ရန်ကုန်လေဆိပ်တွင် ပြည်ပထွက်ခွာမည့် အိန္ဒိယနိုင်ငံသားထံမှ ရွှေတုံးများတွေ့
ရန်ကုန်၊ မတ် ၂၉
ရန်ကုန်အပြည်ပြည်ဆိုင်ရာ လေဆိပ်တွင် မတ်လ ၂၇ ရက် မွန်းလွဲ ၂ နာရီ ၄၅ မိနစ်ခန့်က မလေးရှားလေကြောင်းလိုင်း ခရီးစဉ်အမှတ် ၇၄၃ ဖြင့် မလေးရှားနိုင်ငံသို့ လိုက်ပါမည့် အသက် ၄၃ နှစ်အရွယ် အိန္ဒိယနိုင်ငံသား အမျိုးသားထံမှ စုစုပေါင်း ရွှေအလေးချိန် နှစ်ပိဿာခန့်ရှိ အကယ်ဒမီ စာတန်းပါ ရွှေတုံးများ တွေ့ရှိခဲ့ကြောင်း လေဆိပ်အကောက်ခွန် ဦးစီးဌာနထံမှ သိရှိရသည်။
အိန္ဒိယနိုင်ငံ ချင်းနိုင်မြို့တွင်နေသူ Mr. Jaffar Mohamed Shafi သည် မြန်မာနိုင်ငံသို့ အလည်ဗီဇာဖြင့် ရောက်ရှိခဲ့ပြီး ယင်းနေ့က မလေးရှားလေကြောင်းလိုင်း ခရီးစဉ်အမှတ် MH-743 ဖြင့် မွန်းလွဲ ၃ နာရီတွင် ပြည်ပထွက်ခွာ X-Rays စစ်ဆေးရေးဂိတ်၌ ၎င်း၏ ခရီးဆောင် ကျောပိုးအိတ်ကို စစ်ဆေးခဲ့ရာမှ အိတ်အတွင်း ပလတ်စတစ် အနက်ဖြင့် ထုပ်ပိုးကာ တိပ်အနက်ရောင်ဖြင့် ပတ်ထားသော ကျပ်သိန်း ၁၃၀၀ ခန့်ရှိ ရွှေတုံးများကို တွေ့ရှိခဲ့ကြောင်း မင်္ဂလာဒုံ မြို့မရဲစခန်းမှ ရဲအရာရှိတစ်ဦးက ပြောကြားသည်။
“ရွှေတုံးတစ်တုံးကို တစ်ဆယ်ကျပ်သား ရှိပြီး ရွှေတုံး စုစုပေါင်း ၂၀ တုံးကို ခွင့်ပြုချက် မရှိဘဲ ပြည်ပကို သယ်ယူဖို့ ကြိုးစားတာကြောင့် လတ်တလောမှာ လေဆိပ်အကောက်ခွန် ဦးစီးဌာနက အကောက်ခွန် ဥပဒေနဲ့အညီ အရေးယူဖို့ ဆောင်ရွက်နေပြီး ရဲစခန်းမှ သူ့ကို ထိန်းသိမ်းထားပါတယ်” ဟု ၎င်းက ရှင်းပြသည်။
ပြုပြင်ပြီးသား ရွှေထည် လက်ဝတ်ရတနာများကို ပြည်ပသို့ သယ်ဆောင်ရာတွင် သက်ဆိုင်ရာ အခွန်ဌာနတွင် ပစ္စည်းတန်ဖိုးအလိုက် အခွန်ဆောင်ရန် လိုအပ်ကြောင်း၊ အိန္ဒိယနိုင်ငံသားက ရွှေတုံးများကို တရားဝင် အခွန်မဆောင်ဘဲ သယ်ဆောင်မည် ဆိုပါက အကောက်ခွန် ဥပဒေနှင့် အရေးယူခံရဖွယ် ရှိကြောင်း မြန်မာနိုင်ငံ ရွှေလုပ်ငန်းရှင်များ အသင်းမှ တာဝန်ရှိသူတစ်ဦးက ပြောကြားသည်။
from The Voice Weekly's Facebook Wall http://ift.tt/1f819y6
Comments
Post a Comment