အခြေခံဥပဒေ ပြင်ရန် အချိန်စောသေးကြောင်း ရွေးကောက်ပွဲကော်မရှင် ဥက္ကဋ္ဌ ပြောကြား
ရန်ကုန်၊ မတ် ၂၉
ပြည်ထောင်စုလွှတ်တော်နှင့် နိုင်ငံရေးပါတီများက ဆောင်ရွက်နေသော ဖွဲ့စည်းပုံအခြေခံ ဥပဒေ ပြင်ဆင်ရေး ကိစ္စရပ်မှာ အချိန်စောနေသေးကြောင်း ရွေးကောက်ပွဲကော်မရှင် ဥက္ကဋ္ဌ ဦးတင်အေးက မတ်လ ၂၉ ရက်နေ့တွင် ရန်ကုန်တိုင်းဒေသကြီး လွှတ်တော် အဆောက်အအုံတွင် ပြုလုပ်သော နိုင်ငံတော်သမ္မတ ဦးသိန်းစိန်နှင့် နိုင်ငံရေးပါတီများ တွေ့ဆုံပွဲတွင် ပြောကြားသည်။
ဖွဲ့စည်းပုံအခြေခံ ဥပဒေ ပြင်ဆင်ရေးမှာ အချိန်စောသေးကြောင်း၊ လက်ရှိ ဖွဲ့စည်းပုံကြောင့်သာ တိုင်းပြည်မှာ တည်တည်ငြိမ်ငြိမ် ရှိနေခြင်း ဖြစ်ပြီး ဆန္ဒစောမိပါက တည်ငြိမ်မှု ပျက်သွားနိုင်ကြောင်း ကော်မရှင်ဥက္ကဋ္ဌ ဦးတင်အေးက ပြောဆိုခြင်း ဖြစ်ပြီး ယင်းပြောကြားမှုကို နိုင်ငံရေးပါတီ ခေါင်းဆောင်များက သဘောမတူကြောင်း အသီးသီး တုံ့ပြန် ပြောကြားသည်။
ရွေးကောက်ပွဲကော်မရှင် ဥက္ကဋ္ဌ၏ ယင်းပြောကြားချက်ကို လက်မခံကြောင်း အမျိုးသားဒီမိုကရေစီအဖွဲ့ချုပ် (NLD) ပါတီ အတွင်းရေးမှူး ဦးဉာဏ်ဝင်းက ပြောကြားသည်။
“အခြေခံဥပဒေ ပြင်ဖို့က စောတယ်၊ နှေးတယ်ဆိုတာ မရှိဘူး။ လိုအပ်တဲ့အချိန် ချက်ချင်းပြင်ရမှာပဲ” ဟု ဦးဉာဏ်ဝင်းက ဆိုသည်။
ရခိုင်အမျိုးသားပါတီ (RNP) ဥက္ကဋ္ဌ ဦးအေးသာအောင်ကလည်း ကော်မရှင် ဥက္ကဋ္ဌ၏ ပြောကြားချက်ကို လက်မခံဘဲ ၂၀၀၈ ဖွဲ့စည်းပုံအခြေခံ ဥပဒေကို အဆောတလျင် ပြင်ဆင်ရမည် ဖြစ်ကြောင်း တုံ့ပြန် ပြောကြားသည်။
“ပြည်တွင်းစစ်ကို ရပ်ချင်တယ်ဆိုရင် ၂၀၀၈ (ဖွဲ့စည်းပုံအခြေခံဥပဒေ) ကို မပြင်မဖြစ် ပြင်ဖို့ လိုအပ်တယ်” ဟု ၎င်းက မှတ်ချက်ပြုသည်။
အလားတူ အမျိုးသားဒီမိုကရေစီ အင်အားစုပါတီ (NDF) နှင့် လားဟူအမျိုးသား ဖွံ့ဖြိုးတိုးတက်ရေး ပါတီ ဥက္ကဋ္ဌတို့ကလည်း ဖွဲ့စည်းပုံ ပြင်ဆင်ရန် စောသေးကြောင်း ပြောဆိုမှုကို သဘောမတူကြောင်း အသီးသီး ထုတ်ဖော် ပြောကြားခဲ့ပြီး အမြဲတစေ အချုပ်အခြာအာဏာ ဆိုသော အကြောင်းပြချက်ဖြင့် ပြောဆိုမှုမှာ မသင့်တော်ကြောင်း လားဟူပါတီ ဥက္ကဋ္ဌ ဦးယောသပ်က ပြောဆိုသည်။
NDF ပါတီဥက္ကဋ္ဌ ဦးခင်မောင်ဆွေကလည်း “သူမပြင်ချင်တာက သူ့ကိစ္စလေ။ သူပြောတာနဲ့ မပြင်ဘဲနေရမှာလား။ အခြေခံဥပဒေမှာလည်း ပြင်ဖို့ရာ အခန်း(၁၂) ဆိုတာ ပါနေတာဘဲ” ဟု မှတ်ချက်ပြုသည်။
ဖွဲ့စည်းပုံအခြေခံ ဥပဒေ ပြင်ဆင်ရာတွင် “မည်သည့် မြန်မာနိုင်ငံသား တိုင်းရင်းသား တစ်ဦးကိုမျှ မြန်မာနိုင်ငံကို နိုင်ငံရေးအရ ဦးဆောင်နိုင်ခွင့်ကို ကန့်သတ်တားမြစ်တာမျိုး မဖြစ်စေလိုတဲ့ နိုင်ငံရေး စေတနာ ရှိသလို တစ်ဖက်ကလည်း မိမိတို့အမျိုးသား အကျိုးစီးပွားနှင့် မိမိတို့နိုင်ငံရဲ့ အချုပ်အခြာအာဏာ တည်တံ့ခိုင်မြဲရေးကို မထိပါးစေမည့် သင့်တင့်လျောက်ပတ်တဲ့ အကာအကွယ် ပေးနိုင်သည့် အခြေခံမူများ ရှိရန်လည်း လိုလားပါသည်” ဟု နိုင်ငံတော်သမ္မတ ဦးသိန်းစိန်က သူ၏ သဘောထားကို ပြောကြားခဲ့သည်။
၂၀၀၈ ဖွဲ့စည်းပုံအခြေခံ ဥပဒေ ပြင်ဆင်ရေးအတွက် ဒေါ်အောင်ဆန်းစုကြည် ဦးဆောင်၍ NLD ပါတီက တိုင်းဒေသကြီးနှင့် ပြည်နယ်များတွင် လူထုဆန္ဒခံယူပွဲများ ကျင်းပခဲ့ပြီး ဆန္ဒပြုသူ ၈၀ ရာခိုင်နှုန်းကျော်က ပြင်ဆင်ရန် ထောက်ခံထားကြောင်း ကြေညာထားသည်။
from The Voice Weekly's Facebook Wall http://ift.tt/QtGUCb
Comments
Post a Comment