ကျုံးဘေးတွင် ဈေးရောင်းချသူများကို အရေးယူမည် မန္တလေး၊ မတ် ၂၈ မြန်မာဘုရင်များ နေ...

ကျုံးဘေးတွင် ဈေးရောင်းချသူများကို အရေးယူမည်



မန္တလေး၊ မတ် ၂၈



မြန်မာဘုရင်များ နောက်ဆုံး ထီးနန်းစိုက်ခဲ့ရာ မန္တလေးမြို့တော်ရှိ ကျုံးဘေး ပတ်လည် ပလက်ဖောင်းပေါ်၌ မော်တော်ယာဉ်များဖြင့် လာရောက်ကာ စားသောက်ကုန် ချခင်း ရောင်းချနေသူများကို ဧပြီလဆန်းမှ စတင်ကာ အရေးယူသွားမည် ဖြစ်ကြောင်း မန္တလေးမြို့တော် စည်ပင်သာယာရေး ကော်မတီ အခွန်ဌာန ဌာနခွဲမှူး ဦးမောင်မောင်မြင့်က ပြောကြားသည်။

“အရင်ကတည်းက ခွင့်ပြုထားတာ မရှိဘူး။ အခု တဖြည်းဖြည်းနဲ့ အကဲစမ်းချင်လာတဲ့ သူတွေရှိတော့ ဖမ်းဆီး အရေးယူရတော့မယ်။ အဆင်ပြေရင်တော့ မနက်ဖြန်က စပြီးဖမ်းမယ်။ မနက်ဖြန် မဖမ်းဖြစ်သေးရင်လည်း နောက်အပတ် စဖမ်းမယ်” ဟု ဦးမောင်မောင်မြင့်က ဆိုသည်။



မန္တလေး ကျုံးဘေး ပတ်လည်တွင် ဈေးရောင်းချခြင်းကို ကန့်သတ်ထားပြီး အကယ်၍ ဈေးရောင်းချ နေသည်ကို တွေ့ရှိပါက စည်ပင်သာယာရေး ကော်မတီ အနေနှင့် ဖမ်းဆီးကာ တရားရုံးတွင် တရားစွဲဆိုသွားမည် ဖြစ်ပြီး တရားစွဲ ဆိုခံရပါက ဒဏ်ငွေ ကျပ်တစ်သောင်းမှ အများဆုံး ကျပ်ငါးသောင်းအထိ ဒဏ်ရိုက် အရေးယူခံရမည် ဖြစ်ကြောင်း အဆိုပါဌာနမှ ထပ်မံသိရသည်။



“ကျုံးဘေးမှာ ဈေးမရောင်းရဘူး ဆိုတဲ့ စည်းကမ်းချက်ရှိတာ မသိပါဘူး။ ကျုံးဘေးမှာ ရောင်းတယ် ဆိုတာကလည်း ကျုံးဘေးက လူစည်ကားတော့ လူစည်တဲ့နေရာမှာ ဈေးရောင်းတဲ့ သဘောပါ။ ဖမ်းဆီး အရေးယူမယ်ဆိုတာ မသိရင်တော့ ကျုံးဘေးမှာ ရောင်းနေကြဦးမှာပါပဲ။ ကျွန်တော်တို့လည်း အလုပ်မအားဘူး ဆိုတော့ စည်းကမ်းချက်တွေ ဘာတွေလည်း ဖတ်မနေအားဘူး” ဟု မန္တလေး ကျုံးဘေးတွင် မော်တော်ယာဉ်ဖြင့် ဒိန်ချဉ် ရောင်းချလျက် ရှိသည့် နာမည်ကြီး ဒိန်ချဉ် လုပ်ငန်းရှင်တစ်ဦးက ဆိုသည်။



ယင်းအပြင် သင်္ကြန်ကာလအတွင်း မန္တလေး ကျုံးဘေးတွင် ရွေ့လျား ဈေးသည်များ ဘီယာ၊ အရက် ရောင်းချမှုများ ရှိကြောင်း အဆိုပါ မန္တလေးမြို့ ဒေသခံအချို့က ပြောကြားသည်။

from The Voice Weekly's Facebook Wall http://ift.tt/1pmAikR