ပြည်ပနိုင်ငံသား ခံယူထားသော မြန်မာများကို ဗီဇာကြေး ပိုကောက်ခံခြင်း မရှိဟုဆို
နေပြည်တော်၊ မတ် ၂၄
အာရှနှင့် ဥရောပနိုင်ငံများသို့ အကြောင်း အမျိုးမျိုးကြောင့် ရောက်ကာ ပြည်ပနိုင်ငံသား ခံယူထားသော မြန်မာများ မြန်မာနိုင်ငံသို့ ပြန်လာချိန်တွင် ပြည်ဝင်ခွင့် ဗီဇာကြေး ပိုမို ကောက်ခံသည်မျိုး မရှိကြောင်း လူဝင်မှုကြီးကြပ်ရေးနှင့် ပြည်သူ့အင်အား ဝန်ကြီးဌာနမှ ဒုတိယဝန်ကြီး ဦးကျော်ကျော်င်းက ပြောသည်။
ပြည်ပနိုင်ငံသား ခံယူထားသူ မြန်မာများကို ဗီဇာကြေး ပိုမို ကောက်ခံနေသည့် သတင်းများ ကြားနေရပြီး ယင်းကိစ္စများသည် မှန်ကန်မှု ရှိ မရှိကို သက်ဆိုင်ရာ ဝန်ကြီးဌာနက ရှင်းလင်းပေးရန် မလှိုင် မဲဆန္ဒနယ်မှ ပြည်သူ့လွှတ်တော် ကိုယ်စားလှယ် ဦးအေးမောက်က မတ်လ၂၄ ရက်နေ့တွင် ကျင်းပသည့် ပြည်သူ့လွှတ်တော် အစည်းအဝေးတွင် မေးမြန်းရာ ၎င်းက ယင်းသို့ ဖြေကြားခဲ့ခြင်း ဖြစ်သည်။
မြန်မာနိုင်ငံအတွင်း ဝင်ရောက်သော မြန်မာနိုင်ငံသားဟောင်း များကို နိုင်ငံခြားသားများအပေါ် ကောက်ခံသည့် ပြည်ဝင်ကြေးနှင့် တန်းတူသာ ကောက်ခံနေကြောင်း ဦးကျော်ကျော်ဝင်းက ဆိုသည်။
ပြည်ပနိုင်ငံသား ခံယူထားသည့် မြန်မာများနှင့် နိုင်ငံခြားသားများ အတွက် ဗီဇာကြေးကို စနစ်သုံးခုဖြင့် ကောက်ခံနေပြီး Business Visa ကို အမေရိကန်ဒေါ်လာ ၅၀ နှုန်းဖြင့် နေထိုင်ခွင့်ရက် ၇၀၊ Entry Visa (Metting, Workshop) ကို အမေရိကန်ဒေါ်လာ ၄၀ နှုန်းဖြင့် ခွင့်ပြုရက် ၂၈ ရက်နှင့် Transit Visa ကို အမေရိကန်ဒေါ်လာ ၂၀ နှုန်းဖြင့် နေထိုင်ခွင့် ၂၄ နာရီ ခွင့်ပြုချက် သတ်မှတ်ပေးထားကြောင်း ၎င်းက ဆိုသည်။
ယင်းသို့ သတ်မှတ်ပေးထားသည့် ရက် အကန့်အသတ်သည် အခြားနိုင်ငံများနှင့် နှိုင်းယှဉ်ပါက လွန်စွာ နည်းပါးနေကြောင်း မြန်မာနိုင်ငံသို့ ပြန်လည် အခြေချ နေထိုင်ရန် စီစဉ်နေသည့် အမေရိကန်နိုင်ငံသား မြန်မာလူမျိုး တစ်ဦးက ဆိုသည်။
အဆိုပါ သတ်မှတ်ထားသည့် ကောက်ခံနှုန်းများ အတိုင်းသာ ကောက်ခံသည်မှာ မှန်ကန်ကြောင်း၊ ပြည်ပရောက် မြန်မာနိုင်ငံသားနှင့် နိုင်ငံခြားသားများကို ဗီဇာကြေး ကောက်ခံမှုကို ခွဲခြားထားမှု မရှိကြောင်း ၎င်းက ပြောသည်။
၁၉၈၈ ခုနှစ် ဒီမိုကရေစီ အရေးတော်ပုံ နောက်ပိုင်းတွင် မြန်မာနိုင်ငံသား အချို့သည် အကြောင်းအမျိုးမျိုးကြောင့် အမေရိကန်ပြည်ထောင်စု၊ ကနေဒါ၊ ဗြိတိန်၊ နော်ဝေ၊ သြစတြေးလျ စသည့် နိုင်ငံများသို့ ပြောင်းရွှေ့ကာ ပြည်ပနိုင်ငံသား ခံယူခဲ့ကြသည်။
from The Voice Weekly's Facebook Wall http://ift.tt/OUg7NZ
Comments
Post a Comment