မြန်မာနှင့် ကမ္ဘောဒီးယား မြေယာ သိမ်းဆည်းခံရမှု ပြဿနာများ အချိန်ဆွဲ ဖြေရှင်းလျက်ရှိဟု အာဆီယံ ပြည်သူ့ဖိုရမ် ဒုတိယဥက္ကဋ္ဌ ပြောဆို
ရန်ကုန်၊ မတ် ၂၄
အာဆီဒေသတွင်း နိုင်ငံများအတွင်း မြန်မာနှင့် ကမ္ဘောဒီးယား နိုင်ငံများသည် မြေယာ သိမ်းဆည်းခံရမှု ပြဿနာများကို အစိုးရများက အချိန်ဆွဲ ဖြေရှင်းနေကြောင်း အာဆီယံ ပြည်သူ့ဖိုရမ် ဒေသတွင်း ဦးဆောင်ကော်မတီ ဒုတိယ ဥက္ကဋ္ဌ မစ္စဖရီမရူဒီဒေါင်ရွန်က ပြောကြားသည်။
အင်းစိန်မြို့နယ် City Gold Resort ဟိုတယ်တွင် မတ်လ ၂၄ ရက်နေ့က ပြုလုပ်သော အာဆီယံ ပြည်သူ့ဖိုရမ် ရလဒ်များနှင့် ပတ်သက်သည့် သတင်းစာ ရှင်းလင်းပွဲတွင် ၎င်းက ယင်းသို့ ပြောကြားသည်။
အဆိုပါ နိုင်ငံများမှ မြေယာ ပြဿနာ အများစုမှာ အစိုးရက သိမ်းဆည်း ခဲ့ခြင်းကြောင့် ဖြစ်ပွားရခြင်း ဖြစ်ပြီး ပြန်လည် ဖြေရှင်းရာတွင်လည်း အချိန်ကြာမြင့်စွာ ဆောင်ရွက်နေရသည်ကို တွေ့ရှိရကြောင်း မစ္စဖရီမရူဒီဒေါင်ရွန်က ပြောကြားသည်။
“ဒီနှစ်နိုင်ငံမှာ ဆိုးရွားတဲ့ ပြဿနာတွေကို အချိန်ဘယ်လောက်အထိ ယူပြီး ဖြေရှင်းရမလဲ အာဆီယံ ဖိုရမ်မှာ ဆွေးနွေးခဲ့ပါတယ်။ နောက်ပြီး ပြဿနာတွေ ပြေလည်အောင် အရပ်ဘက် လူမှုအဖွဲ့အစည်းတွေရဲ့ ပူးပေါင်း ပါဝင်မှုကိုလည်း အုပ်ချုပ်သူ အစိုးရတွေအနေနဲ့ အတိုင်းအတာ တစ်ခုအထိ လက်ခံဖို့ လိုပါတယ်” ဟု ၎င်းကဆိုသည်။
အဆိုပါ မြေယာ ပြဿနာများ အပါအဝင် အာဆီယံ ပြည်သူ့ဖိုရမ်မှ ထုတ်ပြန်ချက်များကို မြန်မာနိုင်ငံ နိုင်ငံခြားရေး ဝန်ကြီးနှင့် တွေ့ဆုံဆွေးနွေးရန် ပန်ကြားစာ တစ်စောင် ပေးပို့ထားကြောင်း အာဆီယံ ပြည်သူ့ဖိုရမ် ဦးဆောင် ကျင်းပရေး ကော်မတီထံမှ သိရသည်။
ယင်းကဲ့သို့ ယခင်အစိုးရ လက်ထက်မှ ကျန်ရှိနေခဲ့သော လယ်ယာမြေ ပြဿနာများကို ကျန်ရှိသည့် အစိုးရသစ် သက်တမ်းအတွင်း အပြီးသတ် ဖြေရှင်းရန်အတွက် လယ်ယာမြေ အသုံးချမှု စီမံခန့်ခွဲရေး ကော်မတီများကို ဖွဲ့စည်းထားပြီး လွှတ်တော် ကိုယ်စားလှယ်များက ပူးပေါင်း ဆောင်ရွက်ပေးရန် နိုင်ငံတော်သမ္မတ ဦးသိန်းစိန်က တိုက်တွန်းထားသည်။
မြန်မာနိုင်ငံတွင် သုံးရက်တိုင် ကျင်းပခဲ့သော အာဆီယံ ပြည်သူ့ဖိုရမ်တွင် ငြိမ်းချမ်းရေး၊ ဖွံ့ဖြိုးရေး၊ တရားမျှတရေး၊ ဒီမိုကရေစီ ထွန်းကားရေးအတွက် အာဆီယံလူထု သွေးစည်းညီညွတ်မှု မြင့်မားရေးနှင့် သက်ဆိုင်သော အလုပ်ရုံ ဆွေးနွေးပွဲ ၃၅ ခုကို ပြုလုပ်ခဲပြီး အာဆီယံ အဖွဲ့ဝင် နိုင်ငံများနှင့် မြန်မာနိုင်ငံမှ လူပေါင်း ၃၀၀၀ ကျော် တက်ရောက် ဆွေးနွေးခဲ့ကြောင်း အာဆီယံ ပြည်သူ့ဖိုရမ် ဦးဆောင် ကျင်းပရေး ကော်မတီထံမှ သိရသည်။
from The Voice Weekly's Facebook Wall http://ift.tt/1rrQQdr
Comments
Post a Comment