မဟာမဲခေါင် နယ်စပ်ဖြတ်ကျော် ကုန်တင်ယာဉ်တစ်စီး ထိုင်းနိုင်ငံသို့ စမ်းသပ် စေလွှတ်မည်...

မဟာမဲခေါင် နယ်စပ်ဖြတ်ကျော် ကုန်တင်ယာဉ်တစ်စီး ထိုင်းနိုင်ငံသို့ စမ်းသပ် စေလွှတ်မည်



ရန်ကုန်၊ မတ်လ ၂၄



မဟာမဲခေါင် ဒေသတွင်း ခြောက်နိုင်ငံ၏ နယ်စပ်ဖြတ်ကျော် ကုန်စည်ပို့ဆောင်ရေး အစီအစဉ်အရ မြန်မာကုန်တင်ယာဉ် တစ်စီးကို ထိုင်းနိုင်ငံသို့ စမ်းသပ် စေလွှတ်မည် ဖြစ်ကြောင်း အပြည်ပြည်ဆိုင်ရာ ကုန်စည်ပို့ဆောင်ရေး ဝန်ဆောင်မှု လုပ်ငန်းရှင်များ အသင်းမှ အမှုဆောင် ဒါရိုက်တာ ဦးအောင်ခင်မြင့်က ပြောကြားသည်။



လာမည့် ဧပြီလတွင် အဆိုပါ ကုန်တင်ယာဉ်ကို ထိုင်းနိုင်ငံသို့ စေလွှတ်မည် ဖြစ်ပြီး ကုန်ကြောင်းဖြင့် ကုန်သွယ်မှု လုပ်ရာတွင် မြေပြင် အခက်အခဲကို ပကတိ သိရှိရန်အတွက် စမ်းသပ် စေလွှတ်ခြင်း ဖြစ်သည်ဟု ၎င်းကဆိုသည်။



“ဖမ်းချင်တာဖမ်း၊ အဲလို အခက်အခဲတွေကိုသိအောင်လို့ လွှတ်လိုက်တာ” ဟု ၎င်းကဆိုသည်။



ရန်ကုန်-မဲဆောက် လမ်းတစ်လျှောက် ကုန်သွယ်မှု အဟန့်အတား ဖြစ်စေသော အချက်အလက် အမှန်ကို သိရှိမှသာ အစိုးရနှင့် ညှိနှိုင်း ဖြေရှင်းနိုင်မည် ဖြစ်သည်ဟု အဆိုပါ အစီအစဉ်တွင် ပါဝင်သည့် အဝေးပြေး ကုန်စည်ပို့ဆောင်ရေး ဝန်ဆောင်မှု လုပ်ငန်းရှင်များ အသင်း၏ အတွင်းရေးမှူး ဦးကိုကိုနိုင်က ရှင်းပြသည်။



“ဒီအစီအစဉ် ပြီးလို့ အဟန့်အတားတွေ မရှိတော့ရင် ကုန်စည်စီးဆင်းမှု ပိုကောင်းသွားမယ်။ ဒီက ကုန်တွေကို ဟိုဘက်အထိ ကားလမ်းကနေ အဟန့်အတား မရှိဘဲ တိုက်ရိုက်ပို့လို့ ရမယ်။ စမ်းသပ်လွှတ်မယ့် ကားက ရန်ကုန်ကနေ မြဝတီ တစ်ဖက်ကမ်း မဲဆောက်အထိ သွားမယ်။ ဘာကုန်စည်တင်မလဲ ဆိုတော့ မသိရသေးဘူး” ဟု ၎င်းက ပြောကြားသည်။



ပြည်တွင်း၌ ကုန်ချောထုတ်လုပ်မှု အားနည်းခြင်းကြောင့် မဟာမဲခေါင် နယ်စပ်ဖြတ်ကျော် ကုန်စည်ပို့ဆောင်ရေး အစီအစဉ် အောင်မြင်ပါကလည်း မြန်မာနိုင်ငံမှ လယ်ယာထွက်ကုန်များ ကိုသာ ထိုင်းနိုင်ငံသို့ အဓိက တင်ပို့နိုင်မည်ဟု ၎င်းကသုံးသပ်သည်။



ထိုင်းနိုင်ငံသည် လာမည့် ၂၀၁၅ အာဆီယံ စီးပွားရေး အသိုက်အဝန်း ဖြစ်ပေါ်ချိန်တွင် မြန်မာနိုင်ငံနှင့် နယ်စပ်ကုန်သွယ်မှုကို သုံးဆအထိ မြှင့်ရန် သဘောတူညီထားသည်ဟု စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနထံမှ သိရသည်။



မဟာမဲခေါင်ဒေသ နယ်စပ်ဖြတ်ကျော် ကုန်စည်ပို့ဆောင်ရေး အစီအစဉ်ကို မြန်မာနိုင်ငံ အပြည်ပြည်ဆိုင်ရာ ကုန်စည်ပို့ဆောင်ရေး ဝန်ဆောင်မှု လုပ်ငန်းရှင်များ အသင်း MIFFA၊ အဝေးပြေး ကုန်စည် ပို့ဆောင်ရေး ဝန်ဆောင်မှု လုပ်ငန်းရှင်များ အသင်း၊ အကောက်ခွန် ရှင်းလင်းရေး ဝန်ဆောင်မှု လုပ်ငန်းရှင်များ အသင်း၊ ပြည်ထောင်စုသမ္မတ မြန်မာနိုင်ငံ ကုန်သည်များနှင့် စက်မှုလက်မှု လုပ်ငန်းရှင်များ အသင်းချုပ် (UMFCCI) နှင့် ကုန်သေတ္တာတင် ယာဉ်အသင်းတို့ ပူးပေါင်း လုပ်ဆောင်မည် ဖြစ်ကြောင်း အဝေးပြေး ကုန်စည်ပို့ဆောင်ရေး ဝန်ဆောင်မှု လုပ်ငန်းရှင်များ အသင်းထံမှ သိရသည်။

from The Voice Weekly's Facebook Wall http://ift.tt/1gkVBRD