွက်များ၊ လိုင်စင်ပျောက်ခြင်း၊ ပျက်ခြင်းအတွက် အသစ်ပြုလုပ်ပေးခြင်း မဟုတ်ဘဲ သက်တမ်းတိုးခြင်း သီးသန့်သာ ပြုလုပ်ပေးကြောင်း၊ သက်တမ်းတိုးခြင်းအတွက် အခြားနေရာများကဲ့သို့ လေးရက်ခန့် မစောင့်ရဘဲ ချက်ချင်း ပြုလုပ်ပေးကြောင်း ဒေါ်ညွန့်ညွန့်ဝင်းက ပြောကြားသည်။
ရန်ကုန်ဘူတာကြီး ယာဉ်မောင်းလိုင်စင် သက်တမ်းတိုးရုံးတွင် တာမွေ၊ မင်္ဂလာတောင်ညွန့်၊ ပုဇွန်တောင်၊ ဗိုလ်တထောင်ဆိပ်ကမ်း၊ ကျောက်တံတား၊ လသာ၊ ပန်းဘဲတန်း၊ လမ်းမတော်၊ ဒဂုံ၊ ဗဟန်းမြို့နယ် ၁၁ မြို့နယ်တို့မှ သက်တမ်းငါးနှစ် မကျော်သည့် ယာဉ်မောင်းလိုင်စင်များ သက်တမ်းတိုးခြင်း ဆောင်ရွက်နိုင်ကြောင်း ရန်ကုန်ဘူတာကြီး ယာဉ်မောင်းလိုင်စင် သက်တမ်းတိုးရုံးထံမှ သိရသည်။
ရွာသာကြီးရှိ ကညန ရုံးတွင် ဒဂုံမြို့သစ် (တောင်ပိုင်း)၊ ဒဂုံမြို့သစ် (မြောက်ပိုင်း) နှင့် ဒဂုံမြို့သစ် (အရှေ့ပိုင်း) မြို့နယ်တို့မှ ယာဉ်မောင်း လိုင်စင်များ သက်တမ်းတိုးနိုင်ကြောင်း ကုန်းလမ်းပို့ဆောင်ရေး ညွန်ကြားမှု ဦးစီးဌာနက သိရသည်။
from The Voice Weekly's Facebook Wall http://ift.tt/1f7ZgkX
Comments
Post a Comment