တောင်သူလယ်သမား ဖွံ့ဖြိုးတိုးတက်ရေးပါတီ တိုင်းဒေသကြီး လေးခုတွင် ယှဉ်ပြိုင်မည်ဟုဆို
ပုသိမ်၊ မတ် ၂၃
မြန်မာနိုင်ငံ တောင်သူလယ်သမား ဖွံ့ဖြိုးတိုးတက်ရေး ပါတီက ၂၀၁၅ ခုနှစ်တွင် ကျင်းပမည့် ရွေးကောက်ပွဲတွင် တိုင်းဒေသကြီး လေးခုတွင် ဝင်ရောက် ယှဉ်ပြိုင်မည် ဖြစ်ကြောင်း ယင်းပါတီ ဥက္ကဋ္ဌ ဦးကျော်စွာစိုးက ပြောကြားသည်။
ပုသိမ်မြို့ ကန်သာယာ ပြည်ထောင်စုကွင်းတွင် မတ်လ ၂၂ ရက်နေ့က ကျင်းပသည့် မြန်မာနိုင်ငံ တောင်သူလယ်သမား ဖွံ့ဖြိုးတိုးတက်ရေး ပါတီနှင့် ဒေသခံ လယ်သမား ပါတီဝင်များ တွေ့ဆုံ မိတ်ဆက်ပွဲတွင် ဦးကျော်စွာစိုးက ပြောကြားခဲ့ခြင်း ဖြစ်သည်။
ယင်းတွေ့ဆုံပွဲတွင် တောင်သူလယ်သမား အများစုမှာ ဆင်းရဲတွင်းနက်သည့် အပြင် မြန်မာနိုင်ငံတွင် အနှိမ်အခံရဆုံး လူတန်းစားများ ဖြစ်ကြကြောင်း၊ စပါးပွဲစားက မယားငယ်ထား၍ စက်ပိုင်က တိုက်ဆောက်နေချိန်တွင် လယ်သမား အများစုမှာ ဗိုက်မှောက်နေကြရကြောင်း၊ လယ်သမားများမှာ ခါးတောင်းကျိုက်ပြီး လုပ်ကိုင်နေရသော်လည်း ကျောမွဲဘဝမှ မတက်ကြရခြင်းကြောင့် ယင်းသို့ ယှဉ်ပြိုင်ရခြင်း ဖြစ်ကြောင်း ၎င်းက ရှင်းပြသည်။
“ဥပဒေကို လယ်သမား အများစုက နားမလည်ကြဘူး။ ဥပဒေ နားလည်တဲ့ လူတစ်စုက ဥပဒေ နားမလည်တဲ့ လူထုကို ဥပဒေ စကားလုံးတွေ သုံးပြီး ဖိနှိပ်မှုများ လုပ်ခဲ့တာကြာပြီ။ လယ်သမားတွေမှာ ပြောပိုင်ခွင့်သာ ရှိပြီး လုပ်ပိုင်ခွင့် မရှိကြဘူး” ဟု ၎င်းကဆိုသည်။
ပုသိမ်မြို့တွင် ကျင်းပသော အဆိုပါ ဆွေးနွေးပွဲကို ဧရာဝတီတိုင်း ဒေသကြီး ရွေးကောက်ပွဲ ကျင်းပရေး ကော်မရှင် အဖွဲ့ခွဲက ခွင့်ပြုထားပြီး ဖြစ်ကြောင်း၊ ချောင်းသာ ဒေသတွင် မတ်လ ၂၂ ရက်နေ့က ပါတီရုံးခွဲ တစ်ခု ထပ်မံ ဖွင့်ခဲ့ကြောင်း ဆွေးနွေးပွဲသို့ ပုသိမ်မြို့နယ်၊ သာပေါင်းမြို့နယ်၊ ကန်ကြီးထောင့် မြို့နယ်၊ ရေကြည်မြို့နယ်၊ ငပုတော မြို့နယ် အတွင်းရှိ မြို့နယ်ခွဲနှင့် ကျေးရွာ အသီးသီးမှ ပါတီဝင် တောင်သူလယ်သမား ၃၀၀ ခန့် တက်ရောက်ခဲ့ကြောင်း မြန်မာနိုင်ငံ တောင်သူလယ်သမား ဖွံ့ဖြိုးတိုးတက်ရေး ပါတီ ဧရာဝတီတိုင်းဒေသကြီး၏ တိုင်းစည်းရုံးရေး အဖွဲ့ဝင် ဦးသန်းဝင်းက ပြောကြားသည်။
“ကျွန်တော်တို့က လယ်သမားအရေး ဆောင်ရွက်ပေးမယ့် လူကိုပဲ မဲပေးမှာပါ။ လွှတ်တော်ထဲမှာ လယ်သမားအရေး ပြောဆိုပေးမယ့် အမတ်တွေ နည်းနေပါတယ်” ဟု ပုသိမ်မြို့နယ် ဂွေးချောင်းရွာမှ လယ်သမားကြီး ဦးကုလားက ပြောကြားသည်။
မြန်မာနိုင်ငံ တောင်သူလယ်သမား ဖွံ့ဖြိုးတိုးတက်ရေး ပါတီသည် မြန်မာနိုင်ငံရှိ အခြေခံ လူတန်းစား ဖြစ်သော လယ်သမားများကို ကိုယ်စားပြုကြောင်း၊ လယ်သမား အများစုရှိသော ဧရာဝတီတိုင်း၊ ရန်ကုန်တိုင်း၊ ပဲခူးတိုင်းနှင့် မကွေးတိုင်းတို့တွင် ပါတီရုံးခွဲပေါင်း ၃၃ ရုံး ရှိပြီး ပါတီဝင် တစ်သန်းခွဲခန့် ရှိကြောင်း ယင်းပါတီ မှတ်တမ်းများအရ သိရှိရသည်။
from The Voice Weekly's Facebook Wall http://ift.tt/1hdHsSr
Comments
Post a Comment