အင်ဒိုဘိလပ်မြေ ကုမ္ပဏီ ဇွန်လအတွင်း ပြည်တွင်းလုပ်ငန်းများ စတင်နိုင်ရန် ရည်မှန်း ရ...

အင်ဒိုဘိလပ်မြေ ကုမ္ပဏီ ဇွန်လအတွင်း ပြည်တွင်းလုပ်ငန်းများ စတင်နိုင်ရန် ရည်မှန်း



ရန်ကုန်၊ မတ် ၂၆



မြန်မာနိုင်ငံတွင် ဘိလပ်မြေစက်ရုံ တည်ဆောက်ရန် ပြင်ဆင်နေသည့် အင်ဒိုနီးရှားနိုင်ငံ၏ အကြီးဆုံး ဘိလပ်မြေထုတ် ကုမ္ပဏီ PT Semen Indonesia က ဇွန်လအတွင်း ပြည်တွင်း ကုမ္ပဏီတစ်ခုနှင့် ပူးပေါင်းကာ လုပ်ငန်း စတင်နိုင်ရန် ရည်ရွယ်ထားကြောင်း ယင်းကုမ္ပဏီမှ ဒါရိုက်တာအဖွဲ့ ဥက္ကဋ္ဌ Mr. DwiSoetjipto က ပြောကြားသည်။



၎င်းတို့နှင့် ပူးပေါင်းမည့် မိတ်ဖက် ကုမ္ပဏီကို ရှယ်ယာ ၄၀ ရာခိုင်နှုန်းအထိ ပိုင်ဆိုင်ခွင့် ပေးသွားမည် ဖြစ်ကာ အမေရိကန်ဒေါ်လာ သန်း ၂၀၀ မှ ၃၀၀ အထိ ရင်းနှီးမြှုပ်နှံသွားမည်ဟု ဆိုသည်။



“လက်ရှိမှာ မိတ်ဖက်ကုမ္ပဏီကို ပြည်တွင်းမှ ဘိလပ်မြေ ထုတ်လုပ်တဲ့ ကုမ္ပဏီ နှစ်ခုထဲကနေ ရွေးချယ်နေပါတယ်။ ကုမ္ပဏီ နှစ်ခုလုံးအတွက် အခွင့်အရေးကောင်း တစ်ခုပါ။ မြန်မာပြည်မှာက ဘိလပ်မြေစက်ရုံ များများစားစား မရှိဘူးလေ၊ ဒါအခွင့်အလမ်းကောင်းပါပဲ” ဟု PT Semen Indonesia ကုမ္ပဏီမှ ဘဏ္ဍာရေး အရာရှိ Ahyanizzaman က ဆိုသည်။



Semen Indonesia ကုမ္ပဏီ အနေဖြင့် လက်ရှိတွင် မြေနေရာ၊ ဈေးကွက် အနေအထားနှင့် အစိုးရ အာဏာပိုင်များ၏ ခွင့်ပြုချက် ရရှိရန် ပြင်ဆင်နေပြီး လိုအပ်သည့် ချေးငွေများ ရရှိနိုင်ရန် ဘဏ်များနှင့် ဆွေးနွေးနေကြောင်း၊ စီမံကိန်းအရ ၂၀၁၇ ခုနှစ်မှ စတင်ကာ တစ်နှစ်လျှင် ဘိလပ်မြေတန် နှစ်သန်းခန့် ထုတ်လုပ်နိုင်ရန် ရည်ရွယ်ပြီး အရှေ့တောင်အာရှေ ဈေးကွက်သို့ တင်ပို့ ရောင်းချသွားမည် ဖြစ်သည်ဟု ကုမ္မဏီက ကြေညာထားသည်။



“လက်ရှိမှာကတော့ SCG ကထုတ်တဲ့ ဆင်တံဆိပ် ဘိလပ်မြေက တော်တော်ရောင်းရတယ်။ ဆောက်လုပ်ရေး စီမံကိန်း အကြီးတွေ တောက်လျှောက် လုပ်နေတဲ့အတွက် ဒီလုပ်ငန်းက အခွင့်အလမ်း အကြီးကြီး ဖြစ်လာတာ။ ပြည်ပကုမ္ပဏီတွေက ရင်းနှီးမြှုပ်နှံမှုလုပ်ဖို့ သူတို့ နိုင်ငံဘဏ်တွေဆီကနေ လွယ်လွယ် ငွေချေးပြီးလာတာ။ ဒီမှာက မရဘူး။ အဲဒီတော့ လုပ်ချင်ပေမယ့် လုပ်ခွင့်မရှိတဲ့ ကုမ္ပဏီတွေ အများကြီးပဲ။ သူတို့လို ပံ့ပိုးမှုမျိုး မလုပ်နိုင်ရင် သူတို့ စက်ရုံတွေကြီးပဲ ဖြစ်သွားမယ်” ဟု တောင်ဒဂုံ စက်မှုဇုန်ရှိ စက်မှုလက်မှု ကုမ္ပဏီတစ်ခု၏ အုပ်ချုပ်မှု ဒါရိုက်တာ ဦးရန်နောင်က ဆိုသည်။



Semen Indonesia ၏ အာဆီယံ ဒေသတွင်း အဓိကပြိုင်ဘက် ဖြစ်သည့် ထိုင်းဘိလပ်မြေ ကုမ္ပဏီ Siam Cement Group (SCG) ကလည်း အမေရိကန်ဒေါ်လာ သန်း ၃၈၈ သန်း ရင်းနှီးမြှုပ်နှံ၍ မော်လမြိုင်တွင် ဘိလပ်မြေစက်ရုံ တည်ဆောက်နေပြီး တစ်နှစ်လျှင် ဘိလပ်မြေ တန်ချိန် ၁ ဒဿမ ၈ သန်းခန့် ထုတ်လုပ်သွားမည် ဖြစ်သည်။



၂၀၁၃ ခုနှစ်က မြန်မာနိုင်ငံ၏ ပြည်တွင်း ဘိလပ်မြေ ဝယ်လိုအားမှာ တန်ချိန် ၄ သန်းကျော် ရှိပြီး လာမည့် ၅ နှစ်အတွင်း ဘိလပ်မြေ လိုအပ်ချက် ပမာဏ ၁၀ ရာခိုင်နှုန်းစီ နှစ်စဉ် ပိုမို လိုအပ်လာနိုင်ကြောင်း နိုင်ငံတကာမှ သုတေသန အစီရင်ခံစာများတွင် ပါရှိသည်။



မြန်မာနိုင်ငံ နိုင်ငံခြား ရင်းနှီးမြှုပ်နှံမှု ဥပဒေအရ ပြည်ပ ရင်းနှီးမြှုပ်နှံမှုဖြင့် ဘိလပ်မြေ ထုတ်လုပ်သည့် လုပ်ငန်းသည် ပတ်ဝန်းကျင် ထိခိုက်မှု ဆန်းစစ်ချက် လိုအပ်သည့် လုပ်ငန်းအမျိုးအစား တစ်ခုဖြစ်ပြီး ပတ်ဝန်းကျင်ထိခိုက်မှုနှင့် လူမှုရေး ထိခိုက်မှု မရှိစေရန် (သို့မဟုတ်) အနည်းဆုံး ဖြစ်စေရန် EIA၊ SIA လေ့လာမှုများကို တင်ပြမှသာ လုပ်ကိုင်ခွင့် ပြုမည်ဟု သတ်မှတ်ထားသည်။

from The Voice Weekly's Facebook Wall http://ift.tt/1gswcWd