ရန်ကုန်၊ မန္တလေး၊ ပဲခူး ဝန်ကြီးချုပ်များ စင်ကာပူ ဝန်ကြီးများနှင့် ရင်းနှီးမြှုပ်န...

ရန်ကုန်၊ မန္တလေး၊ ပဲခူး ဝန်ကြီးချုပ်များ စင်ကာပူ ဝန်ကြီးများနှင့် ရင်းနှီးမြှုပ်နှံမှုဆိုင်ရာ ဆွေးနွေး



ရန်ကုန်၊ မတ် ၁၉



ရန်ကုန်တိုင်းဒေသကြီး ဝန်ကြီးချုပ် ဦးမြင့်ဆွေ၊ မန္တလေးတိုင်းဒေသကြီး ဝန်ကြီးချုပ် ဦးရဲမြင့်၊ ပဲခူးတိုင်းဒေသကြီး ဝန်ကြီးချုပ် ဦးဉာဏ်ဝင်းတို့သည် စင်ကာပူ နိုင်ငံခြားရေးဝန်ကြီး Law K Shanmugam ၏ ဖိတ်ကြားချက်ဖြင့် စင်ကာပူနိုင်ငံ၌ ယင်းနိုင်ငံမှ ဝန်ကြီးများ၊ အာဏာပိုင် အဖွဲ့အစည်းများနှင့် စီးပွားရေး ကိစ္စရပ်များ ဆွေးနွေးနေကြောင်း စင်ကာပူ သံရုံးမှ တာဝန်ရှိသူ တစ်ဦးက The Voice သို့ ပြောကြားသည်။



“လေ့လာရေး ခရီးစဉ်ပါ။ စီးပွားရေး ကိစ္စရပ်တွေ အဓိကထားပြီး သွားကြတာပါ။ စင်ကာပူ အနေနဲ့က မြန်မာနိုင်ငံရဲ့ စီးပွာရေး ကိစ္စရပ်တွေမှာ ပါဝင်မှု များပါတယ်။ ဟံသာဝတီလေဆိပ် ကိစ္စကိုလည်း သူတို့ ပြောကြမှာ။ ဆက်သွယ်ရေး တင်ဒါတို့၊ ဟံသာဝတီ လေဆိပ်တို့လို ဟာတွေမှာ စင်ကာပူ ကုမ္ပဏီတွေ ဝင်ပြိုင်ကြပေမယ့် အဆင်မပြေခဲ့ကြဘူး။ ဒီတော့ စင်ကာပူ ကုမ္ပဏီတွေအတွက် မြန်မာပြည်မှာ စီးပွားရေး အခွင့်အလမ်းတွေ ပိုရအောင် ဆွေးနွေးကြလိမ့်မယ်။ အခုဆို အိမ်၊ ခြံ၊ မြေနဲ့ အိမ်ရာ လုပ်ငန်းတွေမှာ စင်ကာပူက ဝင်လာတာတွေ အများကြီးပဲလေ” ဟု ၎င်းကဆိုသည်။



၎င်းတို့ တွေ့ဆုံရာတွင် စီးပွားရေး ဖွံ့ဖြိုးရေး၊ မြို့ပြစီမံကိန်းနှင့် ရေအရင်းအမြစ် စီမံခန့်ခွဲမှု မူဝါဒများ၊ လူ့စွမ်းအား အရင်းအမြစ် တိုးတက်ရေး နည်းလမ်းများ ဖော်ဆောင်ရေးနှင့် နိုင်ငံခြား ရင်းနှီးမြှုပ်နှံမှု များကို အဓိကထား ဆွေးနွေးခဲ့ကြောင်း စင်ကာပူ နိုင်ငံခြားရေး ဝန်ကြီးဌာနက ဆိုသည်။



တိုင်းဒေသကြီး ဝန်ကြီးချုပ်များသည် စင်ကာပူနိုင်ငံ၏ ဂုဏ်ထူးဆောင် ဝန်ကြီးချုပ်ဟောင်း GohChok Tong၊ အမျိုးသား ဖွံ့ဖြိုးရေး ဝန်ကြီးဌာန ဝန်ကြီး Khaw Boon Wan၊ ပညာရေးနှင့် ဥပဒေရေးရာ ဝန်ကြီး Indranee Rajah၊ စက်မှုနှင့် ကုန်သွယ်ရေးဝန်ကြီး TeoSer Luck တို့နှင့်လည်း တွေ့ဆုံခဲ့ပြီး စီးပွားရေး ဖွံ့ဖြိုးရေး ဘုတ်အဖွဲ့၊ အိမ်ရာဖွံဖြိုးရေး ဘုတ်အဖွဲ့၊ မြို့ပြ ပြန်လည် ဖွံ့ဖြိုးရေး အာဏာပိုင်အဖွဲ့၊ ပြည်သူ့ရေးရာ ဘုတ်အဖွဲ့နှင့် International Enterprise Singapore တို့နှင့်လည်း တွေ့ဆုံကာ စီးပွားရေး အခွင့်အလမ်းများနှင့် ပတ်သက်၍ ဆွေးနွေးခဲ့ကြောင်းစင်ကာပူ သံရုံးထံမှ သိရှိရသည်။



“ဆက်သွယ်ရေး အော်ပရေတာ ရွေးတုန်းက SingTel ဝင်ပြိုင်ပေမယ့် နောက်ဆုံး အဆင့်မှာ ပြုတ်သွားတယ်။ ဟံသာဝတီလေဆိပ် ကိစ္စမှာလည်း စင်ကာပူ ကုမ္ပဏီတွေက အရန်အနေနဲ့ပဲ အရွေးခံခဲ့ရတယ်လေ။ အဲဒါကြောင့် နောက်ဝင်လာမယ့် လူတွေ ဘာတွေ ကြိုပြင်လာရမလဲ ဆိုတာ သိချင်လို့ ဖိတ်ပြီး ဆွေးနွေးတာ ဖြစ်လိမ့်မယ်။ စင်ကာပူ လုပ်ငန်းရှင်တွေနဲ့ ဒီက အစိုးရ ဝန်ကြီးတွေကို ပေးတွေ့ပြီး ရင်းနှီးအောင် လုပ်ထားစေချင်တာလည်း ဖြစ်နိုင်တယ်” ဟု ပြည်ထောင်စုသမ္မတ မြန်မာနိုင်ငံ ကုန်သည်များနှင့် စက်မှုလက်မှု လုပ်ငန်းရှင်များ အသင်းချုပ် (UMFCCI) မှ တာဝန်ရှိသူ တစ်ဦးက ဆိုသည်။



၂၀၁၃ ခုနှစ်အတွင်း စင်ကာပူ-မြန်မာ နှစ်နိုင်ငံ အပြန်အလှန် ကုန်သွယ်မှု ပမာဏမှာ အမေရိကန်ဒေါ်လာ ၂ ဒသမ ၃ ဘီလီယံ ရှိပြီး မြန်မာနိုင်ငံတွင် စင်ကာပူနိုင်ငံမှ လာရောက် ရင်းနှီးမြှုပ်နှံထားသည့် ပမာဏမှာ အမေရိကန်ဒေါ်လာ ၃ ဒသမ ၈ ဘီလီယံကျော် ရှိသည်။

from The Voice Weekly's Facebook Wall http://ift.tt/1iit2Up