ထားဝယ်သင်္ကြန် သံချပ်အဖွဲ့များ ကားဖြင့် လှည့်လည် ဖျော်ဖြေမည်
ထားဝယ်၊ မတ် ၁၃
ယခုနှစ် မြန်မာ့ရိုးရာ မဟာသင်္ကြန် ပွဲတော်တွင် သင်္ကြန် သံချပ်အဖွဲ့များ ဌာနဆိုင်ရာ မဏ္ဍပ်များ၌ ဖျော်ဖြေခွင့် မရပါက ဒေသအတွင်းတွင် မော်တော်ယာဉ် များဖြင့် လှည့်လည် ဖျော်ဖြေမည် ဖြစ်ကြောင်း ယင်းအဖွဲ့များထံမှ သိရသည်။
ပြီးခဲ့သည့်နှစ် သင်္ကြန်က ဌာနဆိုင်ရာ မဏ္ဍပ်များတွင် ဖျော်ဖြေရန် ခွင့်ပြုထားသည့် အချိန်ဇယားများ အတိုင်း သွားရောက်ခဲ့သော်လည်း အချို့ဌာနဆိုင်ရာ မဏ္ဍပ်များသည် အချိန် အနည်းငယ်သာ ဖျော်ဖြေခွင့် ပြုခြင်း၊ ဖျော်ဖြေခွင့် မပေးခြင်းတို့ ကြုံတွေ့ခဲ့ရကြောင်း ၎င်းတို့က ပြောကြားသည်။
“မဏ္ဍပ်တွေမှာ ဖျော်ဖြေရတာ မျက်နှာငယ်လို့ ကားအပေါ် ဖောင်ဆင်ပြီး တစ်ခါတည်း ဖျော်ဖြေလို့ ရအောင် စီစဉ်ထားတယ်” ဟု ကြက်စားပြင် ရပ်ကွက် အားသစ် လူငယ်အဖွဲ့မှ ဦးဌေးကိုက ဆိုသည်။
ရန်ကုန်တွင် သင်္ကြန်၌ ပြိုင်ပွဲဝင်ရန်နှင့် ဖျော်ဖြေရန် သံချပ်အဖွဲ့များ စတင် ပြင်ဆင်နေပြီ ဖြစ်သော်လည်း ထားဝယ်တွင် ယနေ့အထိ မည်သို့ လုပ်ဆောင်ရမည်ကို ပြောဆို အသိပေးလာခြင်း မရှိသေးကြောင်း တက္ကသိုလ်ပေါင်းစုံ (ထားဝယ်) ကျောင်းသားများ သံချပ်အဖွဲ့မှ ဦးစည်သူနိုင်က ပြောဆိုသည်။
“မဏ္ဍပ်တွေမှာ ဖျော်ဖြေခွင့် မရရှိရင် အဖွဲ့ အစီအစဉ်အတိုင်း ကားနဲ့ လှည့်လည် ဖျော်ဖြေသွားမယ်” ဟု ဦးစည်သူနိုင်က ဆိုသည်။
ယခင်နှစ်က မဟာသင်္ကြန် ကျင်းပရန် ရက်အနည်းငယ် လိုသည့် အချိန်တွင် ဌာနဆိုင်ရာ မဏ္ဍပ်များ၌ သံချပ်အဖွဲ့များ ဖျော်ဖြေပေးရန် ဖိတ်ခေါ်လာခဲ့ပြီး သံချပ်အဖွဲ့ လေးဖွဲ့က ဖျော်ဖြေခဲ့သော်လည်း ပြည်ထဲရေး၊ လူဝင်မှုကြီးကြပ်ရေး (လ.ဝ.က)၊ လျှပ်စစ်၊ သစ်တောနှင့် မြန်မာ့သစ်လုပ်ငန်း ဌာနတို့၏ စုပေါင်းသင်္ကြန် ဖျော်ဖြေရေး မဏ္ဍပ်တွင် ဝင်ရောက်ဖျော်ဖြေခွင့် မရရှိခဲ့ပေ။
from The Voice Weekly's Facebook Wall http://ift.tt/1cXisDn
Comments
Post a Comment